រដ្ឋបាលខេត្តព្រះវិហារ នៅរសៀលថ្ងៃទី ២៧ ខែមីនា ម្សិលមិញនេះ បានរៀបចំកិច្ចប្រជុំស្តីពីការពិ និត្យ និងវាយតម្លៃសមិទ្ធកម្មនូវផែនការអភិវឌ្ឍទេសចរណ៍បច្ចុប្បន្នកម្ម ២០២១-២០២៥ របស់ខេត្ត ព្រះវិហារ ។

នាឱកាសនោះលោក សុខ សាន្តដារ៉ា អភិបាលរងខេត្តព្រះវិហារ បានឲ្យដឹងថា រដ្ឋបាលខេត្តបានកំណត់ យកវិស័យទេសចរណ៍ ជាវិស័យអាទិភាពមួយរបស់ខេត្ត ក្នុងចំណោម​វិស័យអាទិភាពផ្សេងៗទៀត ស្រប់តាមសក្តានុពលដែលមាននៅក្នុងខេត្ត សម្រាប់រួមចំណែក​អភិវឌ្ឍន៍​សេដ្ឋកិច្ចខេត្ត និងលើក កម្ពស់កម្រិតជីវភាពរស់នៅរបស់ប្រជាពលរដ្ឋ តាមរយៈការផ្តល់​ឱកាសការងារធ្វើនៅក្នុងវិស័យឧស្សា ហកម្មទេសចរណ៍។

លោក បានបន្ថែមទៀតថា ឈរលើមូលដ្ឋាននេះ ដើម្បីជាចក្ខុវិស័យវែងឆ្ងាយ ក្នុង ការតម្រង់ទិសចាត់តាំងអនុវត្ត ក្រោមការដឹកនាំរបស់ឯកឧត្តម គីម រិទ្ធី អភិបាលខេត្ត ក្រសួងទេសចរណ៍ ដែលមានមន្ទីរទេសចរណ៍ខេត្ត ជាសេនាធិការ តែងតែបានកសាង​នូវផែនការសម្រាប់អភិវឌ្ឍន៍ ទេសចរណ៍រយៈពេល ៥ឆ្នាំ ៣ឆ្នាំ ដោយមានការចូលរួមពីគ្រប់មន្ទីរ អង្គភាព និងភាគីពាក់ពព័ន្ធផ្សេង ទៀតក្នុងខេត្ត ក្រោមយន្តការគណៈកម្មាធិការអភិវឌ្ឍ​ទេសចរណ៍ខេត្ត ទាំងនេះ បានបង្ហាញឲ្យឃើញ​ យ៉ាងច្បាស់ថា វិស័យទេសចរណ៍ គឺមាន​លក្ខណៈជាប្រព័ន្ធ និងមានភាពប្រទាក់ក្រឡាគ្នានៅក្នុងការ អភិវឌ្ឍន៍សេដ្ឋកិច្ចសង្គម និងសក្កិសមដែលរាជរដ្ឋាភិបាលបានកំណត់ជា «មាសបៃតង» ផងដែរ។

មានមតិក្នុងកិច្ចប្រជុំលោក ម៉ែន ភារម្យ ប្រធានប្រតិភូក្រសួងទេសចរណ៍ និងជាអគ្គនាយករង នៃអគ្គនាយកដ្ឋានអភិវឌ្ឍទេសចរណ៍ និងសហប្រតិបត្តិការអន្តរជាតិ បានឲ្យដឹងថា នៅក្នុងអាណត្តិថ្មីក្រោមការដឹកនាំ របស់ឯកឧត្តម សុខ សុកេន រដ្ឋមន្ត្រីក្រសួងទេសចរណ៍ បានរៀបចំនូវគោលនយោបាយអភិវឌ្ឍន៍ ទេសចរណ៍ច្បាស់លាស់ ជាពិសេសគំនិតផ្តួចផ្តើមថ្មី បង្កើត ៥ និងអភិវឌ្ឍន៍៣ រួមមាន៖ បង្កើត៥. ទី១.បង្កើនប្រសិទ្ធភាពនៃការគ្រប់គ្រងកិត្តិនាមកម្ពុជា ទី២.បង្កើនប្រសិទ្ធភាពនៃការផ្សព្វផ្សាយភាព ទាក់ទាញទេសចរណ៍កម្ពុជាទៅកាន់ទីផ្សារសំខាន់ៗ ទី៣.បង្កើនប្រសិទ្ធភាពនៃការគ្រប់គ្រង និង សម្របសម្រួលកិច្ចការផ្ទៃក្នុង ពាក់ព័ន្ធទៅនឹងការ​ធ្វើដំណើររបស់ទេសចរ រួមទាំងការអភិវឌ្ឍន៍ហេដ្ឋា រចនាសម្ព័ន្ធទន់ និងរឹង ទី៤.បង្កើត​ប្រសិទ្ធភាពនៃការអភិវឌ្ឍផលិតផលទេសចរណ៍ និងទី៥.បង្កើន ប្រសិទ្ធភាពនៃការអភិវឌ្ឍធនធាន និងគោលដៅទាក់ទាញទេសចរណ៍ប្រកបដោយភាពប្រកួតប្រជែង ខ្ពស់។ អភិវឌ្ឍ ៣ រួមមាន៖ ទី១.អភិវឌ្ឍន៍រចនាសម្ព័ន្ធស្ថាប័ន ទី២.អភិវឌ្ឍន៍បរិវត្តកម្មឌីជីថល និង ទី៣.អភិវឌ្ឍន៍ធនធានមនុស្ស។

លោក ក៏បានសម្តែងនូវការកោតសរសើរ និងវាយតម្លៃខ្ពស់ចំពោះរដ្ឋបាលខេត្ត មន្ទីរទេសចរណ៍ខេត្ត និងគ្រប់ភាគីពាក់ព័ន្ធទាំងអស់ ដែលបានអនុវត្តយ៉ាងមានប្រសិទ្ធភាព​ នូវយន្តការ​គណៈកម្មាធិការ​អភិវឌ្ឍន៍​ទេសចរណ៍ខេត្តព្រះវិហារ ប្រកបដោយភាពបត់បែន​ នវានុវត្ត និងស្មារតីទទួលខុសត្រូវ ខ្ពស់ រហូតទទួលបានសមិទ្ធផលគួរជាទីមោទន ស្របតាមទស្សនទាន «រួមគ្នាគិត រួមគ្នាធ្វើ និងរួមគ្នា ទទួលខុសត្រូវ» ៕