ភ្នំពេញ ៖ កាកបាទក្រហមកម្ពុជា ក្នុងឱកាសខួបទី១៦១ ទិវាពិភពលោកកាកបាទក្រហម និងអឌ្ឍចន្ទក្រហម ៨ឧសភា ២០២៤នេះ មានសប្បុរសជនជាបន្តបន្ទាប់បាននាំយកសម្ភារៈ និងថវិកាចូលរួមដើម្បីរួមចំណែកទ្រទ្រង់ សកម្មភាពមនុស្សធម៌ របស់សមាគមជាតិមួយនេះឲ្យមាននិរន្តភាព ក្នុងការបំពេញបេសកកម្មជួយសង្គ្រោះ ប្រជាពលរដ្ឋងាយរងគ្រោះ។ ក្រោម អធិបតីភាព លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា នាទីស្នាក់ការកណ្តាល។ 

នាថ្ងៃទី២៦ ខែមីនា ឆ្នំា២០២៤នេះ កាកបាទក្រហមកម្ពុជា ដែលមានហ្លូងម៉ែ នរោត្តម មុនីនាថ សីហនុ ជាព្រះប្រធានកិត្តយស និងសម្តេចកិត្តព្រទ្ឋិបណ្ឌិត ប៊ុន រ៉ានី ហ៊ុនសែនជាប្រធាន មានសប្បុរសជនពីរក្រុមផ្សេងគ្នាបាននាំយកសម្ភារៈ និងថវិកាមួយចំនួនប្រគល់ជូន កាកបាទក្រហមកម្ពុជា ទី១ក្រុមហ៊ុន Future Focus Solutions & Pharma Co.Ltd ឧបត្ថម្ភ   សម្ភារៈវិជ្ជាសង្គ្រោះបឋម ចំនួន៨មុខ សរុបជាថវិកា ៨៧៦១ ដុល្លារអាម៉េរិក, ទី២អគ្គមហាឧបាសិកាពុទ្ធសាសនូបត្ថម្ភក៏ សេង ភីរុណ ឧបត្ថម្ភថវិកាចំនួន ១០០ដុល្លារអាម៉េរិក។ ដើម្បីអបអរសាទរខួបទី១៦១ ទិវាពិភពលោក កាកបាទក្រហម និងអឌ្ឍចន្ទក្រហម ៨ឧសភា ២០២៤ ក្រោមប្រធានបទ៖ “រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ”។ 

ក្នុងជំនួបនោះលោកជំទាវ អគ្គលេខាធិការរងទី១ កាកបាទក្រហមកម្ពុជា បានលើកយកកិច្ចពិភាក្សាអំពីព្រឹត្តិការណ៍ សំខាន់មួយដែល កាកបាទក្រហមកម្ពុជា បាននិងកំពុងគិត និងមានបំណងចង់ឱ្យក្រុមហ៊ុនខាងលើ បន្តការចូលរួមជាមួយ គឺការរៀបចំទិវាពិភពលោកសង្រ្គោះបឋមនៅក្នុងឆ្នាំ២០២៤នេះ។ លោកជំទាវឱ្យដឹងថា កាកបាទក្រហមកម្ពុជា គ្រោងនិង រៀបចំកម្មវិធីនេះឡើង ក្រោមប្រធានបទ៖ «វិជ្ជាសង្រ្គោះបឋមនិងកីឡា» ក្នុងនោះលោកជំទាវអគ្គលេខាធិការរងទី១ ក៏បាន ជម្រាបជូនអំពីខ្លឹមសារ និយមន័យ និងសមិទ្ឋផលមួយចំនួនដែល កាកបាទក្រហមកម្ពុជា បានធ្វើទាក់ទងទៅនិង ការធ្វើឱ្យមានសុខភាពល្អ និងការកសាងភាពធន នៅតាមសហគមន៍ ដើម្បីទប់ស្កាត់ និងការប្រែប្រួលអាកាសធាតុជាដើម។

 បន្ទាប់ពីបានឮពីគោលបំណងរបស់ កាកបាទក្រហមកម្ពុជា ភ្លាមនោះលោក ខួច វរ័ន្ម CEO នៃ ក្រុមហ៊ុន Future Focus Solutions & Pharma Co.Ltd ពិតជាមានការសប្បាយរីករាយ និងប្តេជ្ញាចិត្តនៅក្នុងការចូលរួមសហប្រតិបត្តិការ ជាមួយកាកបាទក្រហមកម្ពុជា ដោយយកដំណឹងនេះ ទៅជួបពិភាក្សាជាមួយនាយកដ្ឋានជំនាញរបស់ ក្រសួងអប់រំយុវជន និងកីឡា ដើម្បីធ្វើយ៉ាងណារៀបចំព្រឹត្តិការណ៍នេះឡើងឱ្យបានល្អប្រសើរ នាសាលពិព័រណ៍កោះពេជ្រ ដោយមានការចូលរួម សហការពីក្រុមនានា សហគ្រិនវ័យក្មេងរបស់កម្ពុជា និងក្រសួងអប់រំ។

ដោយឡែក អគ្គមហាឧបាសិកាពុទ្ធសាសនូបត្ថម្ភក៏ សេង ភីរុណ អាយុ៨៣ឆ្នាំ ដែលបានចូលរួមបរិច្ចាគថវិកាជាមួយ កាកបាទក្រហមកម្ពុជាដែរនោះ ពិតជារំភើបសប្បាយរីករាយណាស់ និងអរគុណដល់កាកបាទក្រហមកម្ពុជា ដែលមានហ្លូងម៉ែ នរោត្តម មុនីនាថ សីហនុ ជាព្រះប្រធានកិត្តយស និងសម្តេចកិត្តព្រទ្ឋិបណ្ឌិត ប៊ុន រ៉ានី ហ៊ុនសែនជាប្រធាន ដែលផ្តល់ឱកាសឱ្យលោកយាយ បានចែករំលែក និងចូលរួមបរិច្ចាគថវិកាមួយចំនួន ជូនកាកបាទក្រហមកម្ពុជា សម្រាប់ក្នុងឱកាសទិវា៨ឧសភាឆ្នាំ២០២៤នេះ ទុកសម្រាប់ជាជំនួយ ទៅដល់ប្រជាពលរដ្ឋ ដែលងាយរងគ្រោះបំផុតដែលត្រូវការឱ្យជួយ៕ ​

អត្ថបទៈ សំ ងីម