បច្ចុប្បន្នសិស្សតាមវិទ្យាល័យទាំងនៅរាជធានីភ្នំពេញ ក៏ដូចជានៅតាមបណ្ដា​ខេត្តកំពុង​មមាញឹក​ហ្វឹកហាត់ ចង្វាក់រាំ ក៏ដូចជារបាំនានា សម្រាប់អបអរសាទរពិធីបុណ្យចូលឆ្នាំប្រពៃណីជាតិខ្មែរ។ សាលា​នីមួយៗរៀបចំកម្មវិធីសង្រ្កាន្តសម្រាប់វិទ្យាល័យខ្លួន នៅថ្ងៃផ្សេងៗគ្នា និងមាន​ការ​សម្ដែង​ជាច្រើន​ទៅ​តាមលទ្ធភាពរបស់ខ្លួនផងដែរ។

ជាការកត់សម្គាល់ វិទ្យាល័យជាច្រើនទាំងនៅរាជធានីភ្នំពេញ ក៏ដូចជានៅតាមបណ្ដាខេត្ត រៀប​ចំ​ពិធី​សង្ក្រាន្ត​វិទ្យាល័យ ដើម្បីអបអរសាទរពិធីបុណ្យចូលឆ្នាំប្រពៃណីជាតិខ្មែរ។ សម្រាប់វិទ្យាល័យ ហ៊ុនសែន សេរីភាព ស្ថិតនៅក្រុងតាខ្មៅ ខេត្តកណ្ដាល ក៏នឹងរៀបចំពិធីសង្ក្រាន្តនៅថ្ងៃទី ៦ ខែ​មេសា​ខាង​មុខផងដែរ។

មុនពិធីសង្ក្រាន្តមកដល់ ក្រុមយុវជនចាប់ផ្ដើមតុបតែងលម្អសាលា និងកំពុង​មមា​ញឹកហ្វឹក​ហាត់​ទាំង​ចង្វាក់​រាំ ក៏ដូចជារបាំដែលខ្មែរតែងរាំកម្សាន្ត និងសម្ដែងក្នុងឱកាស​ពិធី​បុណ្យ​ចូលឆ្នាំ​ប្រពៃណី​ជាតិ​ខ្មែរ។ នេះជាការលើកឡើងរបស់ អ្នកគ្រូ នួន ពិសី ជាគ្រូបង្រៀនផ្នែកសិល្បៈដែល​បានចូលរួម​បណ្ដុះបណ្ដាល​ដល់​យុវជនឱ្យចេះពីរបៀបរាំ។

អ្នកគ្រូ ពិតជាសប្បាយចិត្ត ពេលឃើញយុវជនមានការចាប់អារម្មណ៍ និងចូលរួមក្នុងការ​ហ្វឹកហាត់​ជា​ច្រើននូវអ្វីដែលជា កេរដំណែលរបស់ខ្មែរ។

សម្រាប់យុវជន ជាសិស្សដែលបានចូលរួមក្នុងការហ្វឹកហាត់ ទាំងការរាំក៏ដូចជា​ហ្វឹកហាត់​របាំឆៃ​យ៉ាំ និងរបាំត្រុដិ ម្នាក់ៗសុទ្ធតែកើតចេញពីទឹកចិត្តស្រលាញ់នូវវប្បធម៌ប្រពៃណីជាតិខ្មែរ។ ពួក​គេ​សប្បាយ​ចិត្ត​ដែលបានចូលរួមហ្វឹកហាត់ ចូលរួមថែរក្សា ចូលរួមលើកស្ទួយ ផ្សព្វផ្សាយនូវ អត្ត​សញ្ញាណ​ជាតិខ្មែរឱ្យកាន់តែសុសសាយ រុងរឿង។

ឆ្នាំ ២០២៤នេះ តាមបណ្ដាខេត្តក៏នឹងរៀបចំកម្មវិធីសង្ក្រាន្ត ដើម្បីផ្ដល់ភាពសប្បាយរីករាយ ជូន​ប្រជាពលរដ្ឋ ក៏ដូចជាទទួលទេវតាឆ្នាំថ្មីផងដែរ។ ពិធីបុណ្យចូលឆ្នាំបប្រពៃណីជាតិខ្មែរ នៅឆ្នាំ ២០២៤​នេះ នឹងប្រារព្ធធ្វើឡើងក្នុងរយៈពេល ៤ថ្ងៃ ដោយចាប់ផ្ដើមពីថ្ងៃទី ១៣ ដល់ថ្ងៃទី ១៦ ខែមេសា ឆ្នាំ២០២៤៕ អត្ថបទ៖ គឹមហុក