កំពង់ឆ្នាំង៖ ប្រជាពលរដ្ឋក្នុងស្រុកជលគីរី ខេត្តកំពង់ឆ្នាំង បានសំដែងនូវការដឹងគុណ និងសប្បាយចិត្តជាខ្លាំងចំពោះសម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត នាយករដ្ឋមន្ត្រី ដោយពួកគាត់នឹងទទួលបានផ្លូវបេតុងលិចទឹក២ខ្សែស្មើនិងជាង២៦គីឡូម៉ែត្រឆ្លងកាត់ភូមិឃុំរបស់ពួកគាត់ ដែលផ្លូវទាំងនោះ ជាផ្លូវដីហុយដីនៅរដូវប្រាំង និងពិបាកក្នុងការធ្វើដំណើរយ៉ាងខ្លាំង ។ ពេលនេះ ពួកគាត់សង្ឃឹមថា ពេលទទួលបានផ្លូវបេតុងនេះហើយ លែងព្រួយបារម្ភពីបញ្ហាសុខភាពដោយសារធូលីហុយទៀតហើយ និងងាយស្រួលធ្វើដំណើរឡើងចុះមកកាន់ក្រុងកំពង់ឆ្នាំងជាងពេលមុនផងដែរ។

 ប្រជាពលរដ្ឋស្រុកជលគីរី បញ្ជាក់ថា៖ កាលពីមុនផ្លូវទាំងនេះ ជាផ្លូវដីហុយពិបាកក្នុងការធ្វើដំណើរ ប្រជាពលរដ្ឋភាគច្រើនធ្វើដំណើរតាមកាណូតតែចំណាយថវិកាច្រើនណាស់ ។ ពេលឈឺថ្កាត់ម្តងៗ ពិបាកក្នុងការដឹកអ្នកជម្ងឺមកកាន់មណ្ឌលសុខភាព ឬមន្ទីរពេទ្យបង្អែក។ ថ្មីៗនេះ រាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទបានផ្តល់ជូនប្រជាពលរដ្ឋស្រុកជលគីរីនូវផ្លូវបេតុងលិចទឹក២ខ្សែ ស្មើនឹងជាង២៦គីឡូម៉ែត្រ ដែលផ្លូវទាំង២ខ្សែនេះ នឹងបំរើដល់ផលប្រយោជន៍ប្រជាពលរដ្ឋដូចជាការដឹកកសិកផល ការដឹកអ្នកជម្ងឺទៅមកមន្ទីរពេទ្យបង្អែក ការធ្វើដំណើរទៅមករបស់មន្ត្រីរាជការ សិស្សានុសិស្ស និងងាយស្រួលដល់ការទំនាក់ទំនងគ្នាពីតំបន់មួយទៅតំបន់មួយទៀត។ ពីមុនផ្លូវនេះ ជាផ្លូវដីហុយ ពេលរដូវវស្សាចូលមក បានលិចទឹកអស់ ហើយនៅរដូវទឹកសម្រកផ្លូវនេះ មានសភាពពិបាកធ្វើដំណើរខ្លាំងបំផុតព្រោះជាផ្លូវនៅតាមមាត់ទន្លេ និងរដូវប្រាំងប្រែជាផ្លូវដីហុយតែម្តង។ ប្រជាពលរដ្ឋទាំងអស់សង្ឃឹមថា នៅប៉ុន្មានខែខាងមុខទៀត ពួកគាត់នឹងទទួលបានផ្លូវបេតុងដ៏ថ្មីសន្លាងនេះមកប្រើប្រាស់ជាប្រយោជន៍រួមហើយ ។ 

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានថ្លែងថា៖ គម្រោងអភិវឌ្ឍន៍ហេដ្ឋារចនាសម្ព័ន្ធជនបទដែលធន់នឹងការប្រែប្រួលអាកាសធាតុរបស់ក្រសួងអភិវឌ្ឍន៍ជនបទ គាំទ្រថវិកាដោយរាជរដ្ឋាភិបាលកម្ពុជា និងពីមូលនិធិសហប្រតិបត្តិការអភិវឌ្ឍន៍សេដ្ឋកិច្ចកូរ៉េ បានធ្វើការកែលម្អផ្លូវជនបទដោយក្រាលបេតុងនៅក្នុងស្រុកជលគីរី ខេត្តកំពង់ឆ្នាំងមាន២ខ្សែប្របតាមមាត់ទន្លេមានប្រវែងជាង២៦គីឡូម៉ែត្រ ។ ផ្លូវបេតុងលិចទឹកទី១ប្រវែង១៧,៦៨គីឡូម៉ែត្រ ទទឹង៦ម៉ែត្រ កម្រាស់០,២០ម៉ែត្រ និងខ្សែទី២ប្រវែង៨,៥៨គីឡូម៉ែត្រ ទទឹង៦ម៉ែត្រ កម្រាស់០,២០ម៉ែត្រ រួមនិងមានស្ពាន លូប្រអប់ លូមូលមួយចំនួនផងដែរ ។ ប្រជាពលរដ្ឋខេត្តកំពង់ឆ្នាំង បានទទួលសមិទ្ធិផល​ថ្មីៗ​តាមជនបទពីរាជរដ្ឋាភិបាលកម្ពុជាយ៉ាងច្រើនខ្សែ ក្នុងនោះមានការកែលម្អផ្លូវកៅស៊ូDBST ២ជាន់ និងផ្លូវបេតុងផងដែរ ៕ ដោយ ៖ កាំង ហុងវាស្នា