គិតត្រឹមថ្ងៃទី២៦ ខែមីនានេះ ដែលជាថ្ងៃបញ្ចប់នៃទិវាជាតិវិទ្យាសាស្ដ្រ បច្ចេកវិទ្យា និងនវានុវត្ដន៍ លើកទី២ ឆ្នាំ២០២៤ ត្រូវបានមើលឃើញថា ទទួលបានការចាប់អារម្មណ៍ និងមានអ្នក​ចូល​ទស្សនា​យ៉ាងច្រើនកុះករ លើការតាំងបង្ហាញសមិទ្ធផលនានាក្នុងកម្មវិធីនេះ ជា​ពិសេស​បច្ចេកវិទ្យា​ឌីជីថល។

កញ្ញា ក្រង កន្និកា មន្រ្តីផ្នែកជ្រើសរើសនិសិ្សត នៃសាកលវិទ្យាល័យបច្ចេកវិទ្យា និង​វិទ្យាសាស្ត្រ​កម្ពុជា ហៅកាត់ ខេមតិច ក្នុងបទសម្ភាសន៍ជាមួយទូរទស្សន៍ព័ត៌មាន ប៊ីធីវី បានឲ្យដឹងថា គិត​ក្នុង​រយៈ​ពេល ២ថ្ងៃកន្លងទៅនេះ ឃើញមានការចូលរួមពីសាធារណៈជនជាច្រើន ជាពិសេសសិស្ស និស្សិត​មក​ពីសាលារដ្ឋ និងឯកជននានា បាននាំគ្នាស្វែងយល់អំពីកម្មវិធីថ្មីៗ និងបច្ចេកវិទ្យា​ទំនើប​ៗ​​ចុង​ក្រោយដែលមានតាំងបង្ហាញក្នុងកម្មវិធីដ៏មានសារៈសំខាន់មួយនេះ។ កញ្ញា បាន​អំពាវ​នាវ​ឲ្យ​សាធារណៈជន​ទូទៅទាំងអស់ សូមចូលរួមឲ្យបានច្រើនកុះករផងដែរ ដើម្បីលើក​ស្ទួយ​តួនាទី​ដ៏​សំខាន់​ នៃ​វិទ្យាសាស្ត្រ និងបច្ចេកវិទ្យា ក្នុងដំណើរការ​អភិវឌ្ឍ​របស់​កម្ពុជា​ឲ្យ​រី​ក​ចម្រើន​ទៅ​មុខ​បន្ថែម​ទៀត។

សិស្ស និស្សិត ដែលបានចូលរួមក្នុងកម្មវិធីនេះ បាននិយាយថា ពិតជាមាន​អារម្មណ៍​ថា​ប្លែក​ខុស​ពី​កម្ម​វិធីមុនៗ ដោយសារភាពជឿនលឿនរបស់កម្ពុជា បាននិងកំពុងវិវឌ្ឍន៍ទៅមុខឥតឈប់ឈរ ហើយ​ក៏​មិនចាញ់នៅបរទេសដែរ។ បន្ថែមពីនេះទៀត កម្មវិធីនេះ ក៏បានបណ្តុះ​ស្មារតីដ​ល់​ប្រជាពលរដ្ឋ ក៏ដូចជាអ្នកសិក្សាឱ្យស្រឡាញ់វិទ្យាសាស្រ្ត ក៏ដូចជា​ដើម្បី​បង្កើត​នូវ​មូល​ដ្ឋាន​រឹង​មាំ​ផ្នែក​វិទ្យាសាស្ត្រ បច្ចេកវិទ្យា និង នវានុវត្តន៍ លើគ្រប់វិស័យ។

សូមបញ្ជាក់ថា ទិវាជាតិវិទ្យាសាស្ដ្រ បច្ចេកវិទ្យា និងនវានុវត្ដន៍ លើកទី២នេះ មានរយៈពេល ៣ថ្ងៃ ពីថ្ងៃទី២៤ ដល់២៦ ខែមីនា ឆ្នាំ២០២៤ ដែលប្រព្រឹត្តទៅក្រោមប្រធានបទ «សហគ្រាសធុនតូច និង​មធ្យមឆ្ពោះទៅវិទ្យាសាស្ដ្រ បច្ចេកវិទ្យា និងនវានុវត្ដន៍» ក្នុងគោល​បំណង​ជំរុញ​ផលិត​ភាព​របស់​សហ​គ្រាស​ឯកជន តាមរយៈការដាក់បញ្ចូលបច្ចេកវិទ្យា ក្នុងខ្សែច្រវ៉ាក់ផលិតកម្ម ដើម្បីបង្កើន​ប្រសិទ្ធ​ភាព និងគុណតម្លៃបន្ថែម។ ព្រឹត្តិការណ៍នេះ មានស្តង់ប្រមាណជាង ២០០ស្តង់ មកពី​វិស័យ​រដ្ឋ និងឯកជន ដើម្បីចូលរួមបង្ហាញពីបច្ចេកវិទ្យា ស្វ័យប្រវត្តិកម្ម ក៏ដូចជាមាន​ពិព័រណ៍​វិទ្យាសាស្រ្ត​សម្រាប់កុមារ សិស្សានុសិស្ស ដើម្បីបណ្តុះនូវស្មារតីស្រឡាញ់វិទ្យាសាស្រ្ត៕​អត្ថបទ៖ ឈិត បូរ៉ាវី