អតីតមេដឹកនាំកោះតៃវ៉ាន់ លោក ម៉ា អ៊ីងចូវ (Ma Ying-jeou) នឹងធ្វើដំណើរទៅកាន់ប្រទេសចិន ជាលើកទីពីរនៅខែក្រោយនេះ ដោយដឹកនាំនិស្សិតមួយក្រុមក្នុងការធ្វើដំណើររយៈពេល ១១ ថ្ងៃ ដើម្បីទៅទស្សនាទីតាំងនានា រួមទាំងទីក្រុងប៉េកាំង ផងដែរ។

លោក ម៉ា ដែលជាមេដឹកនាំពីឆ្នាំ ២០០៨ ដល់ឆ្នាំ ២០១៦ កាលពីឆ្នាំមុន បានក្លាយជាអតីតមេដឹកនាំតៃវ៉ាន់ដំបូងគេ ដែលធ្វើទស្សនកិច្ចទៅកាន់ប្រទេសចិន។ លោក ម៉ា បានជួបជាមួយប្រធានាធិបតីចិន លោក ស៊ី ជីនពីង (Xi Jinping) នៅប្រទេសសិង្ហបុរី កាលពីចុងឆ្នាំ ២០១៥ ភ្លាមៗមុនពេលមេដឹកនាំតៃវ៉ាន់បច្ចុប្បន្នគឺលោកស្រី សៃ អ៊ីងវិន (Tsai Ing-wen) បានឈ្នះការបោះឆ្នោត។

ចាប់តាំងពីរដ្ឋាភិបាលសាធារណរដ្ឋចិន បានរត់ភៀសខ្លួនទៅកោះតៃវ៉ាន់ ក្នុងឆ្នាំ១៩៤៨ បន្ទាប់ពីចាញ់សង្រ្គាមស៊ីវិលរបស់មេដឹកនាំកុម្មុយនិស្ត លោក ម៉ៅ សេទុង មក មិនមានមេដឹកនាំកោះតៃវ៉ាន់ណាម្នាក់បានទៅទស្សនកិច្ចប្រទេសចិនទេ។ ប្រទេសចិន ចាត់ទុកកោះតៃវ៉ាន់ ដែលគ្រប់គ្រងតាមបែបប្រជាធិបតេយ្យថាជាទឹកដីរបស់ខ្លួន ហើយបានបង្កើនសម្ពាធផ្នែកយោធា និងនយោបាយដើម្បីអះអាងការទាមទារទាំងនោះ។

ការិយាល័យកិច្ចការតៃវ៉ាន់របស់ប្រទេសចិន ដែលហៅឈ្មោះលោកពេញថា «លោក ម៉ា អ៊ីងចូវ» ជាជាងអតីតមេដឹកនាំ បាននិយាយថា ខ្លួនស្វាគមន៍ដំណើរទស្សនកិច្ចនេះ៕