​បាល់ទាត់៖ ​ទោះបី​ឈាន​ដល់​វ័យ ៣៨​ឆ្នាំ​ក៏ដោយអតីត​ខ្សែការពារ Barcelona, Dani Alves ត្រូវ​បាន​កោះ​ហៅ​ចូល​ក្រុម​យុវជន​អាយុ​ក្រោម ២០​ឆ្នាំ​ប្រេ​ស៊ី​ល​ដើម្បី​ចូលរួម​ការប្រកួត​វិញ្ញាសា​បាល់ទាត់​ នៅ​ព្រឹត្តិការណ៍​អូឡាំពិក​រដូវ​ក្តៅ​ទីក្រុង​តូ​ក្យូ​ប្រទេស​ជប៉ុន​។

​​ក្រុម​នីមួយៗ​មាន​សិទ្ធិ​ជ្រើសរើស​កីឡាករ​លើស​អាយុ ៣​នាក់​ដោយ​ក្រៅពីនោះ​កីឡាករ​ដែល​ចូលរួម​ត្រូវ​បាន​ថ្ងៃកំណើត​ក្រោយ​ថ្ងៃ​ទី​១ ខែ​មករា ​ឆ្នាំ​១៩៩៧ ទាំងអស់​។ ​Dani Alves បច្ចុប្បន្ន​មាន​វ័យ ៣៨​ឆ្នាំ​ពោល​គឺ​ប្អូន​គ្រូ U-20 ប្រេ​ស៊ី​ល​តែ ៣​ឆ្នាំ​ប៉ុណ្ណោះ​។ ​គ្រូ​បង្វឹក​ក្រុម​យុវជន​ប្រេ​ស៊ី​ល Andre Jardine បាន​និយាយ​ថា មូលហេតុ​ដែល​លោក​ជ្រើសរើស Dani Alves ដែល​មាន​វ័យ​ទៅ ៣៨​ឆ្នាំ​ទៅ​ហើយ​នោះ​គឺ Alves មាន​ភាពជា​អ្នកដឹកនាំ គេ​ជា​មនុស្ស​ដែល​កីឡាករ​យុវជន​ប្រេ​ស៊ី​ល​ជាច្រើន​គោរព ណាមួយ​អតីត​កីឡាករ​របស់ Sevilla រូប​នេះ​ក៏​មិនដែល​មាន​វត្ត​មាននៅ​ព្រឹត្តិការណ៍​អូឡាំពិក​ដែរ​។​

​​Dani Alves គឺជា​កីឡាករ​ដែល​ជោគជ័យ​បំផុត​ម្នាក់​ក្នុង​ជំនាន់​របស់​គេ​ ដោយ​ធ្លាប់​ឈ្នះ​ជើងឯក អំឡុង​ពេល​អាជីព​ជាមួយ Sevilla, Barcelona, Juventus និង Paris Saint Germain​។​ ​​ជាមួយ​ក្រុម​ជំរើស​ជាតិ​ប្រេ​ស៊ី​ល Dani Alves ធ្លាប់​ឈ្នះ​ជើងឯក Copa America ២​លើក និង FIFA Confederations Cup ២លើក​។ ​នៅ​ពេល​នេះ Dani Alves មានឱកាស​ដើម្បី​ស្វែងរក​មេដាយ​មាស​អូឡាំពិក ១​គ្រឿង​ទៀត​មុន​បិទ​បញ្ចប់​អាជីព​ជា​កីឡាករ​របស់​ខ្លួន​។ ​វិញ្ញាសា​បាល់ទាត់​នៅ​អូឡាំពិក​ទីក្រុង​តូ​ក្យូ​នឹង​ចាប់ផ្តើម​នៅ​ថ្ងៃ​ចន្ទ​នេះ ដោយ​ប្រេ​ស៊ី​ល​ស្ថិត​ក្នុង​ពូ​ល D ជាមួយ​អាល្លឺម៉ង់ កូ​ឌី​វ័រ និង​អារ៉ាប៊ីសាអ៊ូឌីត​៕

​អត្ថបទ​៖​នាង សុភា​វុ​ធ