ក្រសួងការងារ និងបណ្តុះបណ្តាល បានបន្តបើកវគ្គបណ្តុះបណ្តាល​ស្តីពី​សុវត្ថិភាព​អគ្គិភ័យ​នៅ​តាម​សហគ្រាស គ្រឹះស្ថាននានា ដើម្បីផ្សព្វផ្សាយ និងលើកកម្ពស់​ការ​យល់​ដឹង​អំពី​សុវត្ថិភាព​អគ្គិភ័យ​ អគ្គិសនី ការងារដែលមានហានិភ័យ និងការងារផ្សារ ដល់តំណាងសហគ្រាស គ្រឹះស្ថាន និង​ក្រុមការងារសុវត្ថិភាព និងសុខភាពការងារប្រចាំសហគ្រាស គ្រឹះស្ថាន ដោយ​មាន​អ្នកចូលរួមសរុបប្រមាណជិត ២០០នាក់។

ឯកឧត្តម ផេង សុខាំ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ នៅក្នុងកម្មវិធី កាលពីថ្ងៃទី២៧ មីនា ឆ្នាំ២០២៤នេះ បានចាត់ទុកវគ្គបណ្តុះបណ្តាលនេះ មាន​សារៈ​សំខាន់​ណាស់​ចំពោះ​សហគ្រាស គ្រឹះស្ថាន ជាពិសេសសម្រាប់ក្រុមការងារសុវត្ថិភាព និងសុខភាព​ប្រចាំ​សហ​គ្រាស គ្រឹះស្ថាន និងអ្នកពាក់ព័ន្ធដែលអនុវត្តការងារផ្ទាល់ និងចូលរួម​ត្រួត​ពិនិត្យ​លក្ខ​ខណ្ឌ​សុវត្ថិភាព​ការងារ​នៅកន្លែងធ្វើការ។ ឯកឧត្តម សង្កត់ធ្ងន់ថា ក្រុមការងារសុវត្ថិភាព និងសុវត្ថិភា​ព​ការងារ ដើរតួនាទីយ៉ាងសំខាន់ នៅក្នុងយន្តការចុងក្រោយនៃប្រព័ន្ធគ្រប់គ្រងសុវត្ថិភាព និង​សុខភាព​ការងារនៅថ្នាក់សហគ្រាស គ្រឹះស្ថាន និងចូលរួមលើកកម្ពស់ការតាមដាន ត្រួតពិនិត្យ និង​បង្ការករណីគ្រោះអគ្គិភ័យនៅកន្លែងធ្វើការ ឱ្យកាន់តែប្រសើរឡើង។

ឯកឧត្តម​លើកឡើងបន្តថា ជាការពិតណាស់ ដើម្បីសម្រេច​បាន​នូវ​ការ​កសាង​វប្បធម៌​នៃ​ការ​បង្ការ​សុវត្ថិភាព និងសុខភាពការងារ និងគ្រោះថ្នាក់ការងារនៅកន្លែងធ្វើការ ជាទស្សនៈ​វិស័យ​ដ៏វែង​ឆ្ងាយ ដែលទាមទារការចូលរួមយ៉ាងសកម្ម និងការបេ្តជ្ញាចិត្តរបស់គ្រប់ភាគីទាំងអស់ រួមមាន​រាជ​រដ្ឋាភិបាល អង្គការ និយោជក អង្គការកម្មករនិយោជិត អ្នកជំនាញផ្នែកសុវត្ថិភាព និង​សុខភា​ព​ការងារ ដើម្បីប្រែក្លាយការបង្ការសុវត្ថិភាព និងសុខភាពការងារទៅជាវប្បធម៌នៅកន្លែងធ្វើការ និង​ការរស់នៅប្រចាំថ្ងៃ។

លោក ឡេង តុង ប្រធាននាយកដ្ឋានពេទ្យការងារ បានបញ្ជាក់ថា ដើម្បីបង្ការ និងកាត់បន្ថយ​គ្រោះថ្នាក់​អគ្គិភ័យកើតឡើងនៅកន្លែងធ្វើការ និយោជកគួរតែរៀបចំផែនការការងារឲ្យបានជាមុន មានដូចជា៖ ត្រូវអនុវត្តការវាយតម្លៃហានិភ័យអគ្គិភ័យ ដោយពិចារណា​លើ​មូល​ហេតុ​ចំបងៗ​ដែល​ជា​ធាតុផ្សំនាំឱ្យមានអគ្គិភ័យកើតឡើង , ត្រូវមានឧបករណ៍​ពន្លត់​អគ្គិភ័យ​ត្រឹម​ត្រូវ​សម្រាប់​ពន្លត់​ភ្លើង​ឱ្យ​បាន​ទាន់ពេលវេលា , រៀបចំគំនូសប្លង់ជម្លៀសខ្លួនដែលបង្ហាញអំពីសញ្ញាបង្ហាញផ្លូវ និង​ច្រក​គ្រា​អាសន្នឱ្យបានច្បាស់លាស់ មិនមានឧបសគ្គ និងចាក់សោរនៅម៉ោងធ្វើការ និង​ការរៀបចំការបណ្តុះបណ្តាលអំពីនីតិវិធីជម្លៀសខ្លួន និងហ្វឹកហាត់ពន្លត់អគ្គិភ័យដល់កម្មករ និយោជិត​ឱ្យបានទៀងទាត់ជាដើម៕ អត្ថបទ៖ឈិត បូរ៉ាវី