ក្រុមប្រឹក្សាគ្រប់គ្រងដែលមានគោលបំណងត្រួតពិនិត្យការផ្លាស់ប្តូរនយោបាយ នៅក្នុងប្រទេសហៃទី បានប្តេជ្ញាកាលពីថ្ងៃពុធថា នឹងស្តារ «សណ្តាប់ធ្នាប់សាធារណៈ និងប្រជាធិបតេយ្យ» នៅក្នុងសេចក្តីថ្លែងការណ៍ដំបូងរបស់ខ្លួន ដល់ប្រទេសតំបន់ការ៉ាអ៊ីបដែលរងការខូចខាតដោយវិបត្តិសន្តិសុខកាន់តែអាក្រក់ឡើង។
ប្រទេសហៃទីដ៏ក្រីក្រ ដែលជាប់ពាក់ព័ន្ធជាមួយអំពើហិង្សាយូរមកហើយ ត្រូវបានរង្គោះដោយការប៉ះទង្គិចគ្នា ចាប់តាំងពីចុងខែកុម្ភៈ នៅពេលដែលក្រុមជនអន្ធពាល បានចាប់ផ្តើមការវាយលុកដ៏បំផ្លិចបំផ្លាញ និងទាមទារឲ្យលោកនាយករដ្ឋមន្ត្រី Ariel Henry ចុះចេញពីតំណែង។
សេចក្តីថ្លែងការណ៍របស់ក្រុមប្រឹក្សាប្រធានាធិបតីដែលមិនទាន់ត្រូវបានបង្កើតឡើងជាផ្លូវការនោះ បានឲ្យដឹងថា៖««យើងប្តេជ្ញាចិត្ត ដើម្បីកាត់បន្ថយការឈឺចាប់របស់ប្រជាជនហៃទីដែលមានយូរពេកហើយរវាងអភិបាលកិច្ចមិនល្អ អំពើហិង្សាច្រើនប្រភេទ និងការមិនយកចិត្តទុកដាក់ចំពោះទស្សនៈ និងតម្រូវការរបស់ពួកគេ»។
ដោយត្រូវចុះហត្ថលេខាដោយសមាជិក៨រូបក្នុងចំណោម៩នៃក្រុមប្រឹក្សានេះ សេចក្តីថ្លែងការណ៍នេះ បានបញ្ជាក់ថា នៅពេលក្រុមប្រឹក្សាត្រូវបានសម្រេចជាផ្លូវការ ខ្លួននឹងតែងតាំងនាយករដ្ឋមន្ត្រីមួយរូប ដែលនឹងជួយក្នុងការបង្កើតរដ្ឋាភិបាលមួយ ដើម្បី«ដាក់ប្រទេសហៃទីនៅលើផ្លូវត្រឡប់រកភាពស្របច្បាប់តាមបែបប្រជាធិបតេយ្យ ស្ថិរភាព និងសេចក្តីថ្លៃថ្នូរ»។
សេចក្តីថ្លែងការណ៍នេះ បានបញ្ចប់ដោយការអង្វរសុំឲ្យមានការរួបរួម ដោយព្រមានថា ប្រទេសហៃទីកំពុងស្ថិតក្នុង «ចំណុចរបត់ដ៏សំខាន់»។