ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី៣០ ខែមីនា ឆ្នាំ២០២៤ខាងមុខនេះ នឹង​បន្ត​ការងារ​ការ​បើកប្រាក់ឈ្នួលនិងប្រាក់បំណាចផ្សេងៗដល់កម្មករនិយោជិតរោងចក្រស្បែកជើង RG Footwear ស្ថិតនៅស្រុកអង្គស្នួល ខេត្តកណ្តាល ខណៈកម្មកររោងចក្រ Y & W ហ្គាមេន ជាង ៣,៧០០នាក់ បានទទួលបានដំណោះស្រាយយ៉ាងយកចិត្តទុកដាក់បំផុតរួចហើយ។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅ​ព្រឹកថ្ងៃទី២៥ ខែមីនានេះ បានមានប្រសាសន៍ប្រាប់ ប៊ីធីវី ឲ្យដឹងថា សម្រាប់រោងចក្រ RG Footwear មន្រ្តីក្រសួងកំពុងសម្របសម្រួលជាមួយក្រុមហ៊ុន និងអាជ្ញាធរ​ស្រុក​អង្គស្នួល​ដើម្បី​សម្រប​បែបបទ ឱ្យកម្មករបានបើកប្រាក់មានភាពងាយស្រួលនាពេលខាងមុខនេះ។ ឯកឧត្តម បាន​បន្តថា ទីភ្នាក់ងារជាតិមុខរបរ និងការងារ (NEA) ក៏បានចុះទៅម្តុំរោងចក្រនោះផងដែរ នៅពេល​ក្រោយពេលមានបញ្ហាដោយសារអគ្គិភ័យ ដើម្បីផ្តល់ព័ត៌មានអំពីឱកាសការងារថ្មីៗ សម្រាប់​កម្មករដែលចង់ស្វែងរកការងារថ្មីធ្វើ។ ក្នុងនោះ កម្មករមួយចំនួន ក៏បានសួរ​នាំ​អំពី​ឱកាស​ការងារ​ថ្មី​ជា​បណ្តើរៗផងដែរ។

សូមបញ្ជាក់ថាកាលពីថ្ងៃទី១៨ ខែមីនា ឆ្នាំ២០២៤ រោងចក្រស្បែកជើង RG Footwear (Cambodia) Co.,LTD ស្ថិតនៅភូមិស្រុកអង្គស្នួល ខេត្តកណ្តាល បាន​ជួប​ឧបទ្ទវហេតុ​អគ្គិភ័យ​ឆេះ​រោង​ចក្រ​ទាំងស្រុង ដែលធ្វើឲ្យរោង​ចក្រ​មិន​អាច​ស្តារ​លទ្ធភាព​ដំណើរ​ការ​អាជីវកម្ម​ឡើង​វិញក្នុង​ពេលឆាប់បានឡើយ។ ក្នុងកាលៈទេសៈមិនប្រាកដអំពីពេលវេលា និងលទ្ធភាព​នៃការស្វែង​រក​ទុនបន្ថែមថ្មីដើម្បីជួសជុល សាងសង់ និងបំពាក់សម្ភារ បរិក្ខារឡើងវិញ រោងចក្របាន​ប្រកាសបិទ​ដំណើរការរបស់ខ្លួនទាំងស្រុង ដែលនាំឲ្យកិច្ចសន្យាការងាររបស់​កម្មក​រ​និយោជិត​ទាំង​អស់ត្រូរបានរំលាយ។ ដូច្នេះក្រសួងការងារ និងបណ្តុះបណ្តាលវិជ្ជាជីវៈ នឹងត្រូវបន្ត​រ៉ាប់​រងលើការងារនេះជូនដល់កម្មករនិយោជិតដែលកំពុងជួបបញ្ហា និងត្រូវការ​ជំនួយ​បន្ទាន់​ផងដែរ។ ពាក់ព័ន្ធការទទួលបានប្រាក់ឈ្នួល និងប្រាក់បំណាចផ្សេងៗនៅរោងចក្រ Y&W ស្ថិត​នៅ​តំប​ន់ព្រែកជ្រៃ ខណ្ឌដង្កោ តាមរយៈក្រសួងការងារ និងបណ្តុះបណ្តាលវិជ្ជាជីវៈ កម្មករ​កម្ម​កា​រិនី បានបង្ហាញទឹកមុខសប្បាយរីករាយ និងសម្តែងការអរគុណជូនចំពោះថ្នាក់ដឹកនាំគ្រប់ជាន់ថ្នាក់ ជា​ពិសេសប្រមុខរាជរដ្ឋាភិបាលកម្ពុជា តែងតែយក​ចិត្ត​ទុក​យ៉ាង​ខ្លាំង​ចំពោះ​ពួក​គាត់​ដែល​ជា​កម្មករ​៕ អត្ថបទ៖ ឈិត បូរ៉ាវី