នៅថ្ងៃទី២៧ ខែមីនា ម្សិលមិញនេះ រដ្ឋបាលខេត្តព្រះវិហារ បានរៀបចំបើកវគ្គបណ្តុះបណ្តាល សៀវភៅណែនាំស្តីពីការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព ក្រោមអធិបតីភាព​លោក វ៉ាត ប៉ារ៉ានីន អភិបាលរងខេត្តព្រះវិហារ និងមានការចូលរួមពីសំណាក់លោកលោកស្រី ជាអភិបាល អភិបាលរង និងមន្ត្រី បង្គោល ក្រុង ស្រុក ទាំង៨ ថ្នាក់ដឹកនាំមន្ទីរអង្គភាពជុំវិញខេត្ត កងកម្លាំងទាំង៣ ជាច្រើនរូប និងបានប្រព្រឹត្តធ្វើឡើងនៅ អគារសាលាខេត្តជាន់ទី៣។

នាឱកាសនោះលោក វ៉ាត ប៉ារ៉ានីន បានឱ្យដឹងថា ការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាពត្រូវបានរៀបចំនិងវិវត្តខ្លួន ពីមួយ ជំហានទៅមួយជំហាន តាមរយៈការធ្វើ​វេទិកា​សាធារណៈ ក៏ដូចជាការផ្សព្វផ្សាយ ​គោលការណ៍ច្បាប់ ទៅដល់បងប្អូនប្រជាពលរដ្ឋ មន្ទីរអង្គភាព អជ្ញាធរដែលមានការពាក់ព័ន្ធ ជាបន្តបន្ទាប់យ៉ាងសកម្ម។ ជាក់ស្តែងថ្ងៃនេះ រដ្ឋបាលខេត្តបានរៀបចំវគ្គបណ្តុះបណ្តាល សៀវភៅណែនាំ ស្តីពីការអនុវត្ត គោលនយោបាយ ភូមិ ឃុំ សង្កាត់ មានសុវត្ថិភាព នេះឡើងដើម្បី អោយ អាជ្ញាធរ ក្រុង ស្រុក ទាំង៨ ព្រមទាំង លោក លោកស្រី ដែលជាថ្នាក់ដឹកនាំមន្ទីរអង្គភាពពាក់ព័ន្ធ បានកសាងបន្ថែមទៀត នូវសមត្ថភាពនិង​ជំនាញ​របស់ខ្លួនក៏ដូចជាបានយល់កាន់តែច្បាស់ នូវលក្ខណៈសម្បត្តិទាំង៧ ស្តីពី ភូមិ ឃុំ សង្កាត់ មានសុវត្ថិភាព និងចេះរៀបចំ និងអនុវត្តផែនការ សកម្មភាព និងថវិកាប្រចាំឆ្នាំ។

បន្ថែមពីនេះទៅទៀត វគ្គបណ្តុះបណ្តាលនេះដើម្បីជម្រុញ បន្ថែមទៀតនូវការ ផ្តល់សេវាសាធារណៈ ជាពិសេសសេវារដ្ឋបាល ប្រកបដោយគុណភាពនិងទទួលបានជំនឿទុកចិត្ត និង កាត់បន្ថយបាននូវ បទល្មើស លួច ឆក់ប្លន់ គ្រឿងញៀន ល្បែងស៊ីសងខុសច្បាប់និងបទល្មើសគ្រប់ប្រភេទ ។ កសាង និងពង្រឹង សន្តិសុខ សណ្តាប់ធ្នាប់សង្គម លើកកម្ពស់អនាម័យ បរិស្ថាន សុខមាលភាពប្រជាពលរដ្ឋ និងកាត់បន្ថយគ្រោះថ្នាក់ បណ្តាលមកពីគ្រោះមហន្តរាយ និងជំងឺឆ្លងរាតត្បាតនៅគ្រប់កាលៈទេសៈ ព្រមទាំង លើកទឹកចិត្តអោយមានការដោះស្រាយ វិវាទនៅមូលដ្ឋាន ក្រៅប្រព័ន្ធតុលាការដើម្បី​បង្ក​ភាព​អនុគ្រោះដល់ដំណើរការអភិវឌ្ឍ​សេដ្ឋកិច្ច សង្គមកិច្ច នៅមូលដ្ឋាននិងឈានទៅការបង្កើន​ល្បឿននៃការកាត់បន្ថយភាពក្រីក្រ។

ជាមួយគ្នានេះផងដែរ លោកក៏បាន ផ្តាំផ្ញើដល់អាជ្ញាធរ ក្រុង ស្រុក ទាំង៨ ត្រូវក្តាប់​អោយ​បាន​ច្បាស់​អំពីទិន្នន័យរបស់ប្រជាការពារ នៅក្នុងមូលដ្ឋានរបស់ខ្លួន​ និងត្រូវ​ជំរុញ​ដល់​អធិការ ​និង​បុស្តិ៍ នគរបាល​រដ្ឋបាល​ ចុះផ្សព្វផ្សាយ​ អំពី​ចលនាប្រជាការពារ ​តាមរយៈសេចក្ដីណែនាំ​លេខ ០៣៧ ស្តីពីតួនាទីភារកិច្ចរបស់ប្រជាការពារ ។

នៅក្នុងឱកាសនោះផងដែរ លោកក៏បានថ្លែង ​កោតសរសើរ និងវាយតម្លៃខ្ពស់ចំពោះការខិតខំ​ប្រឹងប្រែង​របស់ លោក លោកស្រី ​នាពេល​កន្លងមកស្តីពី ​ការងារភូមិ ឃុំ សង្កាត់ មានសុវត្ថិភាព ទទួល​បានលទ្ធផលល្អប្រសើរ ៕