ក្រុមមន្ត្រីបាននិយាយថា រដ្ឋធានី គីវ (Kyiv)របស់ប្រទេសអ៊ុយក្រែន និង​តំបន់​ភាគ​ខាង​លិច​នៃ​ទីក្រុង ល្វីវ (Lviv) បានស្ថិតនៅក្រោមការវាយប្រហារតាមអាកាស ដ៏ខ្លាំងក្លា របស់​រុស្ស៊ី​នៅ​ព្រឹក​ថ្ងៃ​អាទិត្យ ២៤ មីនា ហើយកងកម្លាំងប៉ូឡូញ ក៏ត្រូវបានដាក់ឱ្យត្រៀមលក្ខខណៈផងដែរ។

រុស្ស៊ី និងអ៊ុយក្រែន បានចូលរួមនៅក្នុងការវាយប្រហារតាមអាកាសជាបន្តបន្ទាប់ ដោយ​ការ​វាយ​ប្រហារកាលពីថ្ងៃអាទិត្យក៏កើតមានឡើងផងដែរ មួយថ្ងៃបន្ទាប់ពីយោធារុស្ស៊ី បាន​និយាយ​ថា​ខ្លួន​ដណ្តើម​បានភូមិ អ៊ីវ៉ានីវស្កេ( Ivanivske) ភាគខាងលិចទីក្រុងបាកម៉ូដ ( Bakhmut) របស់​អ៊ុយក្រែន។    

ការវាយ​ប្រហារដោយក្រុមសកម្មប្រយុទ្ធលើសាលប្រគំតន្ត្រីនៅទីក្រុងមូស្គូកាលពីថ្ងៃសុក្រ ដែល​បាន​សម្លាប់មនុស្សយ៉ាងហោចណាស់ ១៣៣នាក់​ក៏​បានក្លាយ​ជា​ចំណុច​ក្ដៅ​ថ្មី​រវាង​គូប្រជែង​ទាំង​ពីរ​ផង​ដែរ។ 

អភិបាលក្រុង Kyiv លោក វីតាលី គ្លីតស្កូ (Vitali Klitschko) បានបង្ហោះ​នៅ​លើ​បណ្ដាញ​សង្គម​Telegram នៅថ្ងៃអាទិត្យថា មានការផ្ទុះជាច្រើននៅក្នុងរដ្ឋធានី។ ប្រព័ន្ធ​ការពារ​ដែនអាកាស​កំពុង​ដំណើរ​ការ។ 

ចំណែកអភិបាលតំបន់ក្រុងល្វីវ លោក ម៉ាស្គីម កូហ្ស៊ីតស្គី (Maksym Kozytskyi) បាន​និយាយ​ថា ស្រុក ស្ទី (Stryi) ភាគខាងត្បូងទីក្រុង ល្វីវ ជិតព្រំដែនប៉ូឡូញ ក៏ត្រូវបាន​រង​ការ​វាយ​ប្រហារ​ផងដែរ។

អ៊ុយក្រែន ត្រូវបានដាក់ឱ្យស្ថិតនៅក្រោមការប្រកាសអាសន្នផ្លូវអាកាសទូទាំងប្រទេស ដែល​ព្រមាន​ពីមីស៊ីលតម្រង់គោលដៅ ត្រូវបាន​បាញ់​ស្រោច​ចេញ​ពី​យន្ត​ហោះ​ទម្លាក់​គ្រាប់​បែក​យុទ្ធសាស្ត្រ Tu-95MS របស់រុស្ស៊ី។ការជូនដំណឹងត្រូវបានដកចេញ ប្រហែល​ពីរ​ម៉ោង​ក្រោយ​មក​។

លោក ហ្ស៊ើហ្គី ប៉ូបកូ (Sergiy Popko) ប្រធានរដ្ឋបាលយោធាទីក្រុង Kyiv បាននិយាយថា មីស៊ីល​ជាច្រើនគ្រាប់ត្រូវបានបាញ់ស្រោចលើតំបន់ជាច្រើនក្នុងរដ្ឋធានី គីវ នៅក្នុង​ការ​វាយ​ប្រហារ​មុន​ព្រឹក​ព្រលឹម​លើកទី ៣ ក្នុងរយៈពេល៤ ថ្ងៃ៕