ក្រុមហ៊ុនផលិតរថយន្តរបស់ប្រទេសចិនបានបង្ហាញខ្លួនជាលើកដំបូង ក្នុងកម្មវិធី Bangkok International Motor Show នៅថ្ងៃចន្ទ (ទី 25 ខែមីនា) នេះ ហើយត្រូវបានគេរំពឹងថា នឹងទទួលបានការចាប់អារម្មណ៍ ក្នុងពិព័រណ៍យានយន្តដ៏ធំនៅប្រទេសថៃ នាសប្តាហ៍នេះ។

ក្រុមហ៊ុនរថយន្តអគ្គិសនី (EV) ដែលទើបបង្ហាញខ្លួនថ្មីនេះ បង្ហាញឲ្យឃើញពីការកើនឡើងនូវការប្រកួតប្រជែង ចំពោះក្រុមហ៊ុនរថយន្តយក្សរបស់ជប៉ុន ដែលបានក្ដោបក្ដាប់ទីផ្សាររថយន្តរបស់ប្រទេសថៃជាយូរមកហើយ។

ក្រុមហ៊ុនផលិតរថយន្តចិន ដូចជា ក្រុមហ៊ុន Geely's Zeekr និងក្រុមហ៊ុន Xpeng Motors គ្រោងនឹងដាក់បង្ហាញរថយន្ត EV ចុងក្រោយបំផុតរបស់ពួកគេដល់អតិថិជនថៃ នៅឯពិព័រណ៍រយៈពេល ១សប្តាហ៍ដែលបើកជាសាធារណៈ នៅថ្ងៃពុធ (ទី២៧ ខែមីនា)។

លោក Mars Chen ប្រធានទីផ្សារដែលកំពុងរីកចម្រើនថ្មី នៅក្រុមហ៊ុន Zeekr បាននិយាយថា ក្រុមហ៊ុនគ្រោងនឹងចូលខ្លួនប្រកួតប្រជែងនៅកម្រិតខ្ពស់ ហើយរំពឹងថា នឹងលក់រថយន្តដល់ទៅ ១.០០០គ្រឿងបន្ទាប់ពីមានការបើកលក់នៅប្រទេសថៃ។

គួរបញ្ជាក់ថា ក្រុមហ៊ុនផលិតរថយន្តរបស់ចិន បានប្តេជ្ញាវិនិយោគទឹកប្រាក់ច្រើនជាង ១,៤៤ពាន់លានដុល្លារ សម្រាប់រោងចក្រផលិតរថយន្តនៅក្នុងមជ្ឈមណ្ឌលផលិតរថយន្តដ៏ធំបំផុតរបស់អាស៊ីអាគ្នេយ៍មួយនេះ។ ជាមួយគ្នានេះ ប្រទេសថៃកំពុងសម្លឹងមើលដល់ការផ្លាស់ប្ដូរប្រហែល ៣០ភាគរយពីផលិតកម្មរថយន្តប្រចាំឆ្នាំរបស់ខ្លួនទៅជារថយន្តអគ្គិសនី (EV) នៅឆ្នាំ២០៣០៕