ឯកឧត្តមសាស្រ្តាចារ្យ ឈាង រ៉ា រដ្ឋមន្រី្តក្រសួងសុខាភិបាល ស្នើឲ្យមន្រី្តក្រោមឱវាទសុខាភិបាលទាំងអស់ ចូលរួមអនុវត្តតាមច្បាប់ស្តីពីរបបសន្តិសុខសង្គម និងលិខិតដ្ឋានគតិយុត្តទាំងអស់ដែលពាក់ព័ន្ឋនឹងរបបសន្តិសុខសង្គមដែលមានជាធរមាន ដើម្បីសំដៅធានាការលើកកម្ពស់សុខុមាលភាព និងអត្ថប្រយោជន៍មន្រ្តីរាជការសាធារណៈ និងអ្នកក្នុងបន្ទុកឱ្យបានត្រឹមត្រូវ និងមានប្រសិទ្ធភាព។

ការថ្លែងរបស់ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល យ៉ាងដូច្នេះ ក្នុងពិធីផ្សព្វផ្សាយស្តីពីការអនុវត្តរបបសន្តិសុខសង្គមផ្នែកថែទាំសុខភាព តាមរបបភាគទានដោយស្ម័គ្រចិត្ត សម្រាប់អ្នកក្នុងបន្ទុកសមាជិក ប.ស.ស ជាមន្ត្រីសាធារណៈជូនដល់មន្ត្រីរាជការក្រោមឱវាទក្រសួងសុខាភិបាល នាព្រឹកថ្ងៃទី២៦ ខែមីនា ឆ្នាំ២០២៤នេះ។ ឯកឧត្តមសាស្រ្តាចារ រដ្ឋមន្រី្ត បានបន្តថា ដើម្បីចូលរួមលើកកម្ពស់ និងការអនុវត្តនូវគោលនយោបាយជាតិគាំពារសង្គមឆ្នាំ២០១៦-២០២៥ កម្មវិធីកំណែទម្រង់រដ្ឋបាលសាធារណៈ កម្មវិធីកំណែទម្រង់ហិរញ្ញវត្ថុសាធារណៈ កម្មវិធីអភិវឌ្ឍន៍ជាតិតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) ក្របខណ្ឌគោលនយោបាយអភិវឌ្ឍន៍ប្រកបដោយចីរភាពកម្ពុជា ២០១៦-២០៣០ ព្រមទាំងគោលនយោបាយ និងផែនការយុទ្ឋសាស្រ្តនានា ដែលបានដាក់ចេញដោយរាជរដ្ឋាភិបាល ក៏ដូចជាការអនុវត្តការងារជំនាញរបស់ខ្លួន ក្នុងនាមក្រសួងសុខាភិបាល បានដាក់ចេញនូវយុទ្ធសាស្រ្តអាទិភាពចម្បងៗទាំង៩ចំណុច សំដៅឆ្ពោះទៅសម្រេចការគ្របដណ្តប់សុខភាពជាសកល ដែលរួមមាន៖ 

១) ការពង្រឹងសមត្ថភាពស្ថាប័ន 

២)ការពង្រឹងសមត្ថភាពប្រព័ន្ធសុខាភិបាល និងសេវាសង្គមកិច្ច 

៣) ការពង្រឹងប្រព័ន្ធផ្តល់សេវាថែទាំសុខភាពប្រកប ដោយនវានុវត្តន៍ 

៤) បង្កើនការអប់រំសុខភាព និងការផ្សព្វផ្សាយ 

៥) ការបង្កើនគុណភាព នៃការបណ្តុះបណ្តាលវិជ្ជាជីវៈវេជ្ជសាស្រ្ត និងអមវេជ្ជសាស្រ្ត 

៦) ការពង្រីកហេដ្ឋារចនាសម្ព័ន្ធរូបវន្ត ពង្រឹងការផ្គត់ផ្គង់ឱសថ បរិក្ខារ និងការបំពាក់ឧបករណ៍វេជ្ជសាស្រ្ត 

៧) ការពង្រឹងកិច្ចសហការពហុវិស័យ និងអន្តរវិស័យ ការចូលរួមរបស់សហគមន៍ និងការលើកកម្ពស់ការទទួលខុសត្រូវរបស់រដ្ឋបាលថ្នាក់ក្រោមជាតិ 

