ក្រុមនគរបាលបង្រ្កាបកុបកម្ម បានប៉ះទង្គិចគ្នាជាមួយក្រុមបាតុកររាប់រយនាក់ដែលបង្ហែក្បួនទៅកាន់ស្ថានទូតអ៊ីស្រាអែល ស្ថិតក្នុងទីក្រុង Amman កាលពីថ្ងៃចន្ទ ដើម្បីបង្ហាញការគាំទ្រដល់ជនប៉ាឡេស្ទីននៅតំបន់ហ្កាហ្សាស្រ្ទីប ។

ក្រុមបាតុករនាំគ្នាស្រែកពាក្យស្លោក និងគ្រវីទង់ជាតិប៉ាឡេស្ទីន និងហ្សកដានី ស្របពេលដែលក្រុមនគរបាលព្យាយាមរុញច្រានពួកគេចេញពីស្ថានទូតអ៊ីស្រាអែលដែលមានការយាមកាមយ៉ាងតឹងរឹង ខណៈសាក្សីនិយាយថា ក្រុមបាតុករជាច្រើននាក់ រងការវាយដុំ ហើយពួកគេមួយចំនួនទៀត ត្រូវបានចាប់ខ្លួន ។

ក្រុមសាក្សីនិយាយផងដែរថា ក្រុមអាជ្ញាធរ បានបាញ់ឧស្ម័នបង្ហូរទឹកភ្នែកដើម្បីបំបែកហ្វូងបាតុករ ។

ស្ថានទូតអ៊ីស្រាអែល ជាទីដែលក្រុមបាតុករបានជួបជុំគ្នាជារៀងរាល់ថ្ងៃនោះ បានក្លាយជាចំណុចផ្ទុះអំពើហិង្សានៃបាតុកម្មប្រឆាំងអ៊ីស្រាអែល ស្របពេលមានភាពចលាចលនៅតំបន់ហ្កាហ្សា និងដែនដីកាន់កាប់ប៉ាឡេស្ទីន ។

ក្រុមអាជ្ញាធរសុខភាពប៉ាឡេស្ទីន និយាយថា មនុស្សប្រហែល ៣២.០០០នាក់ ត្រូវបានសម្លាប់នៅតំបន់ហ្កាហ្សា ចាប់តាំងពីថ្ងៃទី ៧ ខែតុលារហូតមក ពេលដែលអ៊ីស្រាអែលសងសឹកក្រុមហាម៉ាស់ សម្រាប់ការវាយប្រហារសម្លាប់មនុស្ស ១.២០០នាក់របស់ពួកគេ ៕