សាកសពពីរនាក់ត្រូវបានរកឃើញនិងស្រង់ឡើងពីទន្លេ ផាតាបស្កូ (Patapsco) បន្ទាប់ពីបុរសចំនួន ៦នាក់ បានបាត់ខ្លួន បន្ទាប់ពីការបាក់ស្ពានហ្វ្រង់ស៊ីស ស្កុត ឃី (Francis Scott Key) ក្នុងទីក្រុង បាល់ទីម័រ (Baltimore)រដ្ឋម៉ារីលែន(Maryland) សហរដ្ឋអាមេរិក កាលពីថ្ងៃអង្គារទី២៦មីនា ។   

សេចក្ដីប្រកាសនេះ ត្រូវបានធ្វើឡើងក្នុងសន្និសីទសារព័ត៌មានមួយកាលពីរសៀលថ្ងៃពុធ ដោយ បុគ្គលិកមកពីអង្គភាពឆ្មាំល្បាតឆ្នេរសហរដ្ឋអាមេរិក នាយកដ្ឋានដឹកជញ្ជូនរដ្ឋ Maryland និងអភិបាលរដ្ឋ លោក វ៉េស មូរ៉េ (Wes Moore) ។         

ប្រតិបត្តិការជួយសង្គ្រោះត្រូវបានផ្អាកកាលពីយប់ថ្ងៃអង្គារ នៅពេលលោកឧត្តមនាវីទោ ហ្សានម៉ុន ជីលរីត (Shannon Gilreath) ឆ្មាំល្បាតឆ្នេរអាមេរិក បាននិយាយថា គ្មានសង្ឃឹម​ថានឹង​រក​ឃើញ​ក្រុម​បុរស​ដែលកំពុងធ្វើការនៅលើស្ពាន នៅពេលនាវាដឹកទូរកុងតឺន័របានបុក នៅ​មាន​ជីវិត​នោះ​ទេ ព្រោះទឹកត្រជាក់ខ្លាំង និងរយៈពេលយូរចាប់តាំងពីមានគ្រោះថ្នាក់នោះ។

លោកវរសេនីយ៍ឯក រ៉ូលែន អិល ប៊ូល័រ (Roland L Butler) ស្នងការនគរបាលរដ្ឋ Maryland បាន​បញ្ជាក់ព័ត៌មាននេះ ក្នុងអំឡុងសន្និសីទសារព័ត៌មានដោយបន្ថែមថា ពេលនេះ ប្រតិបត្តិការ​ស្វែង​រក និងស្រង់សាកសព ត្រូវបានបែងចែកចំណាត់ថ្នាក់ឡើងវិញ ដើម្បីបង្កើនកិច្ចខិតខំ​ប្រឹងប្រែង​ជួយ​សង្គ្រោះ៕