សៀមរាប៖ គណ:កម្មការអន្តរក្រសួងរួមមាន ក្រសួងអភិវឌ្ឍន៍ជនបទ និងក្រសួង​សេដ្ឋកិច្ច​ហិរញ្ញ​វត្ថុ ដឹកនាំដោយឯកឧត្តម ទ្រី មេង រដ្ឋលេខាធិការ តំណាងដ៏ខ្ពស់ខ្ពស់ឯកឧត្តម ឆាយ ឬទ្ធិសែន រដ្ឋមន្រ្ដីក្រ​សួងអភិវឌ្ឍន៍ជនបទ បានចុះពិនិត្យ និងវាយតម្លៃលើការងារស្តារឡើងវិញ​ផ្លូវ​ក្រាល​ដី​ល្បាយ​ក្រួសចំនួនមួយខ្សែ បន្ទាប់ពីបញ្ចប់ការងារស្ដារឡើងវិញ ដែលរងការខូចខាត​ដោយ​ទឹកជំនន់​នេះ។

ការចុះត្រួតពិនិត្យនិងវាយតម្លៃលើការងារស្ដារឡើងវិញផ្លូវក្រាលដីល្បាយក្រួសនេះនៅថ្ងៃទី២៥ ខែមីនា ឆ្នាំ២០២៤ ស្ថិតនៅស្រុកជីក្រែងខេត្ដសៀមរាប ។

ឯកឧត្តម ទ្រី មេង រដ្ឋលេខាធិការ ក្រសួងអភិវឌ្ឍន៍ជនបទ មានប្រសាសន៍ថា ផ្លូវមួយខ្សែនេះ មានប្រវែង ៧០០០ម៉ែត្រ ទទឹង ៧ម៉ែត្រ សាងសង់លូមូលមុខពីរចំនួន ១កន្លែង និង​លូមូល​មុខ​មួយ​ចំនួន ៣កន្លែង និងផ្លាកឈ្មោះចំនួន ២កន្លែង ស្ថិតនៅភូមិចំបក់ខ្ពស់ និង​ភូមិរូងថ្មី ឃុំល្វែង​ឫស្សី ស្រុកជីក្រែង ខេត្តសៀមរាប អនុវត្តដោយ នាយកដ្ឋានវិស្វកម្ម ក្រសួងការពារជាតិ ប្រើប្រាស់​ថវិការបស់រាជរដ្ឋាភិបាល តាមរយ:ក្រសួងអភិវឌ្ឍន៍ជនបទ។

ផ្លូវក្រាលដីល្បាយក្រួសប្រវែង៧គីឡូម៉ែត្រដែលទើបស្ដារឡើងវិញនេះ មានសារៈសំខាន់ណាស់ សម្រាប់​ប្រជាពលរដ្ឋនៅមូលដ្ឋានក្នុងការដឹកជញ្ជូនទំនិញ​ដំណាំ​កសិកម្ម​គ្រប់ប្រភេ​ទ​របស់​ប្រជាពលរដ្ឋ​នៅ​ជនបទ ជាពិសេសការធ្វើដំណើររបស់សិស្សានុសិស្ស ទៅសាលារៀន។

ឯកឧត្តម ក៏បានអំពាវនាវដល់អាជ្ញាធរមូលដ្ឋាន និងប្រជាពលរដ្ឋ​ឲ្យ​ចូលរួម​ថែ​រក្សា​ផ្លូវ​នេះ​ឲ្យ​បាន​​ល្អ​សម្រាប់អនាគតវែងឆ្ងាយ។ ព្រមទាំងហាមដឹកជញ្ជូនទំនិញធុនធ្ងន់លើសចំនួនកំណត់ដែលធ្វើឲ្យផ្លូវងាយរងគ្រោះផងដែរ។ក្រោយពីស្ដារឡើងវិញរួចរាល់ និងបើកឱ្យប្រើប្រាស់ជាផ្លូវការ ដោយប្រជាពលរដ្ឋ បានសម្ដែង​ការ​សាទរ និង​សប្បាយរីករាយ ព្រោះផ្លូវមួយខ្សែនេះ ជាសរសៃឈាមសម្រាប់ប្រជាពលរដ្ឋធ្វើដំណើរ ព្រោះ​កន្លងមកមានការលំបាកធ្វើដំណើរដោយសារផ្លូវរងនូវការខូចខាតដោយទឹកជំនន់ផងដែរ។

ប្រជា​ពលរដ្ឋនៅក្នុងឃុំល្វែងឬស្សី បាថ្លែងអំណរគុណដល់រាជរដ្ឋាភិបាល ជាពិសេស​ក្រសួង​អភិវឌ្ឍន៍​ជនបទ ដែលបានស្តារឡើងវិញផ្លូវមួយខ្សែនេះ សម្រាប់ឲ្យប្រជាពលរដ្ឋ​ងាយ​ស្រួល​ធ្វើ​ដំណើរ ដែលបានបង្ហាញថា រាជរដ្ឋាភិបាល​មាន​ការ​យក​ចិត្ដ​ទុក​ដាក់​ដល់​ប្រជាពលរដ្ឋ​គ្រប់​ទីកន្លែងមិនថា ទីក្រុងឬជនបទ៕