ទិវាជាតិវិទ្យាសាស្ដ្រ បច្ចេកវិទ្យា និងនវានុវត្ដន៍ លើកទី២ ឆ្នាំ២០២៤ រយៈពេល៣ថ្ងៃ​ត្រូវបាន​បញ្ចប់​ដោយភាពជោគជ័យ និងល្អប្រសើរ ខណៈមានអ្នកចូលរួមទស្សនារហូតជាង ៣ម៉ឺននាក់ ក្នុង​នោះមានសាធារណជនទូទៅប្រមាណ ៣៨% ម្ចាស់សហគ្រាសធុនតូច និងមធ្យមប្រមាណ ៣៥% សិស្សនិស្សិត ១៧% និងអ្នកស្រាវជ្រាវ និងស្រឡាញ់វិស័យវិទ្យាសាស្រ្តប្រមាណ១០%។

នៅក្នុងពិធីបិទទិវាជាតិវិទ្យាសាស្ដ្រ កាលពីរសៀលថ្ងៃទី២៦ ខែមីនាកន្លងទៅ ឯកឧត្តម ហែម វណ្ឌី រដ្ឋមន្រ្តីក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្ដន៍ មានប្រសាសន៍ថា ក្នុង​ការ​ជំរុញ​ការចូលរួមកម្មវិធីនេះ ក្រសួងបានរៀបចំ​មធ្យោបាយ​ដឹកជញ្ជូន​សម្រាប់​ម្ចាស់​សហ​គ្រាស​ធុន​តូច និងមធ្យមមកពីទូទាំងប្រទេស និងសិស្សានុសិស្ស​មក​ពី​តាម​សាលា​នានា​ក្នុង​រាជ​ធានី​ភ្នំពេញ ​មកកាន់ស្តង់ពិព័រណ៍ ដោយបានផ្តល់ជូនអ្នក​ចូលរួម​ទាំង​នោះ​នូវ​បទ​ពិសោធន៍​ទំនាក់ទំនង​ផ្ទាល់​ជាមួយ​វិទ្យាសាស្ត្រ និងបច្ចេកវិទ្យាទំនើប។ បន្ថែមពីនេះ ដើម្បីបណ្តុះ​ទឹកចិត្ត​ឱ្យ​សិស្សានុសិស្ស ​បានចូលរួមតាមរយៈការលេងហ្គេមអប់រំ និងសកម្មភាពវិទ្យាសាស្ត្រនានា។

លោក ទេព សុវិជ្ជា ប្រធានផ្នែកស្រាវជ្រាវ នៃក្រុមហ៊ុន AI Farm ដែលចូលរួម​តាំង​បង្ហាញ​ផលិត​ផល​ក្នុង​កម្មវិធីនេះលើកឡើងថា លោកពិតជាសប្បាយចិត្ត និងរីករាយដែល​ឃើញ​មាន​ការ​ចាប់​អារម្មណ៍​យ៉ាង​ច្រើនពីសាធារណៈជនទូទៅ ជាពិសេសការទទួលយកនូវបទពិសោធន៍ថ្មីៗ តាមរយៈ​បច្ចេកវិទ្យាឌីជីថល ខណៈ​ពិភព​លោក​បាន​ផ្លាស់ប្ដូរ​ទម្លាប់​នៃ​ការ​ធ្វើ​អាជីវកម្ម​តាម​បែប​ប្រពៃណី ដោយងាកមកធ្វើអាជីវកម្មតាមបែបបច្ចេកវិទ្យាឌីជីថលវិញ។

ចំណែក​លោក រ៉ាចា ឃូហ្គេន ណាដារ៉ាចាត (Raja khungan Nadarajah) ប្រធាន​ទំនាក់​ទំនង​នៃ​ក្រុមហ៊ុន MVA និងលោក ថង់ ម៉េងហួត ប្រធានផ្នែកធនធានមនុស្សនៃក្រុមហ៊ុន វីនឺសជជី ខេមបូឌា បាននិយាយថា ដ្បិតទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍លើកទី២ បាន​ឈាន​ដល់​ទី​បញ្ចប់ ប៉ុន្តែសង្ឃឹមថា នឹងរួមចំណែកកាន់តែប្រសើរដល់ការអភិវឌ្ឍសង្គម-សេដ្ឋកិច្ច​របស់​កម្ពុជា តាមរយៈការដាក់តាំងបង្ហាញសមិទ្ធផលថ្មីៗ ស្តង់ដារ និងទំនើបចុងក្រោយបំផុត ដែល​ជំរុញ​ឲ្យ​អ្នកប្រើប្រាស់បានយល់ដឹងអំពីបច្ចេកវិទ្យាឌីជីថល ក្នុងការរស់នៅប្រចាំថ្ងៃ ក៏​ដូចជា​ការ​ប្រកប​អាជីវកម្មនានាជាដើម។

សូមជម្រាបថា ទិវាជាតិវិទ្យាសាស្ដ្រ បច្ចេកវិទ្យា និងនវានុវត្ដន៍ លើកទី២នេះ បានរៀប​ចំ​ឡើង​រយៈ​ពេល​៣​ថ្ងៃចាប់ពីថ្ងៃទី២៤ ដល់២៦ ខែមីនា ឆ្នាំ២០២៤ ក្រោមប្រធានបទ «សហគ្រាសធុនតូច និង​មធ្យម​ឆ្ពោះទៅវិទ្យាសាស្ដ្រ បច្ចេកវិទ្យា និងនវានុវត្ដន៍» ក្នុងគោល​បំណង​ជំរុញ​ផលិតភាព​របស់​សហគ្រាស​ឯកជនតាមរយៈការដាក់បញ្ចូលបច្ចេកវិទ្យា ក្នុងខ្សែច្រវ៉ាក់ផលិតកម្ម ដើម្បី​បង្កើន​ប្រសិទ្ធ​ភាព និងគុណតម្លៃបន្ថែម៕ អត្ថបទ៖ ឈិត បូរ៉ាវី