ភ្នំពេញ៖ ប្រធានក្រុមយុវជនសង្គមស៊ីវិល និងក្រុមសេដ្ឋកិច្ចក្រៅប្រព័ន្ធ លោក ហេង សំណាង បាន​អំពាវនាវដល់សាធារណៈជន ចូលរួមឆ្លើយតបដល់ការផ្សព្វផ្សាយព័ត៌មានក្លែងក្លាយ និង​ពិនិត្យ​ឱ្យបានគ្រប់ជ្រុងជ្រោយលើការផ្សព្វផ្សាយព័ត៌មាននានានៅលើបណ្ដាញសង្គម និងសូម​បញ្ឈប់​នាំ​គ្នាចែករំលែកបន្ត ឬ Like Comment Share ចំពោះព័ត៌មានដែលមិនពិត ពីព្រោះការ​ចែក​រំលែក​ព័ត៌មានទាំងនោះវាអាចបណ្តាលក្លាយជាជនរងគ្រោះជាដើម។

លោក ហេង សំណាង បានអំពាវនាវក្នុងឱកាសបើកវគ្គបណ្តុះបណ្តាល សមាជិក​ក្រុម​សេដ្ឋកិច្ច​ក្រៅ​ប្រព័ន្ធចំនួន ១០០ នាក់ ជំនាន់ទី១ ស្តីពី «មូលដ្ឋានគ្រឹះការសរសេរព័ត៌មាន» ដែលផ្តោត​លើការ​ចូលរួមទប់ស្កាត់រាល់ព័ត៌មានក្លែងក្លាយ ឬប្រឌិតកាលពីថ្ងៃទី២៤ ខែមីនា ឆ្នាំ២០២៤នេះ។ ក្នុង​ឱកាស​នោះលោក​បាន​អំពាវនាវ​ដល់​មហាជន​ធ្វើ​យ៉ាង​ណារួម​គ្នា​ទប់​ស្កាត់​រាល់​ព័ត៌មាន​ក្លែង​ក្លាយ ប្រឌិត ដែលបង្កើតឡើងដោយក្រុមប្រឆាំង ដើម្បី​ញុះញង់​ក្នុង​ន័យ​ទុច្ចរិត​ធ្វើ​ឱ្យ​ប្រទេស​ជាតិ​បែក​បាក់ និងអស្ថិរភាពនៅក្នុងសង្គមជាដើម។

លោក ហេង សំណាង បានអំពាវនាវដល់សាធារណៈជនថា៖ ១/. ស្វែងរក​ប្រភព​ព័ត៌មាន​ដែល​មាន​ប្រភព​ត្រឹមត្រូវ ច្បាស់ការចេញពីស្ថាប័នផ្លូវការ ពិតឬក្លែងក្លាយ ហើយកុំទាន់ធ្វើការវិនិច្ឆ័យ និង​ចូលខមមិនក្នុងន័យមិនល្អ ឬខុសនឹងច្បាប់ ប៉ុន្ដែត្រូ​វ​កំណត់​ប្រភព​នោះ​ឱ្យ​បាន​ច្បាស់​លាស់​ជា​មុនសិន​។ ២/. រួមគ្នាចូលទៅ Report Page អនាមិកទាំងនោះ ដើម្បីឱ្យក្រុម​ហ៊ុន​ហ្វេស​ប៊ុក​បិទ​ព័ត៌មាន​ប្រឌិត។ ៣/. ឆ្លើយតបបង្ហាញការពិត តាមរយៈបណ្ដាញសង្គម ឬបណ្ដាញ​សារព័ត៌មាន​នានា​ជា​បន្ទាន់​ដើម្បីបន្សាបព័ត៌មានក្នុងន័យទុច្ចរិតណាមួយ។ ៤/.អំពាវនាវ​ដល់​ក្រុម​អ្នក​បង្កើត​មាតិកា (Creator Content) ឬឆាណែល ហ្វេសប៊ុក យូធូប ជាដើម ត្រូវបង្កើត​មាតិកា​របស់​ខ្លួន​ប្រកប​ដោយ ក្រមសីលធម៌ វិជ្ជាជីវៈ មិនត្រូវបង្កើតមានតិកាណាមួយផ្ទុយនឹងច្បាប់ ឬប៉ះពាល់​សិទ្ធិ​អ្នក​ដទៃឡើយ។ ៥/.បញ្ឈប់នាំគ្នាចែករំលែកបន្ត ឬ Like Comment Share ចំពោះ​ព័ត៌មាន​ដែល​មិន​ពិត ពីព្រោះការចែករំលែកព័ត៌មានទាំងនោះវាអាចបណ្តាលក្លាយជាជនរងគ្រោះជាដើម៕