អ្នកជំនាញសេដ្ឋកិច្ច និងដឹកជញ្ជូននិយាយថា ការបាក់ស្ពានដ៏មហន្តរាយ ដែលបានបិទកំពង់ផែ ទីក្រុង Baltimore រដ្ឋម៉ារីលែន សហរដ្ឋអាមេរិក ក្នុងការដឹកជញ្ជូនទំនិញ កំពុងបង្ក​ឱ្យមាន​ការ​ឈឺ​ក្បាល​ផ្នែកដឹកជញ្ជូនមួយចំនួន ប៉ុន្តែទំនងជាមិនបង្កឱ្យមាន​វិបត្តិខ្សែស​ង្វាក់​ផ្គត់​ផ្គង់ថ្មី​ដ៏​ធំរបស់​សហរដ្ឋអាមេរិកនោះទេ ខណៈកំពង់ផែ East Coast ដែលកំពុងប្រកួតប្រជែង បាន​ត្រៀម​ខ្លួន ដើម្បីដោះស្រាយទំនិញកាន់តែច្រើន។

មនុស្ស ៦នាក់ ត្រូវបានគេសន្មត់ថាបានស្លាប់ បន្ទាប់ពីនាវាដឹកទូទំនិញបានបុកបំផ្លាញស្ពាន Francis Scott Key។ ជាមួយគ្នានេះ វានៅតែ​មិន​ច្បាស់​ថា​តើ​រយៈពេល​ប៉ុន្មាន​ដែល​កំពង់​ផែ​ទីក្រុងនឹងត្រូវបើកឡើងវិញ បន្ទាប់រចនាសម្ព័ន្ធស្ពានបានបាក់ធ្លាក់ចូលទន្លេ។

ក្រុម​ហ៊ុន​ក្នុងស្រុកជាច្រើន នៅកំពង់ផែ Baltimore មានការព្រួយ​បារម្ភ​អំពី​ផល​ប៉ះពាល់​លើ​កម្មករ​រាប់​ពាន់នាក់ ជាអ្នកលើកដាក់ និងរើទំនិញលើនាវា។

យោងតាមការិយាល័យអភិបាលរដ្ឋ Maryland លោក Wes Moore បាននិយាយថា កំពង់ផែ​នេះបង្កើតការងារដោយផ្ទាល់ជាង ១៥.០០០ការងារ ដោយមានការងារបន្ថែម ១៤០.០០០ ការងារ​ ពឹងផ្អែកលើសកម្មភាពកំពង់ផែនេះ។