ក្រសួងសង្គមកិច្ច អតីតយុទ្ធជន និងយុវនីតិសម្បទា ជាសេនាធិការឱ្យរាជរដ្ឋាភិបាល នឹងចាប់ផ្ដើមចុះឈ្មោះក្រុមគោលដៅជាអ្នកទទួលផល សម្រាប់ការអនុវត្តកម្មវិធីជំនួយសង្គមថ្មី «កញ្ចប់គ្រួសារ» ចាប់ពីថ្ងៃទី១ ខែមេសា ឆ្នាំ ២០២៤ខាងមុខនេះ ខណៈអ្នកទទួលផលសម្រាប់កម្មវិធីជំនួយសង្គមថ្មីនេះ គឺនៅតែសំដៅលើគ្រួសារមានបណ្ណក្រីក្រ ដែលសុពលភាពដដែល។
រាជរដ្ឋាភិបាលកម្ពុជា ក្នុងខែមេសា ឆ្នាំ ២០២៤ខាងមុខនេះ នឹងចាប់ផ្ដើមអនុវត្តកម្មវិធីជំនួយសង្គមថ្មី គឺកម្មវិធី«កញ្ចប់គ្រួសារ» ជាកម្មវិធីជំនួយសង្គមមានលក្ខណៈអចិន្ត្រៃយ៍ និងគ្រប់ជ្រុងជ្រោយ។ កម្មវិធីនេះ ជាកម្មវិធីទម្រ ដែលដាក់ឱ្យអនុវត្តក្រោយបិទបញ្ចប់កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះកំឡុងពេលប្រយុទ្ធប្រឆាំងកូវីដ-១៩ ត្រឹមខែ មីនា ឆ្នាំ ២០២៤នេះ។
សម្រាប់ការអនុវត្តកម្មវិធីជំនួយសង្គមថ្មីនេះ ចាប់ផ្ដើមដំបូងដោយការចុះឈ្មោះអ្នកទទួលផលជាថ្មី។ មន្ត្រីជំនាញនៃក្រសួងសង្គមកិច្ច ក្រោមកិច្ចសហការជាមួយអាជ្ញាធរមូលដ្ឋាន នឹងចាប់ផ្ដើមចុះឈ្មោះអ្នកទទួលផលនៅតាមភូមិទូទាំងប្រទេស ចាប់ពីថ្ងៃទី ១ រហូតដល់ថ្ងៃទី ២០ មេសា ឆ្នាំ ២០២៤។ បន្ទាប់ពីថ្ងៃទី ២០ ខែមេសា អ្នកទទួលផលជា គ្រួសារមានបណ្ណក្រីក្រ អាចបន្តទៅចុះឈ្មោះ នៅទីតាំងសាលាឃុំ-សង្កាត់។ នេះជាការលើកឡើងរបស់ ឯកឧត្តម ស៊ឹម សុធន ប្រតិភូរាជរដ្ឋាភិបាលទទួលបន្ទុកជាអគ្គនាយកមូលនិធិជាតិជំនួយសង្គម ក្នុងឱកាសបើកវគ្គតម្រង់ទិសជនបង្គោលថ្នាក់ជាតិ ស្ដីពី យុទ្ធនាការចុះឈ្មោះតាមភូមិ សម្រាប់អ្នកទទួលផលពីកម្មវិធីជាតិជំនួយសង្គមក្នុងកញ្ចប់គ្រួសារ។
ឯកឧត្តមលើកឡើងដែរថា សម្រាប់អ្នកទទួលផលដែលត្រូវទៅចុះឈ្មោះសម្រាប់កម្មវិធីជំនួយសង្គមថ្មី «កញ្ចប់គ្រួសារ» គឺនៅតែសំដៅលើគ្រួសារដែលមានបណ្ណក្រីក្រ ដែលមានសុពលភាព។ ការចុះឈ្មោះនេះ គឺអ្នកទទួលផលត្រូវភ្ជាប់ជាមួយ បណ្ណក្រីដែលមានសុពលភាព ហើយក៏ត្រូវភ្ជាប់ជាមួយ អត្តសញ្ញាណប័ណ្ណសញ្ជាតិខ្មែរ ក៏ដូចជាសំបុត្រកំណើតផងដែរ។
ជាការប៉ាន់ប្រមាណក្នុងខែដំបូង សម្រាប់ការអនុវត្តកម្មវិធី «កញ្ចប់គ្រួសារ» គឺអាចមានគ្រួសារទទួលផល ប្រមាណ ៨០ម៉ឺនគ្រួសារ។ នេះជាការបញ្ជាក់ថែម របស់ឯកឧត្តម ប្រតិភូរាជរដ្ឋាភិបាលទទួលបន្ទុកជាអគ្គនាយកមូលនិធិជាតិជំនួយសង្គម។
គួរបញ្ជាក់ថា កម្មវិធី «កញ្ចប់គ្រួសារ» ជាការធ្វើសមហរណកម្ម ៤កម្មវិធីរួមគ្នា។ កម្មវិធីទី ១ គឺកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ឆ្នាំ។ កម្មវិធីទី ២ គឺកម្មវិធីអាហារូករណ៍សិស្សក្រីក្រថ្នាក់បឋម និងមធ្យម។ កម្មវិធីទី៣ គឺកម្មវិធីឧបត្ថម្ភសាច់ប្រាក់ជូនជនមានពិការភាព និងកម្មវិធីទី ៤ គឺកម្មវិធីឧបត្ថម្ភសាច់ប្រាក់ជូនចាស់ជរាមានវ័យចាប់ពី ៦០ឡើងទៅ៕ អត្ថបទ៖ គឹម ហុក