បាល់ទាត់៖ ក្រុមព្រះខ័នរាជស្វាយរៀងបានទទួល ៣ពិន្ទុបន្ថែមទាំងប្រផិតប្រផើយ បន្ទាប់ពីយកឈ្នះក្រុមម្ចាស់ផ្ទះខេត្តព្រៃវែងដោយលទ្ធផល ២-១ ក្នុងជំនួបសប្ដាហ៍ទី៩ នៃពានរង្វាន់មិត្តហ្វូនខេមបូឌានលីគឆ្នាំ២០២១ នៅកីឡដ្ឋានខេត្តព្រៃវែងកាលពីល្ងាចថ្ងៃទី១៨ ខែកក្កដាម្សិលមិញ។
ការប្រកួតនេះ Privat បានរកគ្រាប់បាល់នាំមុខឲ្យក្រុមលោក Conor Nestor តាំងពីនាទីទី៧ តែត្រូវបានកីឡាករ អះមាត់ ស៊ូរីម រកគ្រាប់តាមស្មើ ១-១ ឲ្យក្រុមម្ចាស់ផ្ទះវិញក្រោយស៊ុតក្រឡកពីដៃអ្នកចាំទី អាំ សុវណ្ណារ៉ាត់ នៅនាទី៣៥។ ប៉ុន្ដែ ៤នាទីក្រោយមកកីឡាករ Lopez Mendy ក៏រកបានគ្រាប់ទី២ ឲ្យក្រុមព្រះខ័នរាជស្វាយរៀងបើកការនាំមុខជាថ្មីនៅនាទី៣៩ ហើយក៏ជាគ្រាប់បាល់ជ័យជម្នះផងដែរ បន្ទាប់ពីក្រុមទាំងពីរព្យាយាមវាយសម្រុកគ្នានៅវគ្គទី២ តែពុំមានគ្រាប់បាល់កើតឡើង។
ជ័យជម្នះនេះបានធ្វើឲ្យក្រុមព្រះខ័នរាជស្វាយរៀងឈរលេខរៀងទី៤ និងមាន ១៦ពិន្ទុស្មើក្រុមភ្នំពេញក្រោន ជាមួយលទ្ធផលប្រកួត ៨លើកឈ្នះ ៥ ស្មើ ១ និងចាញ់ ២ តែចាញ់ប្រៀបក្រុមសិង្ហក្រហម ព្រោះភ្នំពេញក្រោននៅសល់ប្រកួតចំណេញក្នុងដៃ ២ប្រកួត ហើយចាញ់ប្រៀបក្រុមកំពូលតារាងអង្គរថាយហ្គឺរតែ ៣ពិន្ទុប៉ុណ្ណោះ។ រីឯខេត្តព្រៃវែងបន្ដឈរលេខរៀងទី១១ និងមាន ៤ពិន្ទុក្នុងដៃក្រោយឆ្លងកាត់ ៧ប្រកួតឈ្នះ ១ ស្មើ ១ និងចាញ់ ៥ប្រកួត៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
