ខេត្តពោធិ៍សាត់៖ នៅសល់តែប៉ុន្មានសប្តាហ៍ទៀត នឹងចូលដល់ពិធី​បុណ្យចូលឆ្នាំថ្មី​ប្រពៃណី​ជាតិ​ខ្មែរ ឆ្នាំរោង ឆស័ក ក្រុមការងារចុះជួយមូលដ្ឋានឃុំមេទឹក ស្រុកបាកាន ដែលមាន​ឯកឧត្តម​បណ្ឌិត ទី ថានី ជាប្រធានបានរៀបចំធ្វើពិធីបុណ្យកត្តញ្ញូរួមគ្នា ជូនដល់លោកយាយលោកតា ចាស់​​ព្រឹទ្ធាចារ្យ ដែលមានអាយុចាប់ពី៧០ឆ្នាំឡើងទៅ ចំនួន៥០០​នាក់​អញ្ជើញ​មក​ពី​តាម​បណ្តា​ភូមិ​នានា​ក្នុងឃុំមេទឹក ។ ពិធីបុណ្យនេះរៀបចំធ្វើនៅក្នុងបរិវេណវត្ត ទួលលៀប ក្នុងឃុំមេទឹក ដោយ​មានការចូលរួមពីកូនៗឬចៅៗ របស់លោកយាយលោកតា ចាស់ព្រឹទ្ធីចារ្យទាំង៥០០នាក់ និង​សមាជិកក្រុមប្រឹក្សាឃុំ អាជ្ញាធរភូមិ-ឃុំ សរុបអ្នកចូលរួមទាំងអស់ប្រមាណ១២០០នាក់ ។

ពិធីបុណ្យនេះត្រូវបានប្រារព្ធឡើងស្របតាមបែបបទព្រះពុទ្ធសាសនានិងទំនៀមទម្លាប់ប្រពៃណីខ្មែរ ដោយមានការនិមន្តព្រះសង្ឃធ្វើកិច្ចកត្តញ្ញូរវាងកូនចៅនិងលោកយាយលោកតា ពិធី​ស្រង់​ព្រះ​រួម​គ្នា និងព្រះសង្ឃធ្វើពិធីប្រោះព្រំ ។ ក្នុងនោះដែរ ក្រុមការងារ​ចុះ​ជួយ​មូលដ្ឋាន​ឃុំ​មេ​ទឹក​ក៏​បាន​រៀប​ចំ​ជា​ថវិកា និងសម្ភារៈរួមមាន សំលៀកបំពាក់ នំនិងភេសជ្ជៈ ស្បែកជើង និងរូបថត​ដាក់​ស៊ុម​ជា​ដើម ដើម្បីឲ្យកូនចៅ ជូនដល់លោកយាយលោកតាទាំង៥០០នាក់ផងដែរ ។

ឯកឧត្តមបណ្ឌិត ទី ថានី មានប្រសាសន៍លើកឡើងថា ការរៀបចំពិធីបុណ្យបុណ្យកត្តញ្ញូរួមគ្នា ជូន​ដល់លោកយាយលោកតា ចាស់ព្រឹទ្ធីចារ្យ ដែលមានអាយុចាប់ពី៧០ឆ្នាំឡើងក្នុងពេលនេះគឺ ក្រោម​គំនិតផ្តួចផ្តើម និងឧបត្ថម្ភគ្រាំទ្រដោយ ឯកឧត្តម កែវ រតនៈ ប្រធាន​ក្រុម​ការងារ​ចុះ​ជួយ​មូល​ដ្ឋាន​ខេត្តពោធិ៍សាត់ និងឯកឧត្តម ទី នរិន្ទ ប្រធានក្រុមការងារចុះជួយមូលដ្ឋានស្រុកបាកាន ។ ក្នុង​គោលបំណង គឺដើម្បីជាការដឹងគុណចំពោះចាស់ព្រឹទ្ធាចារ្យ ដែលជា​ធន​ធាន​មនុស្ស​ដ៏​មាន​តម្លៃ​ ដោយបានផ្តល់ដំបូន្មានមានល្អៗ និង​សំបូរ​ទៅ​ដោយបទ​ពិសោធន៍​ព្រម​ទាំង​ស្នាដៃ​រាប់​មិន​អស់​ក្នុង​សង្គម ដល់កូនចៅគ្រប់ជំនាន់ ជាពិសេសគឺ​បាន​ចូលរួម​ថែ​រក្សា​ការពារ​នូវ​តម្លៃប្រ​ពៃណី​វប្បធម៌​ខ្មែរ​ពីបុរាណដល់កូនចៅជំនាន់ក្រោយៗ ហើយប្រសិនបើ​មាន​ការគាំ​ទ្រ​ក្រុម​ការងារ​នឹង​រៀបចំ​ពិធី​បុណ្យនេះនៅឆ្នាំក្រោយៗទៀត។

គួរឲ្យដឹងដែរថា ឯកឧត្តមរដ្ឋមន្ត្រី កែវ រតនៈ ក្នុងនាមជាប្រធានក្រុមការងារចុះជួយខេត្តពោធិ៍សាត់ បា​ន​ណែនាំឲ្យក្រុមការងារចុះជួយតាមមូលដ្ឋានឃុំទាំង៩ ក្នុងស្រុកបាកាន ត្រូវរៀ​ប​ចំធ្វើ​បុណ្យ​កតញ្ញុ​ជូន​ដល់លោកយាយលោកតា ចាស់ព្រឹទ្ធីចារ្យ ដែលមានអាយុចាប់ពី៧០ឆ្នាំឡើងទៅ តាម​ឃុំនី​មួយៗរៀងខ្លួនក្នុងកំឡុងពេលមុនពិធីបុណ្យចូលឆ្នាំខ្មែរ៕ អត្ថបទ៖ ភិរុណ ពៅ