រដ្ឋមន្រ្តីក្រសួងមហាផ្ទៃទួរគីលោក Ali Yerlikaya និយាយនៅថ្ងៃអង្គារនេះថា ក្រុមអាជ្ញាធរទួរគី បានធ្វើការឃាត់ខ្លួនមនុស្ស ១៤៧នាក់ ដែលសង្ស័យមានទំនាក់ទំនងជាមួយក្រុមរដ្ឋអ៊ីស្លាម អំឡុងប្រតិបត្តិការទូទាំងប្រទេស ។

នៅក្នុងសារបង្ហោះតាមបណ្តាញព័ត៌មានសង្គម X អតីតបណ្តាញព័ត៌មានសង្គម Twitter លោក Yerlikaya និយាយថា ក្រុមនគរបាល ចាប់បានជនសង្ស័យនៅក្នុងប្រតិបត្តិការដំណាលគ្នាទូទាំង ៣០ខេត្ត ។

លោកបន្តថា ជនសង្ស័យត្រូវបានរកឃើញថាបានធ្វើសកម្មភាពក្នុងបណ្តាញរដ្ឋអ៊ីស្លាម ចូលរួមជម្លោះប្រដាប់អាវុធជាមួយក្រុមរដ្ឋអ៊ីស្លាម និងបានជួយផ្តល់មូលនិធិដល់ពួកគេ ។

ការចាប់ខ្លួននេះដែរ បានធ្វើឡើង ក្រោយក្រុមរដ្ឋអ៊ីស្លាមប្រកាសទទួលស្គាល់ការវាយប្រហារសម្លាប់មនុស្ស ១៣៩នាក់ និងមនុស្សយ៉ាងហោច ១៨០នាក់ផ្សេងទៀត រងរបួស នៅសាលប្រគំតន្ត្រី Crocus City ស្ថិតក្នុងទីក្រុងម៉ូស្គូ របស់ប្រទេសរុស្ស៊ី ។

 ប្រធានាធិបតីរុស្ស៊ីលោក Vladimir Putinបាននិយាយកាលពីថ្ងៃចន្ទថា ក្រុមរដ្ឋអ៊ីស្លាមនៅពីក្រោយការវាយប្រហារដ៏អាក្រក់បំផុតនៅរុស្ស៊ី ក្នុងរយៈពេល ២ទសវត្សរ៍កន្លងមកនេះ ។

 លោកថា ចាំបាច់ត្រូវតែរកចម្លើយឲ្យឃើញពីមូលហេតុ ដែលក្រុមភេរវករព្យាយាមរត់ចូលទៅក្នុងប្រទេសអ៊ុយក្រែន ក្រោយប្រព្រឹត្តិឧក្រិដ្ឋកម្មនៅក្នុងសាលប្រគំតន្រ្តី Crocus City និងតើអ្នកណាដែលរង់ចាំទទួលពួកគេនៅទីនោះ ៕