យោងតាមការវិភាគ ដែលសហការជាមួយអង្គការសហប្រជាជាតិ ត្រូវបានចេញផ្សាយកាលពីថ្ងៃពុធថា ការទម្លាក់គ្រាប់បែកយ៉ាងខ្លាំងក្លាលើតំបន់ហ្កាហ្សាធ្វើឡើងដោយអ៊ីស្រាអែល បានបណ្តាលឱ្យមាន ការបំផ្លាញដោយផ្ទាល់ទៅលើសាលារៀនចំនួន ២១២កន្លែង នៅក្នុងតំបន់ហ៊ុមព័ទ្ធហ្កាហ្សា។

រូបភាពពីផ្កាយរណប បានបង្ហាញថា យ៉ាងហោចណាស់សាលារៀនចំនួន ៥៣កន្លែង ត្រូវបាន បំផ្លាញទាំងស្រុង ចាប់តាំងពីជម្លោះបានចាប់ផ្តើមនៅថ្ងៃទី ៧ ខែតុលា ឆ្នាំ ២០២៣ រួមជាមួយការកើនឡើងជិត ៩ ភាគរយនៃការវាយប្រហារលើអគារសាលារៀន ចាប់តាំងពីពាក់កណ្តាលខែកុម្ភៈ ខណៈត្រូវបានរាយការណ៍ដោយអង្គការមូលនិធិកុមាររបស់អង្គការសហប្រជាជាតិ(យូនីសេហ្វ) យន្តការកម្រងសិក្សាអប់រំ និងអង្គការសង្គ្រោះកុមារ។

របាយការណ៍បានកត់ត្រាថា និន្នាការខ្ពស់នៃការវាយប្រហារលើអគារសិក្សា បានធ្វើឱ្យស្ថានភាពមនុស្សធម៌ធ្លាក់ចុះយ៉ាប់យ៉ឺនរួចទៅហើយនៅក្នុងតំបន់ហ្កាហ្សា ខណៈការទម្លាក់គ្រាប់បែករបស់អ៊ីស្រាអែលយ៉ាងខ្លាំងធ្វឡើងពីលើអាកាស តាមដីគោក និងសមុទ្រ នៅទូទាំងតំបន់ហ្កាហ្សា។

ក្នុងចំណោមអគារសិក្សាចំនួន ៥៦៣កន្លែងនៅតំបន់ហ្កាហ្សា ១៦៥កន្លែងក្នុងចំណោម២១២កន្លែង ដែលបានទទួលរងការបំផ្លាញដោយផ្ទាល់ គឺស្ថិតនៅក្នុងតំបន់ដែលត្រូវបានរៀបចំសម្រាប់ការជម្លៀសខ្លួនដោយយោធាអ៊ីស្រាអែល។

យោងតាមរបាយការណ៍បានឱ្យដឹងថា អគារច្រើនជាង១នៅក្នុងគ្រឹះស្ថានសិក្សាពីរកន្លែង ត្រូវបានគ្រប់គ្រងដោយទីភ្នាក់ងារជំនួយនិងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) ក៏ត្រូវបានវាយប្រហារ ចាប់តាំងពីខែតុលាឆ្នាំមុន រួមជាមួយអគាររដ្ឋាភិបាលដែលកំណត់គោលដៅដោយការបាញ់ផ្លោងរបស់អ៊ីស្រាអែល ឬអំឡុងពេលប្រតិបត្តិការជើងគោក។

ទីភ្នាក់ងារ UNRWA បាននិយាយកាលពីថ្ងៃពុធថា គ្មានការសិក្សាអប់រំណាមួយកើតឡើងឡើយនៅក្នុងតំបន់ហ្កាហ្សា ក្នុងរយៈពេលជិត៦ខែកន្លងទៅនេះ។