ប្រទេសឥណ្ឌាគ្រោងនឹងចំណាយប្រាក់ជិត ៣,៧ពាន់លានដុល្លារ ដើម្បីធ្វើរបងព្រំដែនប្រវែង ១.៦១០គីឡូម៉ែត្ររបស់ខ្លួនជាមួយសហភាពមីយ៉ាន់ម៉ា ក្នុងចំណាយរយៈពេលប្រហែល ១ទសវត្សរ៍ ដើម្បីទប់ស្កាត់ការរត់ពន្ធ និងសកម្មភាពខុសច្បាប់ផ្សេងទៀត។ នេះបើតាមប្រភពដែលដឹងពីបញ្ហានេះដោយផ្ទាល់។

ក្រុង New Delhi (ញូវដេលី) នៅដើមឆ្នាំនេះ បាននិយាយថា ខ្លួននឹងធ្វើរបងព្រំដែន និងបញ្ចប់គោលនយោបាយចេញចូលដោយគ្មានទិដ្ឋាការដែលមានអាយុកាលរាប់ទសវត្សរ៍ ជាមួយប្រទេសដែលកើតមានរដ្ឋប្រហារ គឺសហភាពមីយ៉ាន់ម៉ា សម្រាប់ពលរដ្ឋនៅតាមព្រំដែន ដោយសារហេតុផលសន្តិសុខជាតិ និងដើម្បីរក្សារចនាសម្ព័ន្ធប្រជាសាស្រ្តនៃតំបន់ភាគឦសានរបស់ខ្លួន។

ដោយសារមិនត្រូវបានអនុញ្ញាតឲ្យនិយាយបញ្ហានេះជាមួយប្រព័ន្ធផ្សព្វផ្សាយ ប្រភពដែលសុំមិនបញ្ចេញឈ្មោះបាននិយាយថា គណៈកម្មាធិការរដ្ឋបាលមួយ កាលពីដើមខែនេះ បានអនុម័តលើការចំណាយ សម្រាប់ការដំឡើងរបង ដែលត្រូវការការយល់ព្រមពីខុទ្ទកាល័យរបស់នាយករដ្ឋមន្ត្រី លោក Narendra Modi។

ប្រភពបានប្រាប់ថា គណៈកម្មាធិការនៃមន្ត្រីជាន់ខ្ពស់ឥណ្ឌា ក៏បានយល់ព្រមផងដែរ ក្នុងការសាងសង់ផ្លូវស្របគ្នាតាមបណ្ដោយរបងព្រំដែននេះ និងចំណីផ្លូវប្រវែង ១.៧០០គីឡូម៉ែត្រ ដែលតភ្ជាប់មូលដ្ឋានយោធាទៅកាន់ព្រំដែន។

ប្រភពបាននិយាយថា របង និងផ្លូវតភ្ជាប់នេះ នឹងចំណាយអស់ជិត ១២៥លានរូពី ក្នុង ១គីឡូម៉ែត្រ ដែលមានចំនួនច្រើនជាងទ្វេដងនៃការចំណាយ ៥៥លានរូពីក្នុងមួយគីឡូម៉ែត្រ សម្រាប់ការសាងសង់របងព្រំដែនជាមួយប្រទេសបង់ក្លាដែស ក្នុងឆ្នាំ២០២០ ដោយសារតែសណ្ឋានដីភ្នំដ៏ពិបាក និងការប្រើប្រាស់បច្ចេកវិទ្យាការពារការស្រុត និងការច្រោះ៕