តុលាការក្រុងមូស្គូបានប្រាប់ឲ្យដឹងថា ការឃុំខ្លួនមុនការកាត់ក្ដីលើអ្នកសារព័ត៌មានរបស់ Wall Street Journal គឺលោក Evan Gershkovich ដែលត្រូវបានចោទប្រកាន់ពីបទចារកម្មដោយរុស្ស៊ី ត្រូវបន្តរយៈពេល ៣ខែ ពោលគឺចាប់ពីថ្ងៃអង្គារ ទី២៦ ខែមីនា រហូតដល់ថ្ងៃទី៣០ ខែមិថុនា។

លោក Gershkovich ឯកសាររបស់លោក និងរដ្ឋាភិបាលសហរដ្ឋអាមេរិក សុទ្ធតែបដិសេធយ៉ាងដាច់អហង្ការ ចំពោះការចោទប្រកាន់ ដែលមានការដាក់ទោសជាប់ពន្ធនាគាររហូតដល់ ២០ឆ្នាំ។

សវនាការនៅថ្ងៃអង្គារនេះ មិនអនុញ្ញាតឲ្យមានប្រព័ន្ធផ្សព្វផ្សាយនោះទេ ប៉ុន្តែការិយាល័យតុលាការក្រុងមូស្គូ បានផ្សព្វផ្សាយរូបថត និងវីដេអូខ្លីមួយដែលបង្ហាញពីលោក Gershkovich ឈរក្នុងប្រអប់កញ្ចក់ នៅក្នុងបន្ទប់តុលាការ។ រូបលោកហាក់ដូចជាមិនមានភាពតឹងតែងឡើយ ហើយថែមទាំងមានស្នាមញញឹមទៀតផង។

ថ្ងៃសុក្រ (ទី២៩ ខែមីនា) នឹងគម្រប់ខួបលើកទី១ នៃការចាប់ខ្លួន លោក Gershkovich នៅតំបន់ Urals នៃទីក្រុង Yekaterinburg។ លោកមិនទទួលបានជោគជ័យនោះទេ សម្រាប់ការប្ដឹងឧទ្ធរណ៍ម្តងហើយម្តងទៀតប្រឆាំងនឹងការឃុំខ្លួនរបស់លោក ដែលត្រូវបានពន្យារជាច្រើនដងមកហើយ។ យ៉ាងណាក្ដី នៅមិនទាន់មានកាលបរិច្ឆេទត្រូវបានកំណត់សម្រាប់ការជំនុំជម្រះក្ដីលើរូបលោកនោះឡើយ។

ឯកអគ្គរដ្ឋទូតសហរដ្ឋអាមេរិក លោកស្រី Lynne Tracy បានទៅសួរសុខទុក្ខអ្នកសារព័ត៌មានវ័យ ៣២ឆ្នាំរូបនេះ នៅក្នុងពន្ធនាគារ Lefortovo នៃទីក្រុងមូស្គូ កាលពីសប្តាហ៍មុន។ ស្ថានទូតប្រចាំនៅរុស្ស៊ីនេះ បាននិយាយនាពេលនោះថា «លោក Evan នៅតែរាងកាយរឹងមាំ និងស្វាហាប់ ប៉ុន្តែវាជាសោកនាដកម្មដែលរូបលោកកំពុងរង់ចាំការកាត់ទោសពីបទឧក្រិដ្ឋដែលខ្លួនមិនបានប្រព្រឹត្តសោះ»៕