ប្រទេសចិន នៅថ្ងៃអង្គារ (ទី២៦ ខែមីនា) នេះ បានជំរុញឲ្យសហរដ្ឋអាមេរិក និងអង់គ្លេស បញ្ឈប់ការធ្វើនយោបាយលើបញ្ហាសន្តិសុខតាមប្រព័ន្ធអ៊ីនធឺណិត ការបង្កាច់បង្ខូចកេរ្តិ៍ឈ្មោះរបស់ចិន និងដាក់ទណ្ឌកម្មជាឯកតោភាគីលើប្រទេសនេះ។

អ្នកនាំពាក្យក្រសួងការបរទេសចិន លោក Lin Jian បាននិយាយនៅក្នុងសន្និសីទសារព័ត៌មានដែលតែងធ្វើជាប្រចាំថា៖ «វាជាឧបាយកលនយោបាយសុទ្ធសាធ ដើម្បីឲ្យសហរដ្ឋអាមេរិក និងចក្រភពអង់គ្លេស រៀបចំឡើងវិញនូវអ្វីដែលហៅថា ការវាយប្រហារតាមអ៊ីនធឺណិត ដែលធ្វើឡើងដោយប្រទេសចិន និងដាក់ទណ្ឌកម្មបុគ្គល និងអង្គភាពនានារបស់ចិន»។ លោកបានបន្តថា៖ «ប្រទេសចិនមិនពេញចិត្តយ៉ាងខ្លាំង ចំពោះរឿងនេះ ហើយប្រឆាំងនឹងសកម្មភាពបែបនេះយ៉ាងដាច់អហង្ការ»។

គួរបញ្ជាក់ថា មន្ត្រីសហរដ្ឋអាមេរិក និងអង់គ្លេស កាលពីថ្ងៃចន្ទ (ទី២៥ ខែមីនា) បានចាត់វិធានការផ្លូវច្បាប់ ដាក់ទណ្ឌកម្ម និងចោទប្រកាន់ទីក្រុងប៉េកាំងថា បានធ្វើយុទ្ធនាការចារកម្មតាមអ៊ីនធឺណិតយ៉ាងទូលំទូលាយ ដែលត្រូវបានចោទថា ប៉ះពាល់ដល់មនុស្សរាប់លាននាក់។ អាជ្ញាធរពាក់ព័ន្ធនឹងភាគីទាំងសងខាងនៃមហាសមុទ្រអាត្លង់ទិក បានដាក់រហស្សនាមក្រុមចោរព័ត៌មានវិទ្យានោះថា Advanced Persistent Threat Group 31 (ក្រុមគំរាមកំហែងជាប់ជានិច្ចកម្រិតខ្ពស់) ឬ «APT31» ដោយហៅក្រុមនេះថា ជាដៃរបស់ក្រសួងសន្តិសុខរដ្ឋចិន។

ស្ថានទូតចិន ប្រចាំនៅទីក្រុងឡុងដ្រ៍ បានហៅការចោទប្រកាន់នេះថា «ជាការប្រឌិដ្ឋទាំងស្រុង និងការបង្កាច់បង្ខូចដោយចេតនា»។ លោក Lin បាននិយាយថា៖ «នៅមុននេះ ប្រទេសចិនបានធ្វើការបំភ្លឺផ្នែកបច្ចេកទេស និងឆ្លើយតបទៅនឹងព័ត៌មានពាក់ព័ន្ធនឹងក្រុម APT31 ដែលដាក់ដោយភាគីអង់គ្លេស។ វាបង្ហាញយ៉ាងច្បាស់ថា ភស្តុតាងដែលផ្តល់ដោយភាគីអង់គ្លេស គឺមិនគ្រប់គ្រាន់នោះទេ ហើយការសន្និដ្ឋានដែលពាក់ព័ន្ធ គឺខ្វះវិជ្ជាជីវៈ»។ លោកបានបន្ថែមថា៖ «ជាការសោកស្ដាយដែលភាគីអង់គ្លេសមិនបានឆ្លើយតបបន្ថែមទៀត ចាប់តាំងពីពេលនោះមក»។

អង់គ្លេសក៏បានចោទប្រកាន់ពួកចោរព័ត៌មានវិទ្យាចិនថា បានព្យាយាមលួចចូលគណនីអ៊ីម៉ែល (សារអេឡិចត្រូនិក) របស់សមាជិកសភាអង់គ្លេសដែលរិះគន់ចិន៕