​ប្រណាំង​រថយន្ត៖ ​ជើងឯក​ពិភពលោក ៧​សម័យ Lewis Hamilton បាន​ប្រជែង​ឈ្នះ​ការប្រកួត F1 ក្នុង​ទឹកដី​របស់​ខ្លួន​ទីលាន Silverstone ជា​លើក​ទី​៨ ក្នុង​អាជីព​ក្រោយ​វ៉ា​ផុត Charles Leclerc នៅ​ជិត​ចប់​ការប្រកួត​។

​ការប្រកួត​នេះ​ពេញ​ដោយ​ភាព​អាក់​ស្រពន់ចិត្ត ​សំរាប់​អ្នក​នាំ​មុខ​គេ​ក្នុង​តារាង​ជើងឯក​ពិភព ​លោក Max Verstappen ដែល​ជា​អ្នក​នាំ​មុខ​គេ​ពេល​ចេញ​ដំណើរ បន្ទាប់ពី Lewis Hamilton បង្ក​ឱ្យ​មាន​ការ​ប៉ះទង្គិច​ធ្វើឱ្យ​កីឡាករ​របស់​ក្រុម Red Bull ខ្ទាត​ចេញពី​ផ្លូវ​បុក​នឹង​របង​ដើរ​ចេញពី​ការប្រកួត​។ ​​Hamilton ក្រោយមក​ក៏​ត្រូវ​បាន​ប្រកាស​ពី​ការ​ពិន័យ ១០​ឈប់​នៅ​ក្នុង Pit Stop ១០​វិនាទី​ចំពោះ​កំហុស​ដែល​បង្ក​ឱ្យ​មាន​គ្រោះថ្នាក់​ដល់​កីឡាករ​របស់​ក្រុម Red Bull​។ ​​Max Verstappen ក្រោយ​ចប់​ការប្រកួត​បាន​ហៅ Lewis Hamilton ថា ​ជា​មនុស្ស​ខ្វះ​ការ​គោរព និង​មិន​សក្ដិសម​ជា​អ្នកកីឡា​។

​​ក្រោយ​គ្រោះថ្នាក់​នោះ ការប្រកួត​ត្រូវ​បាន​ផ្អាក​នឹង​ចាប់ផ្ដើម​ឡើងវិញ ​ដោយ​កីឡាករ​របស់ Ferrari, Charles Leclerc ជា​អ្នក​នាំ​មុខ​គេ​រហូតដល់​ជិត​ចប់​ការប្រកួត Hamilton ក៏បាន​វ៉ា​ផុត Charles Leclerc នៅ​នៅ​ចំនុច​ដែល​ប៉ះទង្គិច​ជាមួយ Verstappen​។​ ​​នៅ​ចំពោះ​មុខ​អ្នកគាំទ្រ ១៤​ម៉ឺន​នាក់​នៅ​ទីលាន Silverstone, Lewis Hamilton បាន​មក​ដល់​ទី​ព្រ័ត្រ​មុនគេ​អបអរ​ជ័យ​ជំនះ​នៅ​ទីនេះ​លើក​ទី​៨ ក្នុង​អាជីព​។ ​ជ័យជំនះ​របស់ Hamilton ធ្វើ​ឱ្យ​កាត់បន្ថយ​ការ​នាំ​មុខ​របស់ Max Verstappen មក​ត្រឹម ៨​ពិន្ទុ​ក្នុង​តារាង​ជើងឯក​ពិភពលោក​។​ ​ទីលាន​បន្ទាប់ពី​អង់គ្លេស​នេះ F1 នឹង​បន្ត​ដំណើរ​ទៅ​ទឹកដី​ហុង​គ្រី​នៅ​ថ្ងៃ​ទី​១ ខែ​សីហា​៕

​អត្ថបទ​៖​នាង សុភា​វុ​ធ