ក្រុមហ៊ុនផលិតឱសថជប៉ុនដែលអាហារបំប៉នរបស់ខ្លួន កំពុងស្ថិតក្នុងការភ័យខ្លាចផ្នែកសុខភាពដែលកំពុងកើនឡើង នៅថ្ងៃព្រហស្បតិ៍ (ទី២៨ ខែមីនា) បានរាយការណ៍ពីការស្លាប់ ២ករណីបន្ថែមទៀត ដែលទាក់ទងនឹងថ្នាំគ្រាប់របស់ក្រុមហ៊ុន។

កាលពីសប្តាហ៍មុន ក្រុមហ៊ុនឱសថ Kobayashi Pharmaceutical បានប្រមូលម៉ាកអាហារបំប៉នចំនួន៣ គឺ «Beni Koji Choleste Help» និងផលិតផល ២ផ្សេងទៀត ដែលមានសារធាតុផ្សំហៅថា «Red Yeast Rice» (អង្ករដំបែក្រហម) ឬ «Beni Koji» ដែលត្រូវបានកំណត់ថា ប្រើជួយកាត់បន្ថយកូឡេស្តេរ៉ុល។

សេចក្តីប្រកាស នៅថ្ងៃព្រហស្បតិ៍នេះ នាំឲ្យចំនួនអ្នកស្លាប់សរុប ដែលស្ថិតនៅក្រោមការស៊ើបអង្កេតដោយក្រុមហ៊ុន និងក្រសួងសុខាភិបាល កើនឡើងដល់ ៤នាក់ហើយ ខណៈដែលមនុស្សជាង ១០០នាក់ផ្សេងទៀតកំពុងសម្រាកព្យាបាលនៅមន្ទីរពេទ្យ។

ក្រុមហ៊ុនផលិតឱសថបានឲ្យដឹងនៅក្នុងសេចក្តីថ្លែងការណ៍មួយ នៅថ្ងៃព្រហស្បតិ៍នេះថា៖ «យើងត្រូវបានផ្ដល់ព័ត៌មានកាលពីម្សិលមិញដោយក្រុមគ្រួសារសពថា មនុស្សម្នាក់ដែលបានប្រើថ្នាំ Choleste Help បានបាត់បង់ជីវិត ដោយសារជំងឺតម្រងនោម»។

ហើយក្រុមហ៊ុនបានបន្ថែមថា ខ្លួនត្រូវបានគេប្រាប់ដាច់ដោយឡែកមួយទៀតថា មនុស្សម្នាក់ផ្សេងទៀតដែលបានប្រើថ្នាំ Choleste Help ក្នុងប៉ុន្មានឆ្នាំថ្មីៗនេះ បានស្លាប់។

គួរបញ្ជាក់ថា ក្រុមហ៊ុន Kobayashi Pharmaceutical ដែលមានមូលដ្ឋាននៅទីក្រុង Osaka មួយនេះ លក់ផលិតផលសុខភាពជាច្រើនប្រភេទ ដែលដាក់លក់នៅលើទីផ្សារតាមរយៈការផ្សាយពាណិជ្ជកម្មតាមទូរទស្សន៍ក្នុងប្រទេសជប៉ុន ហើយក្រុមហ៊ុននិយាយថា ខ្លួនក៏បានផ្គត់ផ្គង់អង្ករដំបែក្រហមដល់ក្រុមហ៊ុនប្រហែល ៥០ផ្សេងទៀត នៅជប៉ុន និងចំនួន ២ នៅកោះតៃវ៉ាន់៕