ក្រុមអាជ្ញាធររុស្ស៊ីបាននិយាយកាលពីថ្ងៃពុធថាចំនួនអ្នកស្លាប់ដោយសារការវាយប្រហារនៅសាលប្រគំ​តន្ត្រីនៅទីក្រុងមូស្គូ កាលពីសប្តាហ៍មុន បានកើនឡើងដល់ ១៤៣នាក់។ មនុស្ស​ប្រហែល​៨០នាក់ផ្សេងទៀតដែលបានរងរបួសនៅក្នុងការឡោមព័ទ្ធដោយខ្មាន់កាំភ្លើង កំពុង​សម្រាក​ព្យាបាល​នៅ​មន្ទីរពេទ្យនៅឡើយ។

ការសម្លាប់រង្គាលកាលពីយប់ថ្ងៃសុក្រទី២២មីនា សប្ដាហ៍មុន នៅសាលប្រគំតន្ត្រីក្រូកាស (Crocus) ដែលជាអគារលក់ទំនិញ និងកន្លែងកម្សាន្ត​ដ៏ធំទូលាយ​មួយ​នៅ​ជាយ​ក្រុង​មូស្គូ​ភាគ​ពាយ័ព្យ គឺជាការវាយប្រហារដ៏សាហាវបំផុតលើដែនដីរុស្ស៊ីក្នុងរយៈពេលជិតពីរទសវត្សរ៍ មិន​ធ្លាប់​មាន។ យ៉ាងហោចណាស់ខ្មាន់កាំភ្លើងបួននាក់ដែលកាន់កាំភ្លើងស្វ័យប្រវត្ត បានបាញ់រះ​ទៅ​លើ​អ្នក​ទៅ​មើល​ការប្រគំតន្ត្រីរាប់ពាន់នាក់ ហើយបានដុតបំផ្លាញសាលនោះ។ 

សាខាមួយរបស់ក្រុមរដ្ឋអ៊ីស្លាមបានអះអាងទទួលខុសត្រូវចំពោះអំពើហិង្សានេះ ខណៈទីភ្នាក់​ងារ​ចារកម្ម​របស់សហរដ្ឋអាមេរិកបាននិយាយថា ខ្លួនមានព័ត៌មាន​ដែល​បញ្ជាក់ថា​ក្រុម​នេះ​ជា​អ្នក​ប្រព្រឹត្ត​។ ចំណែកលោកប្រធានាធិបតីបារាំង Emmanuel Macron បាននិយាយថា ប្រទេស​បារាំង​ក៏​មានព័ត៌មានចារកម្មដែលចង្អុលទៅក្រុមរដ្ឋអ៊ីស្លាម IS ថា ជាអ្នកទទួល​ខុស​ត្រូវ​ចំពោះ​ការ​វាយ​ប្រហារ​នេះដែរ។

ការធ្វើបច្ចុប្បន្នភាពស្ដីពីចំនួនអ្នកស្លាប់របស់ក្រសួងសង្គ្រោះបន្ទាន់រុស្ស៊ីពុំបានបញ្ជាក់ពីចំនួនអ្នករបួសទេ ប៉ុន្តែរដ្ឋមន្ត្រីសុខាភិបាលលោក មីគហេល មូរ៉ាស្កូ (Mikhail Murashko)​បាន​និយាយ​កាល​ពី​ថ្ងៃ​ពុធ​ថាមនុស្ស ៨០នាក់កំពុងសម្រាកនៅមន្ទីរពេទ្យ និង២០៥នាក់​ផ្សេងទៀត​បាន​ស្វែង​រក​កា​រ​ព្យាបាល​ដោយ​សារការវាយប្រហារនេះ។

សេវាសន្តិសុខ​សហព័ន្ធរបស់រុស្ស៊ី ឬហៅកាត់ថា FSB បាននិយាយថា ខ្លួនបានចាប់ខ្លួនមនុស្ស ១១​នាក់​នៅថ្ងៃបន្ទាប់ពីការវាយប្រហារ រួមទាំងខ្មាន់កាំភ្លើងដែលសង្ស័យចំនួន៤ នាក់ផងដែរ។ 

បុរស​ទាំងបួននាក់ ដែលត្រូវបានគេកំណត់អត្តសញ្ញាណថាជាជនជាតិតាហ្ស៊ីគីស្ថាន បាន​បង្ហាញ​ខ្លួន​នៅ​ក្នុង​តុលាការក្រុងមូស្គូកាលពីថ្ងៃអាទិត្យ ពាក់ព័ន្ធការចោទប្រកាន់ពីបទភេរវកម្ម និង​បង្ហាញ​ស្នាម​ការវាយដំលើដងខ្លួនយ៉ាងធ្ងន់ធ្ងរ ក្នុងនោះមានម្នាក់ទំនងជាសន្លប់ អំឡុងពេលសវនាការ៕