នៅសល់ប្រមាណតែ២០ថ្ងៃទៀតប៉ុណ្ណោះ ពិធីបុណ្យចូលឆ្នាំថ្មីប្រពៃណីជាតិខ្មែរ នឹង​ឈាន​ចូល​មកដល់ ខណៈពេលនេះតាមបណ្តាអាជីវករលក់គ្រឿងបែបបុរាណតុបតែងលម្អ បានអះអាងថា ក្នុង​អំឡុងពេលនេះសម្ភារៈប្រើប្រាស់បែបបុរាណ មានដូចជា ដើមឬស្សី ជញ្ជាំងស្បូវ ចំបើង ក្អម ឆ្នាំង អង្រុក ទ្រូតូចៗជាដើម បាននិងកំពុងលក់ដាច់ និងមានតម្រូវការកើនឡើងជាបណ្តើរៗ។

តំណាងម្ចាស់ដេប៉ូលក់គ្រឿងសំណង់ នៅក្រុងតាខ្មៅខេត្តកណ្តាល បានថ្លែងប្រាប់ BTV នៅ​ថ្ងៃ​ទី២៥ ខែមីនានេះថា បច្ចុប្បន្នមានអតិថិជនភាគច្រើនមកពីរមណីយដ្ឋានទេសចរណ៍ កន្លែង​កម្សាន្ត​ សាលារៀន វត្តអារ៉ាម មូលដ្ឋានអាជីវកម្ម និងបណ្តាពលរដ្ឋនៅតាមផ្ទះមួយចំនួន បាន​ទិញ​សម្ភារៈ​ប្រើប្រាស់បែបបុរាណ មានដូចជា គ្រឿងលម្អ បែបសាសនា ទង់ខ្សែ​ក្រណាត់​ចម្រុះ​ពណ៌ កូមផ្កាយ ដើមឬស្សី ជញ្ជាំងស្បូវ ចំបើង ក្អម ឆ្នាង អង្រុត ទ្រូតូចៗជាដើម ដើម្បីយក​ទៅ​តុប​តែង​លម្អ​កម្មវិធីជួបជុំសប្បាយរីករាយមុនពេលបុណ្យចូលឆ្នាំថ្មីឈានចូលមកដល់ នៅ​ក្នុង​ពេល​ពិធី​បុណ្យចូលឆ្នាំថ្មីប្រពៃណីខ្មែរ។

តំណាងអាចារ្យនៅវត្តចាក់អង្រែលើ បានឱ្យដឹងថា នៅក្នុងវត្តចាក់អង្រែលើ រៀងរាល់ឆ្នាំ ក្នុង​អំឡុ​ង​ថ្ងៃ​បុណ្យ​ចូលឆ្នាំថ្មីប្រពៃណីជាតិខ្មែរ វត្តតែងតែទិញសម្ភារៈប្រើប្រាស់បែបបុរាណរបស់កសិករខ្មែរ យក​ទៅ​រៀបចំដំឡើងតុបតែធ្វើរោង តាំងលម្អសម្ភារៈប្រើប្រាស់បែបបុរាណ ដើម្បីអប​អរ​សាទរ​កម្ម​វិធី​បុណ្យ​ចូលឆ្នាំថ្មីប្រពៃណីខ្មែរផង និងដើម្បីអភិរក្ស​មរតក​សម្បត្តិ​វប្បធម៌​ខ្មែរ​ផ្សព្វផ្សាយ​ឲ្យ​កូន​ខ្មែរ​ជំនាន់​ក្រោយស្គា​ល់ផងដែរ។

សូមបញ្ជាក់ថា ពិធីបុណ្យចូលឆ្នាំថ្មីប្រពៃណីខ្មែរនឹងឈានចូលមកដល់នៅយប់ថ្ងៃទី១៣ ខែមេសា ឆ្នាំ​២០២៤ ហើយជាទូទៅនៅមុនពិធីបុណ្យចូលឆ្នាំមកដល់ ពលរដ្ឋខ្មែរ​តែងតែ​រៀប​ចំ​តុប​តែង​សម្អា​ត​ផ្ទះ​សម្បែងឱ្យបានស្អាតដើម្បីរងចាំទទួលទេវតាឆ្នាំថ្មី៕ អត្ថបទ ស៊ុម សុខជា