សម្ព័ន្ធប្រឆាំងរបស់វ៉េណេហ្ស៊ុយអេឡា ត្រូវបានទុកចោល ដោយពុំមានបេក្ខជន នៅក្នុងការប្រជែងសម្រាប់ការបោះឆ្នោតប្រធានាធិបតីនៅខែកក្កដា បន្ទាប់ពីលោកស្រី Corina Yoris ដែលមានវ័យ៨០ឆ្នាំ មិនអាចចុះឈ្មោះ មុនពេលផុតកំណត់កាលពីថ្ងៃចន្ទ។

លោក Yoris ត្រូវបានតែងតាំងជាបេក្ខភាពប្រឆាំងកាលពីសប្តាហ៍មុនដោយលោកស្រី Maria Corina Machado ដែលបានឈ្នះការប្រកួតជ្រើសរើសបេក្ខភាពគណបក្សប្រឆាំងដោយការភ្លូកទឹកភ្លូកដី កាលពីឆ្នាំមុន ដើម្បីឈរឈ្មោះប្រជែងជាមួយប្រធានាធិបតី ដែលកំពុងកាន់អំណាច លោក នីកូឡាស ម៉ាឌូរ៉ូ (Nicolas Maduro) ប៉ុន្តែត្រូវបានហាមឃាត់មិនឲ្យកាន់តំណែងសាធារណៈ។

ប្រធានសម្ព័ន្ធប្រឆាំង លោក Omar Barboza បាននិយាយថា គណបក្សប្រឆាំងមិនអាចចូលទៅកាន់ប្រព័ន្ធអនឡាញរបស់អាជ្ញាធររៀបចំការបោះឆ្នោត ដើម្បីចុះឈ្មោះលោកស្រី Yoris ជាបេក្ខជននោះទេ។

លោក Barboza បាននិយាយនៅព្រឹកថ្ងៃអង្គារនេះថា៖«ពួកគេមិនអនុញ្ញាតឲ្យយើងចូលទេ»។

ទាំងក្រសួងព័ត៌មានរបស់វ៉េំណេហ្ស៊ុយអេឡា និងស្ថាប័នរៀបចំការបោះឆ្នោត CNE របស់ខ្លួនភ្លាមៗ មិនបានឆ្លើយតបទៅនឹងសំណើរបស់សារព័ត៌មានរ៉យទ័រសម្រាប់ការធ្វើអត្ថាធិប្បាយអំពីថា តើលោកស្រី Yoris មិនមានសិទ្ធិឈរឈ្មោះទេឬ?។

មនុស្សពីរនាក់ជិតស្និទ្ធនឹងលោកស្រី Machado ត្រូវបានចាប់ខ្លួនកាលពីសប្តាហ៍មុន ដែលបង្កឲ្យមានការតវ៉ាពីទីក្រុងវ៉ាស៊ីនតោន ដែលបានព្រមានរួចហើយថា ខ្លួននឹងអនុញ្ញាតឲ្យការបន្ធូរបន្ថយទណ្ឌកម្មប្រេងនឹងផុតកំណត់ នៅក្នុងខែមេសា ប្រសិនបើរដ្ឋាភិបាលសង្គមនិយមរបស់លោកម៉ាឌូរ៉ូ មិនអនុញ្ញាតឲ្យមានការបោះឆ្នោតដោយសេរីនិងយុត្តិធម៌ទេ។