ប្រធានាធិបតីប្រទេសអេក្វាឌ័រ លោក ដេនញែល ណូបាវ(Daniel Noboa) បានទៅចុះពិនិត្យនគរបាលនៅទីក្រុងកំពង់ផែ ហ្កាយ៉ាហ្គីល(Guayaquil) កាលពីថ្ងៃអង្គារ បន្ទាប់ពីប្រតិបត្តិការប្រឆាំងឧក្រិដ្ឋកម្មរៀបចំទុក ហើយមនុស្ស ១៧ នាក់ត្រូវបានចាប់ខ្លួន និងសម្ភារៈត្រូវបានរឹបអូស។

នគរបាលជាតិរបស់ប្រទេសអេក្វាឌ័រ បានរាយការណ៍ថា ប្រតិបត្តិការនេះបានចាប់ផ្តើមកាលពីថ្ងៃអង្គារនៅពេលព្រឹកព្រលឹម ក្នុងគោលបំណងដើម្បីចាត់វិធានការលើបទឧក្រិដ្ឋ ដូចជា ការជំរិតទារប្រាក់ ការកាន់កាប់អាវុធ ការចាប់ជំរិត និងការជួញដូរគ្រឿងញៀន។

លោក Noboa បានមកដល់ទីបញ្ជាការនគរបាល ដោយពាក់មួកសុវត្ថិភាព និងអាវកាក់ការពារគ្រាប់កាំភ្លើង ហើយត្រូវបានអមដោយភ្នាក់ងារពាក់ឯកសណ្ឋាន។

នគរបាលបានរាយការណ៍ថា ការឆ្មក់ចូល បានធ្វើឡើងនៅក្នុងសង្កាត់មួយ ជាកន្លែងដែលក្រុមឧក្រិដ្ឋជន បានរៀបចំទុក ដែលតាមការចោទប្រកាន់ថាបានប្រើប្រាស់អគារសម្រាប់រក្សាទុកគ្រឿងញៀន និងជាលំនៅឋានសុវត្ថិភាព។

នគរបាលបានសរសេរនៅលើប្រព័ន្ធផ្សព្វផ្សាយសង្គម X ថា ភ្នាក់ងារ បានឆ្មក់ចូលអគារចំនួន ១៣០កន្លែង និងរឹបអូសបានគ្រឿងញៀនចំនួន ៥២ គីឡូក្រាម និងអាវុធជាច្រើនដើម ក្នុងចំណោមសម្ភារៈផ្សេងទៀត ។