មន្ត្រីប៉ាគីស្ថាន បាននិយាយថា នាយករដ្ឋមន្ត្រីរបស់ប្រទេសនេះ នៅថ្ងៃពុធ (ទី២៧ ខែមីនា) នេះ បានអំពាវនាវឲ្យមានការស៊ើបអង្កេតរួមគ្នាដោយមន្ត្រីយោធា និងស៊ីវិល ពាក់ព័ន្ធនឹងការបំផ្ទុះគ្រាប់បែកអត្តឃាតដែលបានសម្លាប់វិស្វករ ៥នាក់ មកពីប្រទេសចិន ខណៈពេលដែលពិនិត្យឡើងវិញនូវការរៀបចំសន្តិសុខ សម្រាប់គម្រោងនានារបស់ខ្លួន។

ហេតុការណ៍ កាលថ្ងៃអង្គារ (ទី២៦ ខែមីនា) គឺជាការវាយប្រហារធំទី៣ ក្នុងរយៈពេល ១សប្តាហ៍លើផលប្រយោជន៍របស់ប្រទេសចិន នៅក្នុងប្រជាជាតិអាស៊ីខាងត្បូងមួយនេះ ដែលទីក្រុងប៉េកាំង បានវិនិយោគច្រើនជាង ៦៥ពាន់លានដុល្លារក្នុងគម្រោងហេដ្ឋារចនាសម្ព័ន្ធដែលជាផ្នែកមួយនៃគំនិតផ្តួចផ្តើមខ្សែក្រវាត់ និងផ្លូវគ្រប់ទីកន្លែងរបស់ខ្លួន។

ការិយាល័យរបស់នាយករដ្ឋមន្ត្រីបានឲ្យដឹងនៅក្នុងសេចក្តីថ្លែងការណ៍មួយថា លោក Shehbaz Sharif បានអំពាវនាវឲ្យមាន «ការស៊ើបអង្កេតរួមគ្នាយ៉ាងល្អិតល្អន់មួយដែលត្រូវធ្វើឡើង ដោយប្រើប្រាស់ធនធានទាំងអស់របស់រដ្ឋ»។

រដ្ឋមន្ត្រីក្រសួងព័ត៌មាន លោក Attaullah Tarar បាននិយាយថា នៅមុននេះ លោក Sharif បានដឹកនាំកិច្ចប្រជុំមន្ត្រីស៊ីវិល និងយោធា ដែលពិនិត្យមើលឡើងវិញនូវការរៀបចំសន្តិសុខ ដើម្បីការការពារជនជាតិចិន និងផលប្រយោជន៍របស់ពួកគេ ប៉ុន្តែមិនបានផ្តល់ព័ត៌មានអ្វីលម្អិតទេ។

យ៉ាងណាក្ដី នៅមិនទាន់មានអ្នកចេញមុខអះអាងទទួលខុសត្រូវភ្លាមៗនោះឡើយ ចំពោះការវាយប្រហារ កាលពីថ្ងៃអង្គារ ដែលឃើញថា អ្នកបំផ្ទុះគ្រាប់បែកអត្តឃាតបានបើករថយន្តសម្រុកចូលទៅក្នុងក្បួនរថយន្តរបស់វិស្វករចិនដែលកំពុងធ្វើការលើគម្រោងវារីអគ្គិសនី នៅតំបន់ Dasu ភាគពាយ័ព្យនៃប្រទេសប៉ាគីស្ថាន ដោយបានសម្លាប់មនុស្ស ៦នាក់៕