ខេត្តកំពង់ចាម គ្រោងនឹងកសាងកំពង់ផែទេសចរណ៍មួយ ខណៈបច្ចុប្បន្ន កំពុង​ចុះសិក្សា និង​វាយ​តម្លៃ​ទីតាំងផ្ទាល់ ដើម្បីបំរើលើវិស័យទេសចរណ៍នៅក្នុងខេត្តឲ្យកាន់តែទាក់ទាញទៀត។

មន្ត្រីជំនាញនៃក្រសួងសាធារណការ និងដឹកជញ្ជូន បានកំពុងធ្វើការចុះសិក្សា និង​វាយ​តម្លៃ​លើ​ទីតាំង​ផ្ទាល់ ដើម្បីបង្កើតកំពង់ផែទេសចរណ៍មួយ បំរើលើវិស័យ​ទេសចរណ៍​នៅ​ក្នុង​ខេត្ត​ឲ្យ​កាន់​តែ​ទាក់​ទាញ នៅថ្ងៃទី២៦ ខែមីនា ឆ្នាំ ២០២៤ ឯកឧត្ដម គឹម សាន់ អនុរដ្ឋលេខាធិការ ក្រសួង​សាធារណ​ការ និងដឹកជញ្ជូន អមដំណើរដោយ លោក ហេង វណ្ណនី អភិបាលរងខេត្តកំពង់ចាម តំណាង​ឯកឧត្ដម អ៊ុន ចាន់ដា ខេត្តកំពង់ចាម រួមនឹងអាជ្ញាធរមូលដ្ឋាន បាន​ធ្វើ​ការ​ចុះ​សិក្សា​គម្រោង​សាង​សង់​កំពង់ផែ​ទេសចរណ៍ ក្នុងក្រុងកំពង់ចាម ខេត្តកំពង់ចាម។

ឯកឧត្ដម គឹម សាន់ អនុរដ្ឋលេខាធិការ ក្រសួងសាធារណការ និងដឹកជញ្ជូន បានបញ្ជាក់ប្រាប់ថា បច្ចុប្បន្ន មន្ត្រី ជំនាញរួម​នឹង​មន្ត្រី​បច្ចេក​ទេស​ក្រសួង​បាន​ធ្វើ​ការ​ចុះ​មក​សិក្សា និង​វាយ​តម្លៃ​រក​ទីតាំង​មួយ​សម​ស្រប​ដោយជាកន្លែងទាក់ទាញ មួយ នៅបណ្តោយមាត់ទន្លេក្នុងក្រុងកំពង់ចាម ដើម្បី​រៀបចំផែនការសិក្សាផលប៉ះពាល់ និងលើកផែនការ​កសាង​កំពង់ផែ​ទេសចរណ៍​មួយ​ដ៏​ទាក់​ទាញ​ និងអាចឲ្យនាវាទេសចរណ៍សំចតបានត្រឹមត្រូវ មានសណ្តាប់ធ្នាប់ល្អ។ ឯកឧត្ដម បញ្ជាក់​ទៀត​ថា គម្រោងសិក្សាកំពង់ផែនេះ នឹងធ្វើការ​សាង់សង​ដោយ​អាច​សំចត​នាវា​ទេសចរណ៍​បាន​ពី​៤​ទៅ​៥​គ្រឿង និងមានកន្លែងសម្រាប់សំរាកអង្គុយរង់ចាំមានផាសុភាពល្អ។ កន្លងមក​នាវា​ទេសចរណ៍​ គឺ​សំចត​គ្មានកន្លែងត្រឹមត្រូវ និងច្បាស់លាស់ឡើយ ។

ឯកឧត្ដម គឹម សាន់ អនុរដ្ឋលេខាធិការ ក្រសួងសាធារណការ និងដឹកជញ្ជូន បន្ថែមទៀតថា ជា​លទ្ធផល ក្រោយចុះពិនិត្យតាមដងទន្លេ និងកំណត់ជម្រៅទឹកទីតាំងច្បាស់លាស់រួចមក ក្រុម​ការងារ​ នឹងធ្វើសំណើរដាក់ទៅរដ្ឋមន្ត្រីក្រសួងសាធារណការ និងដឹកជញ្ជូន ដើម្បីធ្វើ​ការ​សម្រេច​និង​ផ្តល់​អនុសាសន៍វិលត្រឡប់វិញ៕ អត្ថបទៈ ថុង​ សីហា