អ្នកឃ្លាំមើលសង្គ្រាមម្នាក់ បានរាយការណ៍ថា យុទ្ធជនជីវពលដែលគាំទ្រដោយអ៊ីរ៉ង់ចំនួន ៧នាក់ ត្រូវបានសម្លាប់ នៅក្នុងការសង្ស័យថា ការវាយប្រហាររបស់សហរដ្ឋអាមេរិកទៅលើគោលដៅរបស់អ៊ីរ៉ង់ នៅ ប្រទេសស៊ីរីភាគខាងកើត មុនពេលថ្ងៃរះថ្ងៃអង្គារនេះ។

ការផ្ទុះជាបន្តបន្ទាប់ បានធ្វើឲ្យកក្រើកខេត្ត Deir al-Zour ភាគខាងកើតប្រទេសស៊ីរី ស្របពេលដែលមានវត្តមានយានដ្រូនមិនស្គាល់អត្តសញ្ញាណ ហោះពីខាងលើ។

ការបំផ្ទុះ ត្រូវបានអមដោយការវាយប្រហារតាមអាកាសកាន់តែខ្លាំងសំដៅទៅលើទីតាំងយោធា ដែលជាកម្មសិទ្ធិរបស់កងទ័ពស៊ីរី និងកងជីវពលដែលគាំទ្រដោយអ៊ីរ៉ង់ នៅក្នុងទីក្រុងជាច្រើន រួមទាំងទីក្រុង al-Bukamal, al-Mayadeen និងរដ្ឋធានីនៃខេត្ត Deir al-Zour នេះបើយោងតាមអង្គការឃ្លាំមើលសិទ្ធិមនុស្សស៊ីរី។

ក្រុមឃ្លាំមើលដែលមានមូលដ្ឋាននៅចក្រភពអង់គ្លេស បាននិយាយថា ខ្លួនមិនអាចបញ្ជាក់ពីភាគីដែលទទួលខុសត្រូវចំពោះការវាយប្រហារតាមអាកាសនេះទេ ដោយនិយាយថា ពួកវាអាចធ្វើឡើងដោយយោធាសហរដ្ឋអាមេរិក ដោយមានការចូលរួមពីអ៊ីស្រាអែល។

ក្រុមឃ្លាំមើលនេះ បាននិយាយថា មេបញ្ជាការម្នាក់ ត្រូវបានសម្លាប់នៅក្នុងការវាយប្រហារដោយមិនបានកំណត់អត្តសញ្ញាណគាត់ទេ។

រដ្ឋាភិបាលស៊ីរី និងអាជ្ញាធរអ៊ីរ៉ង់ មិនបានធ្វើការអត្ថាធិប្បាយភ្លាមៗអំពីការវាយប្រហារតាមអាកាស ឬវត្តមានយានដ្រូនទេ ប៉ុន្តែសកម្មជនប្រឆាំង បានលើកឡើងថា ការវាយប្រហារតាមអាកាស ត្រូវបានធ្វើឡើងដោយកងកម្លាំងសហរដ្ឋអាមេរិក។