ប្រជាជនអាហ្សង់ទីនរាប់ពាន់នាក់បាននាំគ្នាប្រមូលម្ដុំ នៅជុំវិញប្រទេស កាលពីថ្ងៃអាទិត្យ (ទី២៤ ខែមីនា) ដើម្បីរម្លឹកខួបនៃរដ្ឋប្រហារយោធាឆ្នាំ១៩៧៦ ជារបបដឹកនាំដែលមានរយៈពេល ៨ឆ្នាំ និងដែលនាំឲ្យមានការគាបសង្កត់ ការធ្វើទារុណកម្ម និងការបាត់ខ្លួនរីករាលដាលយ៉ាងទូលំទូលាយ។

ក្រុមសិទ្ធិមនុស្សក្នុងស្រុក និងមនុស្សជាច្រើនបានប្រមូលផ្តុំគ្នា នៅទីក្រុង Buenos Aires (ប៊ុយណូស៊ែ) ដោយលើកគ្រវីបដា ច្រៀងចម្រៀង និងកាន់រូបថតអ្នកដែលត្រូវបានសម្លាប់ និងបាត់ខ្លួន អំឡុងរបបផ្តាច់ការនោះ។ អង្គការសិទ្ធិមនុស្សប៉ាន់ប្រមាណថា មនុស្ស ៣០.០០០នាក់ ត្រូវបានចាប់ពង្រត់ ធ្វើទារុណកម្ម និងសម្លាប់ នៅក្នុងរបបផ្តាច់ការយោធា រវាងឆ្នាំ១៩៧៦ និងឆ្នាំ១៩៨៣។

ភាគច្រើននៃអ្នកបាត់ខ្លួន គឺជាសមាជិកបក្សប្រឆាំង សមាជិកសហជីព ឬក៏និស្សិត តែពេលខ្លះទារកត្រូវបានចាប់ពង្រត់ និងលក់ដោយលួចលាក់ ឬចិញ្ចឹមដោយខុសច្បាប់។

បាតុកម្មគម្រប់ខួប កាលពីថ្ងៃអាទិត្យ គឺជាលើកដំបូងហើយក្រោមការដឹកនាំរបស់ប្រធានាធិបតីជ្រុលនិយម លោក Javier Milei ដែលបានឡើងកាន់អំណាចនៅថ្ងៃទី១០ ខែធ្នូ និងដែលអ្នករិះគន់បានចោទប្រកាន់ថា បាននិយាយសម្រាលអំពើយង់ខ្នងរបស់របបផ្តាច់ការដ៏ឃោរឃៅរបស់ប្រទេសនេះ។ អនុប្រធានាធិបតីរបស់លោក Milei គឺលោកស្រី Victoria Villarruel បានការពារមន្ត្រីយោធាដែលត្រូវបានកាត់ទោសពីបទឧក្រិដ្ឋកម្មប្រឆាំងមនុស្សជាតិ។

កាលពីព្រឹកថ្ងៃអាទិត្យ រដ្ឋាភិបាលរបស់លោក Milei បានចេញផ្សាយវីដេអូមួយដែលផ្តោតលើជនរងគ្រោះ ដែលត្រូវបានវាយប្រហារដោយក្រុមកុម្មុយនីស្ត នៅមុនរបបផ្តាច់ការនោះ ហើយបានចោទសួរអំពីតួលេខអ្នកបាត់ខ្លួន ៣០.០០០នាក់នោះ។

នៅពេលលោកបង្ហោះវីដេអូនោះឡើងវិញ លើបណ្ដាញសង្គម X លោក Milei បានលើកឡើងថា៖ «សម្រាប់ការចងចាំទាំងស្រុង ដូច្នេះ អាចមានការពិត និងយុត្តិធម៌»៕