ឯកឧត្តមសាស្ត្រាចារ្យ ឈាង រ៉ា រដ្ឋមន្រី្តក្រសួងសុខាភិបាល បានស្នើមន្ត្រីសុខាភិបាល នៃមនី្ទរ​ពេទ្យ​កុមារជាតិ យកចិត្តទុកដាក់ឲ្យបានខ្ពស់លើការគ្រប់គ្រង និងការផ្តល់សេវាជូនដល់ប្រជាជន ពិសេសកុមារ និងស្រី្តឲ្យកាន់តែប្រសើរឡើង។

ការថ្លែងរបស់ឯកឧត្តមសាស្រ្តាចារ្យ ឈាង រ៉ា យ៉ាងដូច្នេះ ក្នុង​ពិធី​បើក​សន្និបាត​បូក​សរុប​ការងារ​សុខាភិបាល​ឆ្នាំ២០២៣ និងលើកទិសដៅឆ្នាំ២០២៤ លើកទី១០ របស់មន្ទីរពេទ្យកុមារជាតិ, នា​ព្រឹក​ថ្ងៃទី២៧ ខែមីនា ឆ្នាំ២០២៤នេះ។ ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួង​សុខាភិបាល​ បានថ្លែងទៀតថា ទោះបីយើងបានមើលឃើញវឌ្ឍនភាព សមិទ្ធផលរបស់​មនី្ទរ​ពេទ្យ​លើ​វិស័យ​សុខាភិបាល ពីមួយឆ្នាំទៅមួយឆ្នាំមានការរីកចម្រើន គួរឲ្យកត់សម្គាល់​ដែល​ទាមទារ​ឲ្យ​យើង​ត្រូវ​តែបន្តខិតខំប្រឹងប្រែងជាបន្តទៅទៀត។ នៅពេលនេះឯកឧត្តមសាស្រ្តាចារ្យ រដ្ឋមន្រី្ត បាន​ផ្តល់​នូវទស្សនទានមួយចំនួនដល់សមាជិក សមាជិកា ក្នុងសន្និបាតទាំងមូល ដើម្បី​ជា​ធាតុ​ចូល​ពិចារណា​ក្នុងការរៀបចំផែនការទិសដៅការងារសម្រាប់ឆ្នាំ២០២៤ ដែលមានជាអាទិ៍​ដូចខាង​ក្រោម​៖ ត្រូវពង្រីកហេរដ្ឋារចនាសម្ព័ន្ធមនី្ទរពេទ្យ ដោយកែលម្អអាគារ ស្ថានភាព​បរិស្ថាន​ជុំវិញ​មនី្ទរ​ពេទ្យឲ្យកាន់តែប្រសើរឡើងថែមទៀត, ពង្រីកលើកកម្ពស់ក្រមសីលធម៌វិជ្ជាជីវៈ និង​បណ្តុះ​បណ្តាល​សមត្ថភាពបន្ថែមជូនដល់បុគ្គលិក មន្ត្រីរាជការ ឲ្យកាន់តែប្រសើរឡើង​សមស្រប​ទៅ​តាម​និយាម​ស្តង់ដា​អន្តរជាតិ, ការពង្រឹង ការគ្រប់គ្រងបំពាក់បន្ថែមនូវឧបរកណ៍ សម្ភារៈបរិក្ខារ​វេជ្ជសាស្រ្ត ឱសថ, យកចិត្តទុកដាក់ឲ្យបានខ្ពស់លើការគ្រប់គ្រង និង​ការផ្តល់​សេវា​ជូន​ដល់​ប្រជាជន ពិសេសកុមារ និងស្រី្តឲ្យកាន់តែប្រសើរឡើង, ពង្រឹងសាមគ្គីភាព វិន័យក្នុង​ពេល​បំពេញ​ការងារ និងការយាមប្រចាំការ ក្នុងការផ្តល់សេវា២៤ម៉ោង លើ២៤ម៉ោង, ការលើក​កម្ពស់​គុណភាព សុវតិ្ថភាពក្នុងការព្យាបាលជំងឺ និងការពង្រឹង គ្រប់គ្រងអភិបាល​កិច្ច​លើ​គ្រប់​ផ្នែកទាំងអស់​របស់មនី្ទរពេទ្យ។

ជាចុងក្រោយឯកឧត្តមសាស្រ្តាចារ្យ ឈាង រ៉ា សូមសម្តែងការកោតសរសើរដល់ថ្នាក់ដឹកនាំ មន្ត្រី បុគ្គលិក លោកគ្រូពេទ្យ អ្នកគ្រូពេទ្យទាំងអស់នៃមនី្ទរពេទ្យកុមារជាតិ ដែល​បាន​ខិតខំ​ផ្តល់​សេវា​ថែ​ទាំ​ព្យាបាលអ្នកជំងឺទូទៅ ជាពិសេសស្រី្ត កុមារ ដោយស្មារតីទទួលខុសត្រូវ។

បើតាមឯកឧត្តមវេជ្ជបណ្ឌិត ញឹប អង្គាបុស្ស នាយកមនី្ទរពេទ្យកុមារជាតិ បានឲ្យដឹងថា ការថែទាំ និងព្យាបាល ឆ្នាំ២០២៣ មន្ទីរពេទ្យ​ទទួល​បាន​ចំនួន​អតិថិជន​កើន​ឡើង​បើ​ធៀប​ទៅ​នឹង​ឆ្នាំ​២០២២ ជាក់ស្តែង៖ ការពិនិត្យពិគ្រោះជំងឺក្រៅ ឆ្នាំ២០២២ មាន១៦៧.១៧៦ករណី ឆ្នាំ​២០២៣ មាន១៩២.៣៦៤ករណី គឺបានកើនឡើងចំនួន ១៥% អ្នកជំងឺសម្រាកពេទ្យ ឆ្នាំ​២០២២ មាន២៤.៥៣៥ករណី ឆ្នាំ២០២៣ មាន៣៧.៣៦៧ ករណី គឺ បានកើន​ឡើង​ចំនួន​៥២%​ ឆ្នាំ២០២២ មន្ទីរពេទ្យមានចំនួន៣៥០គ្រែ អត្រាប្រើប្រាស់៨៧% ឆ្នាំ២០២៣ មន្ទីរ​ពេទ្យ​មាន​ចំនួន​៤០០គ្រែ អត្រាប្រើប្រាស់១៣២។ ចំណោមជំងឺសម្រាកពេទ្យ មានអាទិភាព​ចំនួន​៥​ក្នុង​ឆ្នាំ​២០២៣ គឺជំងឺរលាកបំពង់ក មាន៥.៥០៣ករណី, ជំងឺគ្រុនឈាម មាន៥.៣៨២ករណី, ជំងឺ​រលាក​​កូនទងសួតមាន៣.៨៩២ករណី, ជំងឺរាកគ្រប់ប្រភេទ មាន៣.២៥០ករណី និងជំងឺ​ទារក​មិន​គ្រប់​ខែ មាន៥៣៣៦ករណី៕ អត្ថបទ រដ្ឋា