ភ្នំពេញ ៖ ឯកឧត្តមទេសរដ្ឋមន្រ្តី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បញ្ជាក់ថា គណៈកម្មាធិការជាតិគ្រប់គ្រងគ្រោះមហន្តរាយ នឹងស្នើរាជរដ្ឋាភិបាលផ្តល់ថវិកាតម្លើងឧបករណ៍ការពាររន្ទះតាមខេត្តដែលតែងប្រឈមគ្រោះមហន្តរាយ។

ថ្លែងក្នុងឱកាសអញ្ជើញដឹកនាំកិច្ចច្រជុំពិគ្រោះយោបល់លើផែនការសកម្មភាពជាតិសម្រាប់កាត់បន្ថយហានិភ័យគ្រោះមហន្តរាយ ឆ្នាំ២០២៤-២០២៨ ដែលមានការចូលរួមពីបណ្តាក្រសួង-ស្ថាប័ន ជាលេខាធិការដ្ឋានគ្រប់គ្រងគ្រោះមហន្តរាយ នៅថ្ងៃទី២៦ ខែមីនា ឆ្នាំ២០២៤ ឯកឧត្តមកិត្តិសង្គហបណ្ឌិត គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានថ្លែងនូវការកោតសរសើរ និងអគុណចំពោះក្រសួង ស្ថាប័នពាក់ព័ន្ធទាំងអស់ដែលបានចូលរួមសហការលើកកម្ពស់ការគ្រប់គ្រងគ្រោះមហន្តរាយ ដើម្បីកាត់បន្ថយហានិភ័យគ្រោះមហន្តរាយ ដោយធ្វើការឆ្លើយតបសង្គ្រោះព្រោះបន្ទាន់ និងការស្ដារឡើងវិញបានទាន់ពេលវេលានៅពេលមានគ្រោះមហន្តរាយផ្សេងៗកើតឡើងកន្លងមកដូចជាទឹកជំនន់ជាដើម។

នាឱកាសនោះ ឯកឧត្តមទេសរដ្ឋមន្រ្តី មានប្រសាសន៍ថា ក្នុងចំណោមបញ្ហាគ្រោះមហន្តរាយដែលបានកើតឡើងក្នុងឆ្នាំ២០២៣ រួមមាន ទាំង ទឹកជំនន់ គ្រោះរាំងស្ងួត និងរន្ទះបាញ់នោះ គណៈកម្មាធិការជាតិគ្រប់គ្រងគ្រោះមហន្តរាយរកឃើញករណីរន្ទះបាញ់ដែលបង្កផលប៉ះពាល់ដល់មនុស្ស សត្វ និងរុក្ខជាតិ សរុបមានជាង១០០ករណី។

ឯកឧត្តមទេសរដ្ឋមន្រ្តី បញ្ជាក់ថា យោងតាមស្ថានភាពដែលបានកើតឡើងក្នុងខេត្តសៀមរាបកាលពីឆ្នាំ២០២៣ មន្រ្តីជំនាញបានតម្លើងអង់តែនជុំវិញភូមិដែលប្រឈមនឹងករណីរន្ទះបាញ់ គឺបង្ហាញពីប្រសិទ្ធភាពដែលជួយកាត់បន្ថយមិនឱ្យមានករណីរន្ទះបាញ់នេះកើនឡើងក្នុងភូមិសាស្រ្តដែលកើតឡើង បើធៀបទៅនឹងឆ្នាំ២០២២។ 

ឆ្លើយតបចំពោះបញ្ហានេះ ឯកឧត្តមទេសរដ្ឋមន្រ្តី អះអាងថា នាពេលខាងមុខនឹងស្នើទៅកាន់រាជរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុ ដើម្បីពីនិត្យអំពីថវិកាក្នុងការផ្តល់នូវគម្រោងតម្លើងអង់តែនការពាររន្ទះបាញ់ដែលជាបញ្ហាប្រឈមមួយ ក្នុងចំណោមបញ្ហាគ្រោះមហន្តរាយនានា ខណៈតាមការព្យាករណ៍របស់ក្រសួងធនធានទឹក និងឧតុនិយម ក្នុងឆ្នាំ២០២៤នេះ ស្ថានភាពដែលបង្កឱ្យមានរន្ទះបាញ់អាចនឹងធ្ងន់ធ្ងរជាងឆ្នាំ២០២៣។

យ៉ាងណាមិញ ឯកឧត្តមទេសរដ្ឋមន្រ្តី បញ្ជាក់ថា ការរៀបចំផែនការសកម្មភាពជាតិសម្រាប់កាត់បន្ថយហានិភ័យគ្រោះមហន្តរាយ២០២៤-២០២៨ គឺជាសមិទ្ធផលថ្មីមួយទៀតរបស់រាជរដ្ឋាភិបាលកម្ពុជា នៅក្នុងអាណត្តិរាជរដ្ឋាភិបាល នីតិកាលទី៧ ក្រោមការដឹកនាំរបស់សម្តេចមហាបវរបតី ហ៊ុន ម៉ាណែត នាយករដ្ឋមន្ត្រី បានបន្តផ្តល់អាទិភាពខ្ពស់លើការគ្រប់គ្រងគ្រោះមហន្តរាយ ដោយធ្វើការឆ្លើយតបលើគ្រប់ទិដ្ឋភាព និងគ្រប់កាលៈទេសៈនៃហេតុការណ៍ គ្រោះមហន្តរាយ ដែលតម្រូវឱ្យរាជរដ្ឋាភិបាលធ្វើអ្វីៗគ្រប់យ៉ាងដែលអាចធ្វើទៅបាន ដើម្បីការពារអាយុជីវិតប្រជាជន ទ្រព្យសម្បត្តិ ដោយមិនទុកចោលប្រជាជនរងគ្រោះណាម្នាក់មិនបានដោះស្រាយឡើយ និងរាល់ហេតុការណ៍ដែលកើតមាន ដូចជា ទឹកជំនន់ រាំងស្ងួត រលំបាក់អគារ អគ្គិភ័យជាដើម។

អត្ថបទ៖ សេក ឧត្តម