ទោចក្រយាន៖ សហព័ន្ធខ្មែរកីឡាទោចក្រយានបានសម្រេចជួលផ្ទះមួយ នៅជើងភ្នំគូលេននាស្រុកបន្ទាយស្រី ខេត្តសៀមរាប ឲ្យក្រុមជម្រើសជាតិបោះជំរំហ្វឹកហាត់ដើម្បីសម្រួចសមត្ថភាព និងបច្ចេកទេសត្រៀមស៊ីហ្គេមឆ្នាំ២០២១ នៅវៀតណាមដែលលើកពេលទៅឆ្នាំ២០២២ ពិសេសត្រៀមធ្វើម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣ នៅកម្ពុជា។
លោក នូ ចំរើន អគ្គលេខាធិការសហព័ន្ធខ្មែរកីឡាទោចក្រយានបានបញ្ជាក់ថា ស្របតាមផែនការយុទ្ធសាស្ត្រសហព័ន្ធ ការប្រមូលផ្ដុំឆ្នាំនេះគឺមានក្រុមជម្រើសជាតិកង់គួក និងកង់ភ្នំ ដោយកង់គួកត្រូវបានសហព័ន្ធបញ្ជូនទៅហាត់នៅប្រទេសបារាំងកាលពីថ្មីៗ ខណៈកង់ភ្នំ សហព័ន្ធបានជ្រើសរើសការបោះជំរំហ្វឹកហាត់នៅខេត្តសៀមរាប ដោយស្ថិតក្នុងបរិបទកូវីដ-១៩ សហព័ន្ធបានជួលផ្ទះមួយឲ្យកីឡាករ-កីឡាការិនីស្នាក់នៅជុំគ្នា ក្រោមការឧបត្ថម្ភផ្ទាល់របស់ប្រធានសហព័ន្ធឯកឧត្តម ប៉ាន សូរស័ក្តិ រដ្ឋមន្ដ្រីក្រសួងពាណិជ្ជកម្ម។ អគ្គលេខាធិការសហព័ន្ធដដែលបន្ដថា ដោយសារខេត្តសៀមរាបត្រូវបានគណៈកម្មាធិការជាតិ CAMSOC អនុម័តជ្រើសរើសជាខេត្តមួយដើម្បីធ្វើម្ចាស់ផ្ទះស៊ីហ្គេមឆ្នាំ២០២៣ លើប្រភេទកីឡាទោចក្រយាន ដូច្នេះសហព័ន្ធមានផែនការជួលផ្ទះឲ្យក្រុមជម្រើសជាតិ បោះជំរំហ្វឹកហាត់រយៈពេលវែងរហូតដល់ឆ្នាំ២០២៣ តែម្ដងដើម្បីពង្រឹងសមត្ថភាព និងបច្ចេកទេសផង និងបន្ស៊ាំទៅនឹងទីលានប្រកួតផង។
គួរបញ្ជាក់ថា ការជួលផ្ទះឲ្យក្រុមជម្រើសជាតិស្នាក់នៅ និងប្រមូលផ្ដុំហ្វឹកហាត់នេះ គឺស្របតាមគោលការណ៍របស់គណៈកម្មាធិការជាតិ CAMSOC និងក្រសួងអប់រំ យុវជន និងកីឡា ក្រោយទទួលបានអនុញ្ញាតពីរាជរដ្ឋាភិបាល ក្នុងការឲ្យក្រុមជម្រើសជាតិក្រុមប្រភេទកីឡា ធ្វើការប្រមូលផ្ដុំហ្វឹកហាត់លក្ខណៈបិទទ្វារ ដោយផ្ដោតសំខាន់នៅពហុកីឡដ្ឋានជាតិមរតកតេជោ និងទីលានមួយចំនួនទៀតដែលរៀបចំដោយសហព័ន្ធសាមី។ ប៉ុន្ដែសម្រាប់កីឡាទោចក្រយានដោយត្រូវធ្វើការហ្វឹកហាត់ខាងក្រៅ មិនអាចប្រមូលផ្ដុំនៅពហុកីឡដ្ឋានជាតិមរតកតេជោបាន សហព័ន្ធក៏សម្រេចជ្រើសរើសខេត្តសៀមរាប និងជួលផ្ទះឲ្យកីឡាករ-កីឡាការិនីស្នាក់នៅបោះជំរំហ្វឹកហាត់ ក្រោមការតាមដាន និងត្រួតពិនិត្យសុវត្ថិភាពយ៉ាងហ្មត់ចត់បំផុត ដើម្បីបង្ការជំងឺកូវីដ-១៩ ជាក់ស្ដែងនៅទីនោះគឺមានសមាជិកសរុប ១០នាក់គឺមានកីឡាករ-កីឡាការិនីពេញសិទ្ធ និងបម្រុង ៩នាក់ រួមទាំងគ្រូបង្វឹកម្នាក់៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
