ក្រសួងការបរទេសកូរ៉េខាងត្បូងនៅថ្ងៃអង្គារនេះ បានសម្តែង «ការព្រួយបារម្ភយ៉ាងខ្លាំង»ជុំវិញការប្រើប្រាស់កាណុងបាញ់ទឹកនាពេលថ្មីៗនេះរបស់ចិនប្រឆាំងនឹងនាវាហ្វីលីពីន ដោយនិយាយថា វាធ្វើឲ្យមានភាពតានតឹង នៅក្នុងសមុទ្រចិនខាងត្បូង និងធ្វើឲ្យខូចដល់សណ្តាប់ធ្នាប់ដែនសមុទ្រ។

ប្រទេសហ្វីលីពីន បានចោទប្រកាន់ឆ្មាំឆ្នេររបស់ប្រទេសចិនថា បានប្រើប្រាស់កាណុងបាញ់ទឹកកាលពីថ្ងៃសៅរ៍ប្រឆាំងនឹងទូកស៊ីវិលដែលផ្គត់ផ្គង់កងទ័ពនៅប្រជុំកោះស្រ្បាតលី (Spratly) ជាប្រជុំកោះដែលគ្មានមនុស្សរស់នៅច្រើននៅក្នុងសមុទ្រចិនខាងត្បូង ដែលជាប្រភពនៃជម្លោះទឹកដីរវាងប្រទេសទាំងពីរជាយូរមកហើយ។

មានការប៉ះទង្គិចជាបន្តបន្ទាប់ក្នុងឆ្នាំមុននេះ។

ប្រទេសហ្វីលីពីន បានធ្វើការតវ៉ាមួយ ហើយបាននិយាយថា ទូកត្រូវបានខូចខាត និងនាវិកមួយចំនួន បានរងរបួស ខណៈដែលទីក្រុងប៉េកាំង បានព្រមានទីក្រុងម៉ានីលឲ្យមានអាកប្បកិរិយាប្រុងប្រយ័ត្ន និងស្វែងរកការសន្ទនា ដោយនិយាយថា ទំនាក់ទំនងរបស់ពួកគេ គឺស្ថិតនៅត្រង់«ផ្លូវបំបែក»។

អ្នកនាំពាក្យក្រសួងការបរទេសទីក្រុងសេអ៊ូល លោក Lim Soo-suk បានប្រាប់សន្និសីទសារព័ត៌មានមួយថា៖យើងមានការព្រួយបារម្ភយ៉ាងខ្លាំងអំពីការប្រើប្រាស់កាណុងបាញ់ទឹកនាពេលថ្មីៗនេះ និងម្តងហើយម្តងទៀត នៅក្នុងសមុទ្រចិនខាងត្បូង»។

«សកម្មភាពទាំងនេះ បង្កើនភាពតានតឹងនៅសមុទ្រចិនខាងត្បូង ដែលជាផ្លូវនាវាចរណ៍អន្តរជាតិដ៏សំខាន់ដែលប្រើប្រាស់ដោយប្រទេសទាំងអស់រួមទាំងកូរ៉េ និងធ្វើឲ្យប៉ះពាល់ដល់កិច្ចខិតខំប្រឹងប្រែង ដើម្បីរក្សាសន្តិភាព ស្ថិរភាព សន្តិសុខ និងសណ្តាប់ធ្នាប់ដែនសមុទ្រដែលផ្អែកលើច្បាប់»។