ប្រទេសហ្វីលីពីន នៅថ្ងៃចន្ទ (ទី២៥ ខែមីនា) នេះ បានប្រាប់ឲ្យដឹងថា ខ្លួនបានកោះអញ្ជើញបេសកជនចិន ជុំវិញ «សកម្មភាពគឃ្លើន» ដោយឆ្មាំសមុទ្រចិន និងនាវាផ្សេងទៀត នៅក្បែរតំបន់ថ្មប៉ប្រះទឹក ម្ដុំឆ្នេរសមុទ្រនៃប្រទេសអាស៊ីអាគ្នេយ៍មួយនេះ។

ទីក្រុងប៉េកាំង និងទីក្រុងម៉ានីល មានប្រវត្តិជម្លោះដែនសមុទ្រជាយូរយារណាស់មកហើយ នៅក្នុងសមុទ្រចិនខាងត្បូង ហើយតែងមានការប្រឈមមុខដាក់គ្នាម្តងហើយម្តងទៀត រវាងនាវារបស់ប្រទេសទាំង២ នៅតំបន់ថ្មប៉ប្រះទឹកដែលមានជម្លោះ ក្នុងប៉ុន្មានខែថ្មីៗនេះ។

ហើយហេតុការណ៍ចុងក្រោយនេះបានកើតឡើង កាលពីថ្ងៃសៅរ៍ (ទី២៣ ខែមីនា) នៅជិតតំបន់ថ្មប៉ប្រះទឹក Second Thomas Shoal ក្នុងប្រជុំកោះ Spratly ពេលប្រទេសហ្វីលីពីនធ្វើបេសកកម្មជាប្រចាំរបស់ខ្លួន ក្នុងការផ្គត់ផ្គង់ដល់ទាហានហ្វីលីពីនដែលឈរជើងនៅលើនាវា BRP Sierra Madre ដែលជានាវាកងទ័ពជើងទឹកចតទុកចោល។

ហ្វីលីពីនបាននិយាយថា ឆ្មាំសមុទ្រចិនបានរារាំងនាវាផ្គត់ផ្គង់របស់ខ្លួន និងបានបង្កការខូចខាតដល់នាវានេះ ដោយប្រើកាណុងបាញ់ទឹក និងធ្វើឲ្យទាហាន ៣នាក់រងរបួស។ ចំណែកឆ្មាំល្បាតឆ្នេរចិនបានការពារសកម្មភាពរបស់ខ្លួន ដោយពណ៌នាថា ជា «បទប្បញ្ញត្តិ ការស្ទាក់ចាប់ និងការបណ្តេញចេញដោយស្របច្បាប់» ចំពោះនាវាបរទេសដែល «ព្យាយាមបង្ខំចូលឈ្លានពាន» ក្នុងដែនទឹករបស់ចិន។

នៅថ្ងៃចន្ទនេះ ដោយប្រើឈ្មោះជាភាសាហ្វីលីពីន សម្រាប់តំបន់ថ្មប៉ប្រះទឹក Second Thomas Shoal ក្រសួងការបរទេសហ្វីលីពីនបានប្រាប់ថា ទីក្រុងម៉ានីលបានបង្ហាញពី «ការតវ៉ាយ៉ាងខ្លាំងក្លារបស់ខ្លួនប្រឆាំងនឹងសកម្មភាពឈ្លានពានដែលធ្វើឡើងដោយឆ្មាំសមុទ្រចិន និងកងជីវពលដែនសមុទ្រចិន ប្រឆាំងនឹងបេសកកម្មផ្គត់ផ្គង់ជាប្រចាំដែលធ្វើឡើងដោយហ្វីលីពីន នៅតំបន់ថ្មប៉ប្រះទឹក Ayungin Shoal»។

ជាមួយគ្នានេះ ក្រសួងបានបន្ថែមថា ស្ថានទូតហ្វីលីពីន ប្រចាំនៅទីក្រុងប៉េកាំងក៏បានដាក់ការតវ៉ាស្រដៀងគ្នានេះ ជាមួយក្រសួងការបរទេសចិនផងដែរ៕