អ្នកជំនាញរបស់អង្គការសហប្រជាជាតិ ដែលបានចុះផ្សាយរបាយការណ៍និយាយថា អ៊ីស្រាអែល​បាន​ប្រព្រឹត្តអំពើប្រល័យពូជសាសន៍នៅតំបន់ហ្កាហ្សា ក្នុងអំឡុងពេលយុទ្ធនាការ​យោធា​របស់​ខ្លួន​បន្ទាប់​ពី​ការវាយប្រហារដោយក្រុមហាម៉ាសកាលពីថ្ងៃទី ៧ ខែតុលា បាននិយាយកាលពីថ្ងៃពុធ ថាលោកស្រី បានទទួលការគំរាមកំហែង។

លោកស្រី ហ្វ្រានសេសសា អាល់បានីស(Francesca Albanese) អ្នករាយការណ៍ពិសេស ស្តីពី​ស្ថាន​ភាពសិទ្ធិមនុស្សនៅតំបន់ West Bank និងហ្កាហ្សា បានបង្ហាញ​របាយការណ៍​មួយ​ទៅ​កាន់​ក្រុម​ប្រឹក្សាសិទ្ធិមនុស្សរបស់អង្គការសហប្រជាជាតិ នៅទីក្រុងហ្សឺណែវ កាលពីថ្ងៃអង្គារ ដែលក្នុង​នោះ លោកស្រីបាននិយាយថា មានមូលដ្ឋានសមហេតុផលដើម្បីជឿថាអំពើប្រល័យពូជសាសន៍ ត្រូវ​បានប្រព្រឹត្តទៅលើ ពលរដ្ឋប៉ាឡេស្ទីននៅតំបន់ហ្កាហ្សា។ អ៊ីស្រាអែល បាននិយាយថា ខ្លួន​បដិសេធ​ទាំងស្រុងចំពោះ របាយការណ៍របស់លោកស្រី។

ដោយត្រូវបាន​សួរ​ថាតើការងាររបស់លោកស្រីបានធ្វើឱ្យលោកស្រីទទួលការគំរាមកំហែងដែរឬទេ នោះលោកស្រី Albanese បាននិយាយថា ពិតណាស់ លោកស្រីទទួលបានការគំរាមកំហែង។ លោកស្រី Albanese កាន់តួនាទីចាប់តាំងពីឆ្នាំ ២០២២ ពុំបានរៀបរាប់​លម្អិត​អំពី​លក្ខណៈ​នៃ​ការ​គំរាម​កំហែង​នោះទេ ហើយលោកស្រីក៏ពុំបាន​និយាយថា​នរណាជា​អ្នកចេញ​ការ​គំរាម​កំហែង​ទាំង​នេះដែ​រ​។

ប្រទេសអ៊ីស្រាអែល បានរិះគន់លោកស្រី Albanese យ៉ាងខ្លាំង ដោយនិយាយថាលោកស្រី កំពុង​ធ្វើការដើម្បីលុបចោលភាពស្របច្បាប់និងភាពស្ថិតស្ថេរនៃរដ្ឋអ៊ីស្រាអែល។ លោកស្រី Albanese បានបដិសេធការចោទប្រកាន់នេះ។

លោកស្រី Albanese បាននិយាយថា ការរកឃើញដ៏សំខាន់មួយរបស់លោកស្រីគឺ មេដឹកនាំ និង​យោធា​របស់អ៊ីស្រាអែល មានចេតនារារាំង និងការប៉ុនប៉ង​ធ្វើ​ឲ្យស្រប​ច្បាប់​អំពើ​ហឹង្សា​ប្រល័យ​ពូជ​សាសន៍ លើប្រជាជនប៉ាឡេស្ទីន៕