ក្នុងចំណោមសមុទ្រសំពត់តង់ពណ៌ស.នៅជំរំជនភៀសខ្លួន Lac Vert ស្ថិតក្នុងទីក្រុង Goma លោក Abdurrahman Kikandi បានធ្វើជម្រកសម្រាប់គ្រួសាររបស់លោក ដែលរួមទាំងភរិយាមានផ្ទៃពោះ និងកូនស្រីរបស់ពួកគេ ក្រោមកម្តៅថ្ងៃដ៏ក្តៅខ្លាំង ហើយពេលនេះ ក្រុមគ្រួសាររបស់លោកពឹងផ្អែកលើជំនឿមួយប៉ុណ្ណោះ ពេលដែលជួបការលំបាកខ្លាំងបែបនេះ ។

 ក្រោយជម្លៀសខ្លួនចេញពីសង្រ្គាមនៅទីក្រុងកំណើត Sake គ្រូសារមូស្លីមមួយនេះ មានបាយ និងត្រីខកំប៉ុងសម្រាប់រៀបចំពិធីបុណ្យរ៉ាម៉ាដាន ប៉ុន្តែរបបអាហារបែបនេះ គឺមិនគ្រប់គ្រាន់ឡើយសម្រាប់គ្រួសាររបស់លោក Kikandi ដើម្បីទទួលទានរាល់ថ្ងៃ ។

 អង្គុយនៅក្បែរសំពត់តង់ដ៏តូចរបស់លោក លោក Kikandi និយាយថា លោកបានបង្ខំខ្លួនឯងតមអាហារ ប៉ុន្តែវាពិបាកតមអាហារខ្លាំងណាស់ ពេលដែលពួកយើងកំពុងធ្វើដំណើរ ។

 លោកបន្តថា ពួកយើងបានជម្លៀសខ្លួនចេញពីសង្រ្គាមដោយគ្មានបានយកអ្វីមកតាមខ្លួនរបស់ពួកយើងនោះឡើយ ហើយពេលដែលលោកវិលត្រឡប់ទៅផ្ទះវិញ លោកឃើញថា អ្វីៗគ្រប់បែបយ៉ាងត្រូវបានលួចយកទៅអស់ដោយក្រុមចោរ ។

 គួរឲ្យដឹងថា ជនស៊ីវិលរាប់ម៉ឺននាក់ បានរត់ភៀសខ្លួនមកកាន់ទីក្រុង Goma កាលពីដើមខែនេះ ស្របពេលដែលមានការមកដល់ថ្មីរបស់ក្រុមចលនា ២៣ ឧសភា (M23)នៅទីក្រុងជិតខាង Sake ធ្វើឲ្យកាត់ផ្តាច់ទីក្រុងមានពលរដ្ឋរស់នៅប្រហែល ២លាននាក់មួយនេះ ៕