កាលពីថ្ងៃអង្គារម្សិលមិញ រដ្ឋបាលរបស់ប្រធានាធិបតីសហរដ្ឋអាមេរិកលោក Joe Biden បានផ្តល់ការការអនុម័តចុងក្រោយដល់គម្រោងរោងចក្រផលិតថាមពលកម្លាំងខ្យល់នៅជិតឆ្នេរសមុទ្រ Sunrise Wind របស់ក្រុមហ៊ុន Orsted និងក្រុមហ៊ុន Eversource ដែលគេរំពឹងថា នឹងផ្តល់ថាមពលដល់ផ្ទះសម្បែងជាង ៣២ម៉ឺនខ្នងនៅទីក្រុងញូវយ៉ក ។

 ការប្រកាសបែបនេះ គឺជាការវិឌ្ឍន៍វិជ្ជមានចុងក្រោយគេសម្រាប់គម្រោងដែលក្រុមហ៊ុន Orsted របស់ដាណឺម៉ាក ព្រមានកាលពីរយៈពេលប៉ុន្មានខែមុនថា វានឹងអាចបរាជ័យបើគ្មានកិច្ចសន្យាថ្មីដែលគ្របដណ្តប់លើតម្លៃហក់ឡើងខ្ពស់សម្រាប់សម្ភារៈ និងការផ្តល់ហិរញ្ញប្បទាន ។

ក្រុមហ៊ុន Orsted និងក្រុមហ៊ុន Eversource និយាយដាច់ដោយឡែកពីគ្នាថា ពួកគេទទួលបានការការសម្រេចចិត្តវិនិយោគចុងក្រោយលើគម្រោង រួមជាមួយនឹងការអនុម័តសហព័ន្ធ ហើយពួកគេនឹងចាប់ផ្តើមសាងសងគម្រោងរោងចក្រផលិតថាមពលកម្លាំងខ្យល់ក្បែរឆ្នេរសមុទ្រ ។

Sunrise Wind គឺជាគម្រោងបង្កើតថាមពលកម្លាំងខ្យល់ក្បែរឆ្នេរសមុទ្រទី ៧ ដែលត្រូវបានអនុម័តដោយក្រសួងមហាផ្ទៃរបស់លោកប្រធានាធិបតី Biden ដែលមានគោលដៅកំណត់សមត្ថភាពថាមពលកម្លាំងខ្យល់ក្បែរតំបន់ឆ្នេរ ៣០ជីហ្គាវ៉ាត់ នៅឆ្នាំ ២០៣០ និងជាផ្នែកមួយនៃរបៀបវារៈបម្រែបម្រួលអាកាសធាតុរបស់ប្រធានាធិបតី ។

ក្រសួងមហាផ្ទៃសហរដ្ឋអាមេរិក និយាយនៅក្នុងសេចក្តីថ្លែងការណ៍ថា គម្រោងមួយនេះ មានសមត្ថភាពបង្កើតថាមពល ៩២៤មេហ្គាវ៉ាត់ ហើយវានឹងបង្កើតការងារ ៨០០កន្លែង អំឡុងពេលសាងសង់ និងការងារ ៣០០កន្លែង អំឡុងពេលប្រតិបត្តិការ ៕