ចៅក្រមសហរដ្ឋអាមេរិក កាលពីថ្ងៃចន្ទ (ទី២៥ ខែមីនា) បានច្រានចោលបណ្តឹងរបស់លោក Elon Musk ប្រឆាំងនឹងអង្គការមិនរកប្រាក់ចំណេញដែលបានរិះគន់លោកថា បានបណ្ដោយឲ្យមានការកើនឡើងនូវការនិយាយស្អប់ខ្ពើមនៅលើវេទិកាបណ្ដាញសង្គម X របស់លោក ដែលពីមុនឈ្មោះ Twitter។

ចៅក្រមសហព័ន្ធអាមេរិក លោក Charles Breyer ប្រចាំនៅទីក្រុង San Francisco រដ្ឋ California បាននិយាយថា នេះគឺជា «ភស្តុតាង» ដែលក្រុមហ៊ុន X Corp របស់លោក Musk បានប្តឹងមជ្ឈមណ្ឌលប្រឆាំងការស្អប់ខ្ពើមឌីជីថល (CCDH) ដោយសារលោកមិនពេញចិត្តនឹងការរិះគន់របស់ស្ថាប័ននេះ ហើយគិតថា ការស្រាវជ្រាវរបស់មជ្ឈមណ្ឌលនោះ នឹងប៉ះពាល់ដល់កេរ្តិ៍ឈ្មោះរបស់បណ្ដាញសង្គម X និងធ្វើអ្នកផ្សាយពាណិជ្ជកម្មខ្លាចរអា។

លោក Breyer បានសរសេរថា «ក្រុមហ៊ុន X Corp បាននាំយកករណីនេះឡើងមក ដើម្បីឲ្យមានដាក់ទណ្ឌកម្ម ចំពោះ CCDH សម្រាប់ការផ្សព្វផ្សាយរបស់ CCDH ដែលបានរិះគន់លើក្រុមហ៊ុន X Corp ហើយបណ្ដឹងនេះ ប្រហែលជាមានគោលបំណងរារាំងអ្នកដទៃផ្សេងទៀតកុំឲ្យហ៊ានចូលរួមក្នុងការរិះគន់បែបនេះ»។

លោក Breyer បានបន្ថែមថា៖ «វាមិនអាចទៅរួចទេក្នុងការអានពាក្យបណ្តឹង ហើយមិនសន្និដ្ឋានថា ក្រុមហ៊ុន X Corp មានការព្រួយបារម្ភខ្លាំងអំពីសុន្ទរកថារបស់ CCDH ជាជាងការស្វែងវិធីសាស្ត្រប្រមូលទិន្នន័យរបស់ខ្លួននោះ»។

បណ្ដាញសង្គម X នៅក្នុងសេចក្តីថ្លែងការណ៍មួយ បានឲ្យដឹងថា ខ្លួនគ្រោងនឹងប្តឹងឧទ្ធរណ៍។ ការសម្រេចនេះ គឺជាផលប៉ះពាល់ដល់អ្នកមានជាងគេបំផុតទី៣ របស់ពិភពលោក គឺលោក Musk ដែលបានតាំងខ្លួនថា ជាជើងឯកនិយាយដោយសេរីអស់រយៈពេលជាច្រើនឆ្នាំមកនោះ៕