នាអំឡុងពេលឱកាសថ្ងៃឈប់សម្រាក ពិធីបុណ្យចូលឆ្នាំថ្មីប្រពៃណីខ្មែរខាងមុខនេះ អ្នកបម្រើការងារតាមបណ្ដាក្រុមហ៊ុន រោងចក្រ សហគ្រាស មានឱកាសឈប់សម្រាករហូតដល់៤ថ្ងៃ សំគាល់ឃើញថា មានពលរដ្ឋខ្មែរ ដែលជាភ្ញៀវទេសចរជាតិជាច្រើន កក់កញ្ចប់ទេសចរណ៍នៅតាមបណ្តាក្រុមហ៊ុនការីទេសចរណ៍ ដើម្បីធ្វើដំណើរកម្សាន្តទេសចរណ៍ទៅប្រទេស ហើយក៏មានភ្ញៀវអន្តរជាតិមួយចំនួនផងដែរបានកក់កញ្ចប់ទេសចរណ៍មកទស្សនាកម្ពុជាផងដែរ។
បើតាមលោក រឿង ភូមិរ៉ា ប្រធានក្រុមហ៊ុនការីទេសចរណ៍ តាខ្មៅ ហូលីដេ ថ្លែងប្រាប់BTVនៅថ្ងៃទី២៧ ខែមីនានេះ ថ្លែងថា នៅក្នុងអំឡុងថ្ងៃបុណ្យចូលឆ្នាំថ្មី ប្រពៃណីខ្មែរ ក្រុមហ៊ុនបានទទួលបានភ្ញៀវទេសចរជាច្រើនក្រុម បានកក់កញ្ចប់ទេសចរណ៍ចេញដើរកម្សាន្តនៅក្រៅប្រទេស ហើយក៏មានភ្ញៀវអន្តរជាតិជាច្រើនផងដែរ បានកក់កញ្ចប់ទេសចរណ៍ពីក្រៅប្រទេសមកទស្សនាកម្ពុជាច្រើនផងដែរ។ លោកបានបញ្ជាក់ថា សម្រាប់កញ្ចប់ទេសចរណ៍នាំភ្ញៀវទេសចរខ្មែរទៅដើរកម្សាន្តនៅក្រៅប្រទេស មកដល់នេះ ក្រុមហ៊ុនបិទទទួលការកក់ ដោយឡែកកញ្ចប់ទេសចរណ៍ធ្វើដំណើរកម្សាន្តនៅក្នុងប្រទេសវិញ គឺក្រុមហ៊ុន នៅតែបន្តទទួលកក់ជាធម្មតា។
លោក ហង្ស សំបូរ ប្រធានក្រុមហ៊ុនVR Smile ថ្លែងថា ក្នុងអំឡុងថ្ងៃឈប់សម្រាកបុណ្យចូលឆ្នាំថ្មីប្រពៃណីខ្មែរ ក្រុមហ៊ុនបានទទួលភ្ញៀវខ្មែរជាច្រើនក្រុម បានទិញកក់កញ្ចប់ទេសចរណ៍ទៅទស្សនាប្រទេសចិន វៀតណាម កូរ៉េ ជាច្រើន ហើយនៅពេលនេះក្រុមហ៊ុន នៅតែបន្តទទួលបានភ្ញៀវខ្មែរជាច្រើនហូរហែរទៀត បានទូរសព្ទ និងឆាក កក់កញ្ចប់ទេសចរណ៍ធ្វើដំណើរកម្សាន្តទៅក្រៅប្រទេស។
លោកស្រី ឆាយ សៀវលីន ប្រធានសមាគមន៍ទីភ្នាក់ងារទេសចរណ៍កម្ពុជា CATA បានថ្លែងថា អំឡុងពេល កម្ពុជា ប្រារព្វពិធីបុណ្យចូលឆ្នាំប្រពៃណីខ្មែរ ពលរដ្ឋមានឱកាសឈប់សម្រាកច្រើនថ្ងៃនេះ សំគាល់ឃើញថា មានពលរដ្ឋខ្មែរច្រើនលើសលប់បាននាំគ្នាកក់កញ្ចប់ទេសចរណ៍ដើរទស្សនាកម្សាន្តជាក្រុមទៅក្រៅប្រទេស ច្រើនជាង ភ្ញៀវទេសចរអន្តជាតិកក់កញ្ចប់ទេសចរណ៍មកដើរទស្សនាកម្ពុជា។
អ្នកនាំក្រសួងទេសចរណ៍ ឯកឧត្តម តុប សុភ័ក ថ្លែងថា ក្នុងរយៈពេល០២ខែ ដើមឆ្នាំ២០២៤ ទេសចរអន្តរជាតិ ៩៩ ម៉ឺននាក់ កើនឡើង ១៨% ហើយ ទេសចរជាតិចេញក្រៅ៖ ២៦ ម៉ឺននាក់ ថយចុះ ៣,៩%ធៀបរយៈពេលដូចគ្នាឆ្នាំ២០២៣ ហើយអាចនឹងកើនវិញនៅក្នុងរយៈពេល២ខែបន្ទាប់នេះ៕ អត្ថបទ៖ ស៊ុមសុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
