នៅព្រឹកថ្ងៃទី២៨ ខែមីនានេះ រដ្ឋបាលរាជធានីភ្នំពេញ បានធ្វើពិធីក្រុងពាលីសុំសេចក្តីសុខ បើកការដ្ឋានរៀបចំតាំងពិព័រណ៍ ឆាកប្រគំតន្ត្រីសិល្បៈ និងរៀបចំទីតាំងលេងល្បែង​កម្សាន្ត​ប្រជាប្រីយ​ខ្មែរ ត្រៀមទទួលពលរដ្ឋ និងភ្ញៀវទេសចរជាតិ អន្តេរជាតិ អញ្ជើញ​ចូលរួម​ដើរ​លេង​កម្សាន្ត​សប្បាយ​បែប​ប្រពៃណីខ្មែរ ក្នុងកម្មវិធីសង្ក្រាន្តវត្តភ្នំ អបអរសាទរបុណ្យចូលឆ្នាំថ្មី​ប្រពៃណីខ្មែរ​ខាង​មុខនេះ។

លោកស្រី ណម ណារីន ប្រធានស្តីទីមន្ទីរវប្បធម៌ និងវិចិត្រសិល្បៈ រាជធានីភ្នំពេញ ថ្លែងថា នៅ​ក្នុង​ឆ្នាំនេះ រដ្ឋបាលរាជធានីភ្នំពេញ នឹងរៀបចំកម្មវិធីសង្ក្រាន្តធំជាងគេ នៅក្នុង​រមណីយ​ដ្ឋាន​ទេសចរណ៍​វប្បធម៌ និងប្រវត្តិសាស្រ្តវត្តភ្នំ ហើយនៅថ្ងៃនេះដែរ យើងបានធ្វើពិធីក្រុងពាលី សុំសុខ សិរីសួស្តី រៀបចំទីតាំង តាំងពិព័រណ៍ផលិតផលសេវាកម្មបែបវប្បធម៌ខ្មែរ ការរៀប​ចំដំឡើង​ឆាក​ប្រគំ​តន្ត្រី ​សម្តែងសិល្បៈ ធ្វើរូបសំណាក រៀបចំទីតាំងលេងកម្សាន្តនានាទៀតជាច្រើន ហើយ​តាម​ការ​គ្រោង គឺរៀបចំឲ្យហើយរួចរាល់នៅថ្ងៃទី១០ ខែមេសាខាងមុខនេះ។

ប្រធានមន្ទីរទេសចរណ៍រាជធានីភ្នំពេញ លោក ម៉ម វាសនា រំពឹងថា កម្មវិធីសង្ក្រាន្តវត្តភ្នំ ឈាន​ចូល​​ឆ្នាំរោ​ង ដែលមានរយៈពេល៤ថ្ងៃនេះ សម្រាប់គោលដៅកម្មវិធីសង្ក្រាន្តនៅវត្តភ្នំមួយ នឹង​ទាក់​ទាញ ពលរដ្ឋ និងភ្ញៀវទេសចរជាតិ អន្តរជាតិ ចូលទស្សនា កើនរហូត១លាននាក់។

សូមបញ្ជាក់ថា ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលនឹងប្រារព្ធចាប់ពីថ្ងៃទី១៣ រហូត​ដល់​ថ្ងៃ​ទី១៦ ខែមេសា ឆ្នាំ២០២៤នេះ  ក្នុងឱកាសនេះរដ្ឋបាលរាជធានីភ្នំពេញបានអំពាវ​នាវ​គ្រប់​បណ្តា​អាជ្ញា​ខណ្ឌ រៀបចំកម្មវិធីសង្ក្រាន្តនៅតាមមូលដ្ឋានរបស់ខ្លួន ហើយតាម​មូលដ្ឋាន​អាជីវកម្ម​នានា និងតាមមន្ទីរអង្គភាពជំនាញនៅក្រោមឱវាទទាំងអស់ ត្រូវតុបតែងលំអរបែបខ្មែរ ដើម្បី​ញ៉ាំង​ឲ្យពិធីបុណ្យចូលឆ្នាំថ្មីប្រពៃណីជាតិខ្មែរ មានភាពអធឹកអធម សប្បាយរីករាយ រក្សា​បាន​នូវ​ប្រពៃណីទំនៀមទំលាប់ និងមានសន្តិសុខ សណ្តាប់ធ្នាប់ល្អប្រសើរ និងទាក់ទាញ​ទេសចរ​ជាតិ អន្តរជាតិមកទស្សនាកម្សាន្ត៕ អត្ថទ ស៊ុម សុខជា