៨) កសាងភាពជាដៃគូរវាងរដ្ឋ និងឯកជន ដៃគូអភិវឌ្ឍន៍ និងអង្គការមិនមែនរដ្ឋាភិបាល រួមទាំងកិច្ចសហប្រតិបត្តិការក្នុងតំបន់ និងសាកលលោក និង ៩) ការអភិវឌ្ឍន៍សុខាភិបាល ឌីជីថល។

ឯកឧត្តមសាស្រ្តាចារ្យ ឈាង រ៉ា បានសង្កត់ធ្ងន់ថា ការអនុវត្ត និងការបន្តពង្រីកវិសាលភាពរបបសន្តិសុខសង្គមបន្ថែមទៀតបាន គឺដោយសារតែមានការចូលរួមសហការអនុវត្តពីសំណាក់ថ្នាក់ដឹកនាំ និងមន្រ្តីរាជការសាធារណៈគ្រប់ក្រសួង ស្ថាប័ន ដៃគូអភិវឌ្ឍជាតិ និយោជក និងកម្មករ-និយោជិត ហើយជាពិសេសដោយមានការចូលរួមគាំទ្រអនុវត្តពីបងប្អូនប្រជាពលរដ្ឋគ្រប់រូបនៅទូទាំងព្រះរាជាណាចក្រកម្ពុជា។ ហេតុដូច្នេះ ដើម្បីជំរុញការអភិវឌ្ឍប្រទេសកម្ពុជា និងក៏ដូចជាប្រព័ន្ធសន្ដិសុខសង្គមនៅកម្ពុជាឱ្យមានភាពរឹងមាំ ឯកឧត្តមសាស្រ្តាចារ្យ រដ្ឋមន្រី្ត សូមសំណូមពរដល់ ឯកឧត្តម លោកជំទាវ លោក លោកស្រី និងមន្រ្តីរាជការ ក្រោមឱវាទទាំងអស់ ដែលមានវត្តមាននៅទីនេះ ដូចតទៅ៖

 ១. ចូលរួមអនុវត្តតាមច្បាប់ស្តីពីរបបសន្តិសុខសង្គម និងលិខិតដ្ឋានគតិយុត្តទាំងអស់ដែលពាក់ព័ន្ឋនឹងរបបសន្តិសុខសង្គមដែលមានជាធរមាន ដើម្បីសំដៅធានាការលើកកម្ពស់សុខុមាលភាព និងអត្ថប្រយោជន៍មន្រ្តីរាជការសាធារណៈ និងអ្នកក្នុងបន្ទុកឱ្យបានត្រឹមត្រូវ និងមានប្រសិទ្ធភាព។

 ២.សូមថ្នាក់ដឹកនាំ និងមន្រ្តីរាជការក្រោមឱវាទក្រសួងសុខាភិបាល ទាំងអស់ជួយផ្សព្វផ្សាយបន្ត និងណែនាំទៅដល់សមាជិកគ្រួសារដែលស្ថិតក្រោមបន្ទុកទៅចុះឈ្មោះជាសមាជិក ប.ស.ស. នៅទីតាំងសាខា ប.ស.ស. ដែលនៅជិតលោកអ្នកបំផុតដើម្បីទទួលបានអត្ថប្រយោជន៍ពីសន្តិសុខសង្គម។

  ជាចុងក្រោយឯកឧត្តមសាស្រ្តាចារ្យ ឈាង រ៉ា សូមកោតសរសើរចំពោះថ្នាក់ដឹកនាំ និងមន្រ្តី បុគ្គលិកក្រសួងការងារ និងបណ្តុះបណ្តាលវិជ្ជាជីវៈ និងបេឡាជាតិសន្ដិសុខសង្គម ហៅកាត់ថា ប.ស.ស. ដែលបានខិតខំយកចិត្តទុកដាក់អនុវត្តនូវតួនាទីភារៈកិច្ចរបស់ខ្លួន សម្រេចបានលទ្ធផលគួរជាទីមោទនៈជូនជាតិ និងប្រជាជន និងសូមកោតសរសើរចំពោះការចូលរួមរបស់ ឯកឧត្តម លោកជំទាវ លោក លោកស្រី ក្នុងការអនុវត្តការងារប្រកបដោយការទទួលខុសត្រូវខ្ពស់ និងបន្ដចូលរួមអនុវត្តតួនាទីរបស់ខ្លួនយ៉ាងសកម្ម ដើម្បីឆ្ពោះទៅសម្រេចបាននូវគោលដៅរបស់រាជរដ្ឋាភិបាលដែលបានដាក់ចេញនាពេលថ្មីៗនេះ៕ អត្ថបទ រដ្ឋា