រាជរដ្ឋាភិបាល និងរដ្ឋសភាជាតិ នៃកម្ពុជា បានចេញសេចក្ដីថ្លែងការណ៍ថ្កោលទោសយ៉ាងខ្លាំងក្លា ​បំផុត​ចំពោះ​អំពើវាយប្រហារដ៏សាហាវឃោរឃៅក្នុងការវាយប្រហារភេរវកម្មនៅសាលមហោស្រព ទីក្រុងមូស្គូ សហព័ន្ធរុស្ស៊ី កាលពីថ្ងៃទី២២ ខែមីនា ឆ្នាំ២០២៤ បណ្តាលមនុស្សស្លាប់ និង​របួស​រាប់​រយនាក់។

ក្រសួងការបរទេស និងសហប្រតិបត្តិការអន្តរជាតិកម្ពុជាស្តីពីការវាយប្រហារភេរវកម្ម នៅ​សាល​មហោស្រព នៅទីក្រុងមូស្គូ សហព័ន្ធរុស្ស៊ី បានបង្ហាញក្តីរន្ធត់ចំពោះការស្លាប់បាត់បង់ជីវិត និង​របួស​មនុស្សរាប់រយនាក់ នៅក្នុងការវាយប្រហារភេរវកម្មនៅសាលមហោស្រពទីក្រុងមូស្គូ កាលពីថ្ងៃ​ទី២២ ខែមីនា ឆ្នាំ ២០២៤។ រាជរដ្ឋាភិបាលកម្ពុជាថ្កោលទោសយ៉ាងខ្លាំងក្លាបំផុតចំពោះអំពើវាយប្រហារដ៏សាហាវឃោរឃៅនេះ។

រាជរដ្ឋាភិបាលកម្ពុជា​បានសម្តែងនូវមរណទុក្ខដ៏ក្រៀមក្រំបំផុត និងសមានចិត្តដ៏ជ្រាល​ជ្រៅ​ជូន​ចំពោះ​គ្រួសារ​ជនរងគ្រោះ និងរដ្ឋាភិបាលនៃសហព័ន្ធរុស្ស៊ី ហើយជូនពរឱ្យ​អ្នក​រងរបួស​ទាំង​អស់​បា​ន​ជា​សះ​ស្បើយឆាប់រហ័ស។

តាមរយៈសេចក្ដីថ្លែងការណ៍ កម្ពុជាធ្វើការបញ្ជាក់ជាថ្មីម្តងទៀតថា ទង្វើភេរវកម្ម​ណា​ក៏ដោយ​គឺ​ជា​បទ​ឧក្រិដ្ឋ​ដែលមិនអាចមានហេតុផលណាមួយជាសំអាងបានឡើយ ទោះបីជា​ប្រព្រឹត្ត​ក្នុង​គោល​បំណង​ណាមួយ និងដោយបុគ្គលណាក៏ដោយ។ កម្ពុជាសម្តែងនូវសាមគ្គីភាពជាមួយរដ្ឋាភិបាល និង​ប្រជាជនរុស្ស៊ីនៅក្នុងអំឡុងពេលវេលាដ៏ក្រៀមក្រំនេះ៕ អត្ថបទ៖ វ៉ន ដារ៉ា